Tag: پاکستان پیپلز پارٹی

لاہور : سابق صدر آصف زرداری نے کہا ہے کہ کشمیر پاکستان کی شہہ رگ ہے اور یہ بات ہمیں نوجوان نسلوں کو بتانی ہے لیکن میاں صاحب نے آج کشمیر میں جلسہ تو کیا لیکن کشمیریوں کے حق میں بات کرنے کے بجائے سیاسی گفتگو کرتے رہے اور اگر یہی کرنا تھا تو کشمیر گئے ہی کیوں تھے.

وہ موچی گیٹ پر پاکستان پیپلز پارٹی کے یوم یکجہتی کشمیر کی مناسبت سے منعقد کردہ جلسے سے خطاب کر رہے تھے، سابق صدر کا کہنا تھا کہ آج جس جگہ جلسہ ہو رہا ہے وہاں قائد اعظم محمد علی جناح اور قائد عوام ذوالفقارعلی بھٹو بھی آپ سے مخاطب رہے ہیں.

انہوں نے کہا کہ بی بی شہید بھی اسی مقام پر جلسہ کرچکی ہیں اور آج میری خوش قسمتی ہے کہ یہاں آکر آپ سے مخاطب ہوں اور کامیاب جلسے پر پنجاب کے بہادر بھائیوں اور بہنوں کو سلامِ تحسین پیش کرسکتا ہوں جو شریف خاندان کی نااہلی اور کرپشن کے خلاف جمع ہوئے.

آصف علی زرداری نے کہا کہ موجودہ حکمرانوں نے 3 برسوں میں ملک کی تاریخ کا سب سے زیادہ قرضہ لے کر قوم کے بچے بچے کو مقروض کردیا ہے اور اب موجودہ حکومت کا لیا گیا قرضہ ہماری آئندہ آنے والی نسلوں کو اتارنا پڑے گا اور یہ تو ملک سے فرار ہو جائیں گے.

انہوں نے سابق وزیراعظم نوازشریف کو سخت تنقید کا نشانہ بناتے ہوئے کہا کہ کچھ لوگ اپنے گاؤں کا نام جاتی امرا تو رکھتے ہیں لیکن کشمیر کا غم نہیں رکھتے بلکہ کشمیریوں کے زخموں پر نمک پاشی کرتے ہوئے مودی سرکار سے پینگیں بڑھائی جاتی ہیں.

سابق صدر کا مزید کہنا تھا کہ آج نواز شریف مشرف کو پاکستان واپس لانے اور سزا دلوانے کی باتیں کرتے ہیں لیکن پرویز مشرف کے ملک سے باہر جانے پر عدالت میں کہا کہ ہمیں کوئی اعتراض نہیں ہے اور اب بڑی بڑی باتیں کر رہے ہیں.

آصف زرداری نے کہا کہ ہم نے جمہوریت کی خاطر 15 سال جیل میں کاٹی ہے اور اگر چاہوں تو آپ کی حکومت کو گرا سکتا ہوں اور آپ کچھ بھی نہیں کرسکیں گے لیکن میں چاہتا ہوں کہ آپ حالات کو سمجھیں اور تصادم کی راہ نہ اپنائیں اور اپنا رویہ درست کریں.

انہوں نے مزید کہا کہ نواز شریف کو سی پیک کے بارے میں کچھ علم نہیں ہے یہ میرے دور میں شروع ہوا تھا جس کا کریڈٹ یہ لینا چاہتے ہیں اور اپنی ناسمجھی میں سی پیک کو قرض لینے کی تنظیم سمجھ لیا ہے جب کہ سی پیک سے ہمیں خطے کی معاشی طاقت بننا تھا.

آصف زرداری نے کہا کہ اب میں ، بلاول بھٹو اور آصفہ بھٹو زرداری پارلیمنٹ میں جائیں گے اور میں وعدہ کرتا ہوں کہ آئندہ انتخابات شفاف ہوں گے اور سندھ کی طرح بلوچستان اور پنجاب سے بھی پیپلز پارٹی کلین سوئپ کرے گی، اب ہم نواز شریف جیسے درندے کو برداشت نہیں کرسکتے.

انہوں نے کہا کہ اگر ہم نے میاں صاحب کو چھوڑ دیا تو شاید اللہ ہمیں معاف نہیں کرے گا کیوں کہ نواز شریف قوم کا چور ہے جس نے نے اپنی بادشاہت کو مضبوط کرنے کیلئے پاکستان کی جڑیں کاٹیں.

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

لاہور : سربراہ پاکستان عوامی تحریک ڈاکٹر طاہر القادری نے کہا ہے کہ ظالم حکمرانوں کو کٹہرے میں لانے کے لیے 17 جنوری کے احتجاج میں ملک کی تمام جماعتیں شرکت کریں گی۔

وہ ماڈل ٹاؤن میں اپنے مرکزی دفتر میں پریس کانفرنس سے خطاب کر رہے تھے، علامہ طاہر القادری کا کہنا تھا کہ یہ ملکی تاریخ کا پہلا احتجاج ہو گا جس میں پاکستان بھر کی سیاسی و مذہبی جماعتیں محض انصاف کے حصول کے لیے شرکت کریں گی۔

انہوں نے کہا کہ 17 جنوری کو پاکستان عوامی تحریک کے احتجاج کا مقصد سانحہ ماڈل ٹاؤن کے شہداء کے لواحقین کو انصاف دلوانا ہے جس کے لیے ہم وزیراعلیٰ پنجاب شہباز شریف اور وزیر قانون رانا ثناء اللہ کے مستعفی ہونے تک چین سے نہیں بیٹھیں گے۔

انہوں نے مزید کہا کہ حکومت زینب کے قاتل کو گرفتار کرنے میں ناکام ہے جب کہ 10 سال میں 11 ہزار ارب روہے کا بجٹ استعمال کرنے کے باوجود شہباز شریف کی حکومت زینب کے قاتل کو گرفتار کرنے میں ناکام رہی ہے۔

طاہر القادری نے بتایا کہ شہباز شریف نے پولیس کو حکومتی خزانے سے 10 سال میں ساڑھے7 سو ارب مزید دیے لیکن ان

خطیر رقوم کو استعمال کرنے والی پولیس انسانوں کا شکارکر رہی ہے اور یا تو مظلوموں کا خون بہارہی ہے یا جاتی امراء اور شاہی خاندان کا تحفظ کرنے میں مشغول ہے۔

تحریک انصاف کا اظہار یکجہتی، احتجاج میں بھرپور شرکت کا اعلان 

دوسری جانب تحریک انصاف نے ماڈل ٹاؤن میں قتل عام کرنے والوں کیخلاف17جنوری کو ہونے والے احتجاج کے پیش نظر اسی دن ہونے والے اپنے پارلیمانی بورڈ کا طے شدہ اجلاس منسوخ کردیا ہے جب کہ چیئرمین عمران خان نے تحریک انصاف کے ذمہ داروں اورعلاقائی صدور کو احتجاج میں شرکت کی ہدایت کی ہے۔

خیال رہے پاکستان تحریک انصاف کے پارلیمانی بورڈ کا اجلاس 16 جنوری کو اسلام آباد میں طلب کیا گیا تھا جو اب چیئرمین پی ٹی آئی کی ہدایت پر منسوخ کردیا گیا ہے تاہم ابھی اجلاس کی نئی تاریخ کا تعین کیا گیا ہے جس کے بعد تحریک انصاف کے ذمہ داروں نے احتجاج میں شرکت کے لیے حکمت عملی طے کرنا شروع کردی ہے۔

پیپلز پارٹی نے بھی احتجاج میں شرکت کے لیے کمر کس لی 

اسی طرح پاکستان پیپلز پارٹی پنجاب کے صدر قمر زمان کائرہ نے اپنے ایک بیان میں کہا ہے کہ آصف زرداری اورعمران خان ایک ہی کنٹینر پر ہوں گے، 17 جنوری کے احتجاج میں بھرپور شرکت کریں گے اور پنجاب کے حکمرانوں کوعہدہ چھوڑنے پر مجبورکردیں گے کیوں کہ لاتوں کے بھوت باتوں سے نہیں مانتے۔

انہوں نے مزید کہا کہ ایک روزہ احتجاج کا کوئی سیاسی ایجنڈا نہیں ہے بلکہ یہ محض انصاف کے حصول کی ایک کوشش ہے جہاں تمام جماعتیں جسٹس باقر نجفی رپورٹ کی روشنی میں ذمے داروں کو کیفر کردار تک پہنچانے کے اپنے مطالبے کا اعادہ کریں گی اور اگر احتجاج کے روکنے کے لیے طاقت کا استعمال کیا گیا تو پیپلزپارٹی جواب دینا جانتی ہے۔

خیال رہے جون 2014 میں پاکستان عوامی تحریک کے مرکزی دفتر واقع ماڈل ٹاؤن پر پولیس اور شرکاء کے درمیان جھڑپ میں درجن سے زائد افراد جاں بحق ہو گئے تھے جن میں بزرگ، بچے اور خواتین بھی شامل تھے، علا مہ طاہر القادری نے جسٹس باقر نجفی کمیشن رپورٹ کی روشنی میں نے شہباز شریف اور رانا ثنا سے مستعفی ہونے کا مطالبہ کیا تھا۔

تاہم وزیراعلیٰ شہباز شریف اور وزیر قانون پنجاب رانا ثنا اللہ نے مستعفی ہونے سے انکار کرتے ہوئے موقف دہرایا تھا کہ رپورٹ میں ذمہ داروں کا تعین ہے تو اس پر عدالت کے ذریعے عمل درآمد کرایا جائے اور چوں کہ رپورٹ میں ایسی کوئی بات نہیں اس لیے طاہر القادری عدالت جانے کے بجائے احتجاج میں فرار کا راستہ ڈھونڈ رہے ہیں۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔