کراچی : سندھ کے مشیر اطلاعات مولا بخش چانڈیو نے کہا ہے کہ کراچی کے مسائل کا حل کا تہیہ کر لیا ہے کراچی والوں کو تنہا نہیں چھوڑیں گے پارٹی کی تنظیم نو کر رہے ہیں۔

مشیر اطلاعات پیپلز پارٹی کے دیگر رہنماؤں کے ہمراہ ایک پر ہجوم پریس کانفرنس سے خطاب کر رہے تھے انہوں نے کہا کہ ہم کسی کے دشمن اور دوست نہیں بلکہ ہم جمہوریت کے دوست ہیں اورہمیں پاکستان کی سالمیت عزیز ہے۔

انہوں نے کہا کہ کراچی پیپلز پٔارٹی کا گڑھ ہے پیپلز پارٹی کی یہاں جڑیں گہری بھی ہیں اور مضبوط بھی ہیں جس کا ثبوت پی ایس 127 کے ضمنی الیکشن میں پی پی پی کے امیدوار کی کامیابی ہے جس پر کراچی کے عوام کے شکر گذار ہیں۔

کراچی کی عوام کو تنہا نہیں چھوڑیں گے تنظیم نو کر رہے ہیں جس کے بعد کراچی کے عوام ایک الگ پیپلز پارٹی دیکھیں گے جواں سال قیادت کراچی کے لیے پرعزم ہے ہم نے کراچی کے عوام سے بے وفائی نہیں کی بلکہ کبھی اپنوں کی بے وفائی نے اور کبھی غیروں کی سازشوں نے ہمیں کراچی میں پنپنے نہیں دیا۔

انہوں نے وفاقی حکومت کو تنقید کا نشانہ بناتے ہوئے کہا کہ پردیسی جتنی مرضی باتیں کر لے پیپلز پارٹی میرے خون میں شامل ہے،کراچی میں مسافر سیاستدان سینیٹ کی ادھار کی سیٹ پر بھنگڑے ڈال رہا ہے۔

میں ایسے ناکام سیاستدانوں سے کہتا ہوں کہ مجھ پر الزام لگانے کے بجائے حیدر آباد جاﺅ اور مولا بخش چانڈیو کے خلاف بول کے دکھاﺅ۔

کراچی : پیپلزپارٹی کی کوآرڈینیشن کمیٹی کا اجلاس آج بلاول ہاوس میں بلاول بھٹو زرداری کی صدارت میں ہوا جس میں کراچی کے مسائل کے حل کے لیے اہداف مقرر کیے گئے اور 18 اکتوبر کو سانحہ کارساز کی برسی کے موقع پر ریلی کے انعقاد کا فیصلہ کیا گیا، بلاول بھٹو نے کہا کہ کراچی کے مسائل کا ہر صورت حل چاہتا ہوں۔

تفصیلات کے مطابق چیئرمین بلاول بھٹو زرداری کی زیر صدارت اجلاس میں فیصلہ کیا گیا کہ 18 اکتوبر کو سانحہ کارساز کے شہداء کی یاد میں ریلی نکالی جائے گی،ریلی سے چیئرمین پیپلز پارٹی بلاول بھٹو زردای خطاب کریں گئے۔

اجلاس میں پیپلز پارٹی کراچی کے صدر اور جنرل سیکرٹری سمیت اہم رہنماؤں نے شرکت کی اورریلی کے اتنظامات،رُوٹ اور مقامِ خطاب کا تعین بھی کیا گیا۔

اجلاس میں فیصلہ کیا گیا کہ کارکنان کو متحرک کیا جائے گا اور 18 اکتوبر کو پیپلزپارٹی کراچی میں ریلی نکال کر بھرپورعوامی طاقت کا مظاہرہ کرے گا۔

علاوہ ازیں اجلاس میں کراچی کی تعمیر اور ترقی کے لیے اہداف بھی مقرر کیے گئے جب کہ متعلقہ وزرا کو کراچی میں جاری ترقیاتی پروجیکٹس کی جلد از جلد تکمیل میں حائل رکاوٹوں کو دور کرنے کے ساتھ ساتھ نئے پروجیکٹس کی شروع کرنے کی ہدایات بھی دیں۔

بلاول بھٹو زرداری حال ہی میں عید منا کر لاڑکانہ سے واپس لوٹے ہیں جہاں انہوں نے جیالوں اور پارٹی رہنماؤں سے ملاقاتیں کر کے اندرون سندھ میں تنظیم نو کی ضرورت پر زور دیا اور اراکین اسمبلی کو اپنے اپنے حلقوں کے مسائل کے حل کرنے اور علاقہ مکینوں سے روابط بڑھانے کی ہدایات کیں۔

واضح رہے کہ 18 اکتوبر 2007 کو بے نظیر بھٹو جلاوطنی ختم کرکے وطن واپسی لوٹیں تو کراچی ائیر پورٹ پر ان کا فقید المثال استقبال ہوا،عوام کا ایک جم غفیرقافلے کی صورت میں بلاول ہاؤس کی جانب رواں تھا کہ کارساز کے مقام پر یکے بعد دیگرے دو خود کش دھماکوں کے باعث متعدد افراد جاں بحق اور سیکڑوں زخمی ہوگئے تھے جب کہ اس حملے میں بے نظیر بال بال محفوظ رہی تھیں۔