پاکستان میں ڈیجیٹل سٹی کے قیام کے لیے معاہدے پر دستخط کردیئے گئے، یہ منصوبہ خیبرپختونخوا میں اپنی نوعیت کا پہلا خصوصی ٹیکنالوجی زون ہوگا۔
تفصیلات کے مطابق خصوصی سرمایہ کاری سہولت کونسل کی معاونت سے پاکستان ڈیجیٹل سٹی کے قیام کے لیے معاہدے پر دستخط کردیئے گئے۔
خصوصی ٹیکنالوجی زونز اتھارٹی اورخیبرپختونخواانفارمیشن ٹیکنالوجی بورڈنےمعاہدےپردستخط کیے، پاکستان ڈیجیٹل سٹی کےقیام کےلیے8بلین روپےکی مالیت کےزون ڈویلپمنٹ کامعاہدہ ہوا۔
نیسپاک ،این ایل سی کی زیر نگرانیڈیجیٹل سٹی میں 1642ملین روپےکی سرمایہ کاری ہوچکی ہے اور پاکستان ڈیجیٹل سٹی منصوبے کا تقریباً 30 فیصد کام مکمل ہوچکا ہے۔
ہری پور میں جاری یہ منصوبہ 11 ایکڑ اراضی پرتعمیر کیا جارہا ہے ، جو 2026 میں فعال ہوجائے گا۔
یہ منصوبہ خیبرپختونخوا میں اپنی نوعیت کا پہلا خصوصی ٹیکنالوجی زون ہوگا، جس کے تحت 4 ہزار تک آئی ٹی اسٹارٹ اپس قائم ہوسکیں گے اور آئی ٹی برآمدات میں 50 ملین ڈالر تک اضافہ ہوگا۔
پاکستان ڈیجیٹل سٹی ملک کا اولین ٹیکس فری زون ہوگا، جس میں کام کرنے والی تمام کمپنیاں آئندہ دس سال تک ٹیکس سے مستثنیٰ ہوں گے۔
صوبہ خیبرپختونخوا کی 50 فیصد آبادی 30سال سے کم عمر کی ہے جس میں سالانہ 6 ہزار آئی ٹی گریجویٹ کا اضافہ ہو رہا ہے ، اس منصوبے سے نہ صرف آئی ٹی برآمدات میں اضافہ ہوگا بلکہ آئی ٹی گریجویٹس کو روزگار کے مواقع بھی فراہم ہوں گے۔