Tag: پاکستان کا

واشنگٹن:  پاکستان نے امریکی حکام کو کہا ہے کہ پُرامن جوہری ٹیکنالوجی تک رسائی توانائی کے بحران کے شکار ملک کی سماجی و معاشی ترجیح ہے۔

پاکستان نے امریکی حکام پر واضح کیا ہے کہ بھارت اور امریکہ کےدرمیان سول جوہری تعاون کے معاہدے جیسا معاہدہ پاکستان کا بھی حق ہے، مشترکہ اعلامیے میں کہا گیا ہے کہ پاکستان نے امریکا کو ایک بار پھر یقین دہانی کرائی کہ وہ خطے میں جوہری دھماکے کرنے میں پہل نہیں کرے گا۔

پاکستان اور امریکا کے درمیان سیکیورٹی، اسٹرٹیجک استحکام اور جوہری عدم پھیلاؤ سے متعلق قائم ورکنگ گروپ کے درمیان واشنگٹن میں مذاکرات کے ساتویں دور کے بعد جاری کیے گئے اعلامیے میں پاکستان کی جانب سے سختی سے ان تجاویز کی مخالفت کی گئی جس میں یکطرفہ طور پر اس کے جوہری اثاثوں میں کمی لانے کوکہا گیا اور روایتی ہتھیاروں میں ہندوستان کے ساتھ عدم توازن میں کمی کی ضرورت پر بھی زور دیا گیا۔

ان مذاکرات سے ایک روز قبل سیکرٹری خارجہ اعزاز احمد چوہدری نے واشنگٹن میں ایک بریفننگ کے دوران کہا تھا کہ پاکستان کو بھی اسی طرح کی سول جوہری تعاون کے معاہدے کا حق ہے، جیسا امریکا نے ہندوستان کے ساتھ کیا ہے۔

پاکستانی سیکرٹری خارجہ نے اپنی بریفننگ کے دوران کہا تھا کہ پاکستان جوہری عدم پھیلاؤ کے معاہدے این پی ٹی پی پر دستخط نہیں کرے گا کیونکہ وہ امتیازی ہے۔

پاکستان نے اصرار کیا کہ اس کے جوہری پروگرام پر توجہ کی واحد وجہ ہندوستان کے جوہری خطرے سے نمٹنا ہے اور وہ اسی صورت میں ایک معاہدے میں شمولیت اختیار کرسکتا ہے جب اس کی تشویش کا ازالہ کیا جائے۔