Tag: پاکستان کی خبریں

  • اسحٰق ڈار کے خلاف آمدن سے زائد اثاثہ جات ریفرنس کی سماعت

    اسحٰق ڈار کے خلاف آمدن سے زائد اثاثہ جات ریفرنس کی سماعت

    اسلام آباد: احتساب عدالت میں سابق وزیر خزانہ اسحٰق ڈار کے خلاف آمدن سے زائد اثاثہ جات ریفرنس کی سماعت کے دوران استغاثہ کے بیانات قلمبند کیے گئے۔

    تفصیلات کے مطابق احتساب عدالت میں سابق وزیر خزانہ اسحٰق ڈار کے خلاف آمدن سے زائد اثاثہ جات ریفرنس کی سماعت جج محمد بشیر نے کی۔

    سماعت میں استغاثہ کے 4 گواہوں کے بیانات قلمبند کیے گئے۔

    عدالت میں شریک ملزمان سعید احمد، نعیم محمود اور منصور رضا رضوی بھی پیش ہوئے۔

    عدالت میں استغاثہ کے گواہ مرزا فیض الرحمٰن نے بیان دیتے ہوئے کہا کہ 17 اگست 2017 کو پہلی بار لاہور نیب کے سامنے پیش ہوا۔

    انہوں نے کہا کہ ٹرانسفر ایپلی کیشن کی تفصیلات جمع کروائی تھیں۔

    خیال رہے کہ مرزا فیض الرحمٰن کا تعلق لینڈ ڈیولپمنٹ ڈپارٹمنٹ سے ہے۔

    مرزا فیض الرحمٰن کے علاوہ اظہر حسین اور علی اکبر بھنڈر نامی گواہان نے بھی بیان قلمبند کروایا۔ مزید گواہان میں میر زمان، فیصل شہزاد، انعام الحق اور شکیل انجم شامل ہیں۔

    گواہان کے بیانات قلمبند کرنے کے بعد عدالت نے استغاثہ کے مزید 3 گواہوں کو طلب کر لیا جن میں محمد اشتیاق، عمر دراز اور قمر زمان شامل ہیں۔

    احتساب عدالت نے کیس کی مزید سماعت 15 اگست تک ملتوی کردی۔


     

  • چیف جسٹس انتخابی حلقوں کے نتائج روکے جانے پر نوٹس لیں، فواد چوہدری

    چیف جسٹس انتخابی حلقوں کے نتائج روکے جانے پر نوٹس لیں، فواد چوہدری

    اسلام آباد: پاکستان تحریکِ انصاف کے ترجمان فواد چوہدری نے انتخابی حلقوں کے نتائج روکے جانے پر چیف جسٹس آف پاکستان میاں ثاقب نثار سے نوٹس لینے کی استدعا کر دی۔

    تفصیلات کے مطابق انتخابی حلقوں کے نتائج روکے جانے پر تحریکِ انصاف کا ردِ عمل سامنے آ گیا، پی ٹی آئی ترجمان نے چیف جسٹس سے مداخلت کرنے کی استدعا کر دی۔

    فواد چوہدری نے میڈیا سے گفتگو کرتے ہوئے کہا ’20 حلقوں کے نتائج انتظامی یا عدالتی وجوہات کی بنا پر روکنا نا مناسب عمل ہے۔‘

    انھوں نے کہا کہ 48 حلقوں میں پہلے ہی ووٹوں کی دوبارہ گنتی کی جا چکی ہے، اب نتائج میں مزید تعطل سے انتقالِ اقتدار کا عمل مؤخر ہونے کا خدشہ ہے۔

    پی ٹی آئی ترجمان فواد چوہدری کا کہنا تھا کہ عدالت اس بات کی وضاحت پہلے ہی کر چکی ہے کہ دوبارہ گنتی کن وجوہ کی بنا پر ہو سکتی ہے۔

    لاہورہائی کورٹ نے خواجہ آصف کی کامیابی کا نوٹی فکیشن روک دیا

    انھوں نے کہا ’انتخابی جمہوری عمل میں کسی بھی قسم کی نا جائز تاخیر نقصان دہ ہے، چیف جسٹس سے استدعا ہے کہ نتائج کے نا مناسب تعطل کا نو ٹس لیں۔‘

    واضح رہے کہ آج لاہور عدالت نے این اے 73 سیالکوٹ سے عثمان ڈار کی درخواست پر حکم جاری کرتے ہوئے خواجہ آصف کی کام یابی کا نوٹی فکیشن روک دیا ہے، پی ٹی آئی رہنما نے خواجہ آصف کی کام یابی چیلنج کرتے ہوئے دوبارہ گنتی کی درخواست دائر کی تھی۔

    یاد رہے کہ آج لاہور ہائی کورٹ نے فیصل آباد کے حلقے این اے 106 پر بھی رانا ثناء اللہ کی کام یابی کے خلاف درخواست پر سماعت کرتے ہوئے ان کی کام یابی کا نوٹی فکیشن روکنے کا حکم دے دیا تھا۔


    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو  زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • یورپی یونین کے سفیر کی عمران خان سے ملاقات، پی ٹی آئی کے ساتھ کام کرنے کا عندیہ

    یورپی یونین کے سفیر کی عمران خان سے ملاقات، پی ٹی آئی کے ساتھ کام کرنے کا عندیہ

    اسلام آباد: پاکستان میں یورپی یونین کے سفیر جین فرینکوئس کوٹین نے پاکستان تحریکِ انصاف کے چیئرمین عمران خان سے بنی گالہ میں ملاقات کرتے ہوئے انتخابات میں جیتنے پر مبارک باد دی۔

    تفصیلات کے مطابق جین فرینکوئس جو کہ پاکستان میں یورپی یونین کے سفیر ہیں، نے اسلام آباد میں عمران خان سے ملاقات کی۔ یورپی یونین کے سفیر نے ملاقات میں عمران خان کو انتخابات میں کام یابی حاصل کرنے پر مبارک باد دی۔

    جین فرینکوئس نے آج پیر کے روز بنی گالہ میں ملاقات کے دوران وزارتِ عظمیٰ کے لیے امیدوار عمران خان کی نئی حکومت کے لیے نیک تمناؤں کا بھی اظہار کیا۔

    عمران خان اور یورپی یونین کے سفیر کے درمیان باہمی دل چسپی کے متعدد امور پر بھی گفتگو ہوئی۔

    جین فرینکوئس نے کہا کہ یورپی یونین کی پی ٹی آئی کے ساتھ کام کرنے میں دل چسپی ہے، یورپی یونین سیکورٹی، معیشت، تعلیم اور دیہی ترقی میں اشتراک کے لیے تیار ہے۔

    یورپی یونین کے سفیر کا کہنا تھا کہ پاک ایران گیس منصوبے پر یورپی یونین کو اعتراض نہیں، پاکستان میں ترقی و استحکام کے خواہاں ہیں۔

    عمران خان کو پاکستان کا آئندہ وزیراعظم نامزد کردیا گیا


    چیئرمین تحریکِ انصاف کی جانب سے یورپی یونین سفیر کا خیر مقدم کیا گیا، عمران خان نے مبارک باد اور نیک تمناؤں کے اظہار پر یورپی یونین کے سفیر کا شکریہ بھی ادا کیا۔

    پی ٹی آئی اعلامیے کے مطابق یورپی یونین کے سفیر کے ساتھ ملاقات میں تحریکِ انصاف کے رہنما اسد عمر، شاہ محمود قریشی اور ڈاکٹر شہزاد وسیم بھی شریک تھے۔

    واضح رہے کہ پاکستان تحریکِ انصاف اور اتحادی جماعتوں نے آج چیئرمین عمران خان کو اسلام آباد کے ایک ہوٹل میں منعقد ہونے والی پارلیمانی پارٹی اجلاس میں وزارتِ عظمیٰ کے منصب کے لیے امیدوار نامزد کردیا ہے۔


    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو  زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • چین میں پھنسے پاکستانیوں کو واپس لانے والا طیارہ لاہور پہنچ گیا

    چین میں پھنسے پاکستانیوں کو واپس لانے والا طیارہ لاہور پہنچ گیا

    لاہور: انتظار کی گھڑیاں ختم ہوگئیں، چین میں پھنسے 214 پاکستانیوں کو وطن واپس لانے والا شاہین ایئر لائن کا طیارہ لاہور میں لینڈ کر گیا۔

    تفصیلات کے مطابق چین کے شہر گوانگزو میں 8 روز سے پھنسے دو سو سے زائد پاکستانی وطن واپس خیریت کے ساتھ پہنچ گئے، مسافروں کو واپس لانے والا شاہین ایئر کا طیارہ لاہور ایئر پورٹ پر اتر گیا۔

    ایک ہفتے سے زائد پریشانیوں میں گھرے پاکستانی شہری چین میں اس وقت شدید مشکلات کا شکار ہوگئے تھے جب شاہین ایئر لائنز نے 29 جولائی کو گوانگزو سے وطن واپسی کی فلائٹ اچانک منسوخ کر دی تھی۔

    نجی ایئر لائن کی بد انتظامی پر چیف جسٹس آف پاکستان میاں ثاقب نثار نے از خود نوٹس لیتے ہوئے متعلقہ اداروں کے سربراہان سے جواب طلب کیا تھا اور مسافروں کو فوری لانے کے انتظامات کا حکم بھی دے دیا تھا۔

    واضح رہے کہ چین میں پھنسے پاکستانیوں کو شاہین ایئر لائن اور سول ایوی ایشن میں تنازع کے باعث پریشانیاں اٹھانی پڑیں، پاکستان سِول ایوی ایشن نے ڈیڑھ ارب روپے کے واجبات کی عدم ادائیگی پر شاہین ایئر کا فلائٹ آپریشن معطل کر رکھا ہے۔

    چین میں پھنسے پاکستانیوں کو لانے کے لیے طیارہ آج رات روانہ ہوگا

    سی اے اے کے ترجمان نے کہا تھا کہ شاہین ایئر لائن کا لاہور میں کھڑا طیارہ ان فٹ ہے جسے چین بھجوانے کی اجازت نہیں دی جا سکتی، جس پر شاہین ایئر نے سی اے اے کی منظور شدہ چارٹرڈ طیارے کا بندوبست کرنے کا عندیہ دے دیا تھا۔

    خیال رہے کہ چین میں پھنسے کچھ پاکستانیوں کے ویزے بھی ختم ہو گئے تھے، کچھ مسافروں نے ایئر پورٹ اور کچھ نے ہوٹل میں رات گزاری، پریشان کن صورتِ حال پر پاکستانیوں نے گوانگزو میں ہوٹل کے باہر پلے کارڈز اٹھا کر احتجاج بھی کیا۔


    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو  زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • عمران خان کو آج وزارتِ عظمیٰ کے لیے نامزد کیا جائے گا، نو منتخب ارکان اسمبلی کا اہم اجلاس طلب

    عمران خان کو آج وزارتِ عظمیٰ کے لیے نامزد کیا جائے گا، نو منتخب ارکان اسمبلی کا اہم اجلاس طلب

    اسلام آباد: پاکستان تحریکِ انصاف کی پارلیمانی پارٹی کی جانب سے چیئرمین عمران خان کو آج  وزارتِ عظمیٰ کے منصب کے لیے بہ طور امیدوار نامزد کیا جائے گا۔

    تفصیلات کے مطابق کپتان ملک کی باگ ڈور سنبھالنے کے لیے تیار ہوگئے ہیں، بہ طور وزیرِ اعظم نامزدگی کا اعلان آج ہوگا، عمران خان نے نو منتخب ارکان اسمبلی کا اہم اجلاس طلب کر لیا ہے، جس میں چیئرمین پی ٹی آئی عمران خان کو وزیراعظم کا امیدوار نامزد کیا جائے گا۔

    بنی گالہ میں منعقد ہونے والے اہم اجلاس میں حکومت سازی سے متعلق امور پر مشاورت ہوگی، ترجمان پی ٹی آئی کا کہنا ہے کہ قومی اسمبلی کے174ارکان کی حمایت حاصل ہوگئی ہے،اجلاس میں پنجاب اور پختونخوا کے وزرائے اعلیٰ کی نامزدگی کا اعلان بھی متوقع ہے۔

    خیال رہے کہ پی ٹی آئی کے نائب کپتان بھی عارف علوی کے ساتھ اسپیکر قومی اسمبلی کی دوڑ میں شامل ہو گئے ہیں، شاہ محمود قریشی کو عمران خان نے اسپیکر بننے کی تجویز پیش کر دی۔

    واضح رہے کہ عام انتخابات میں واضح اکثریت کے بعد تحریک انصاف وفاق میں حکومت سازی کے لیے مصروف ہے اور اس سلسلے میں اسے آزاد امیدواروں سمیت ایم کیوایم اور (ق) لیگ کی حمایت بھی مل چکی ہے۔

    عمران خان کی شاہ محمود قریشی کو اسپیکر بننے کی تجویز

    دوسری طرف تحریکِ انصاف کے ترجمان نے کہا ہے کہ حکومت کرنا پھولوں کی سیج نہیں کانٹوں کا بستر ہے، عمران خان نے بتا دیا ہے کہ وزیر ہوں یا گورنر کوئی گورنر ہاؤس میں نہیں رہےگا۔

    وفاق میں مطلوبہ اکثریت اور سندھ میں ٹف ٹائم


    دریں اثنا وفاق اور پنجاب میں پی ٹی آئی نے آزاد ارکان اور اتحادیوں کو ملاکر مطلوبہ اکثریت حاصل کرلی ہے، جب کہ کپتان مخالف اتحاد دیکھتا رہ گیا۔

    تحریکِ انصاف کا پنجاب اسمبلی میں 186 ارکان کی حمایت کا دعویٰ

    وفاق میں خواتین اور اقلیتی نشستوں سمیت 174 ارکان پی ٹی آئی کو ووٹ دینے کے لیے تیار ہو چکے ہیں، جب کہ تختِ لاہور پر راج کے لیے بھی تحریکِ انصاف کو 186 ارکان کی حمایت حاصل ہوگئی ہے۔

    دوسری طرف سندھ میں پی ٹی آئی نے حکومت کو ٹف ٹائم دینے کا فیصلہ کر لیا ہے، شیڈو کابینہ بنا کر وزرا کی کارکردگی پر نظر رکھی جائے گی۔


    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • عمران خان کی شاہ محمود قریشی کو اسپیکر بننے کی تجویز

    عمران خان کی شاہ محمود قریشی کو اسپیکر بننے کی تجویز

    اسلام آباد: پاکستان تحریکِ انصاف کے سینئر رہنما شاہ محمود قریشی قومی اسمبلی میں اسپیکر شپ کی دوڑ میں شامل ہوگئے، چیئرمین عمران خان نے انھیں اسپیکر بننے کی تجویز دے دی۔

    تفصیلات کے مطابق ملک کے وزارتِ خارجہ کے منصب کے لیے معذرت کرنے والے پی ٹی آئی لیڈر شاہ محمود کو اسپیکر قومی اسمبلی کی پیش کش ہوگئی ہے۔

    ذرائع کا کہنا ہے کہ شاہ محمود قریشی ضمنی انتخابات میں حصہ لے کر وزیرِ اعلیٰ پنجاب کے منصب کے خواہش مند ہیں، تاہم پی ٹی آئی چیئرمین کی جانب سے اسپیکر شپ کے لیے پیش کش کے بعد یہ ظاہر ہو رہا ہے کہ وہ وزارتِ اعلیٰ کے لیے زیرِ غور نہیں ہیں۔

    دوسری طرف عارف علوی بھی قومی اسمبلی میں اسپیکر شپ کے مضبوط امیدوار سمجھے جا رہے ہیں، ذرائع پی ٹی آئی کا کہنا ہے شاہ محمود بھی اب اس دوڑ میں شامل ہو چکے ہیں۔

    ہمارے نمبر پورے ہیں حکومت بنانے کی پوزیشن میں آچکے ہیں: شاہ محمود قریشی

    واضح رہے کہ عمران خان کی جانب سے کل بنی گالہ میں اہم ترین اجلاس طلب کیا گیا ہے جس میں حکومت سازی سے متعلق ابھی تک زیرِ التویٰ فیصلے جاری کیے جانے کا قومی امکان ہے۔

    واضح رہے کہ چند دن قبل شاہ محمود قریشی نے کہا تھا کہ عمران خان عوام کے وزیرِ اعظم بن کر سامنے آ رہے ہیں، مرکز میں پی ٹی آئی مکمل طور پر مطمئن ہے، نمبر پورے کیے جا چکے ہیں اور تحریکِ انصاف حکومت بنانے کی پوزیشن میں ہے۔


    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • ملک کے چیلنجز بڑے ہیں لیکن لیڈر بھی بڑا ہے، فواد چوہدری

    ملک کے چیلنجز بڑے ہیں لیکن لیڈر بھی بڑا ہے، فواد چوہدری

    اسلام آباد: پاکستان تحریکِ انصاف کے ترجمان فواد چوہدری کا کہنا ہے کہ ہم جانتے ہیں ملک کے سامنے درپیش چیلنجز بڑے ہیں لیکن ہمارا لیڈر بھی بڑا ہے۔

    ان خیالات کا اظہار انھوں نے اسلام آباد میں میڈیا سے گفتگو کرتے ہوئے کیا، ان کا کہنا تھا کہ عمران خان کی حکومت سے پاکستان میں نئے دور کا آغاز ہوگا۔

    فواد چوہدری نے کہا ’پی ٹی آئی کا منشور اور 100 دن کا پلان ملک کے حالات بدل دے گا، نئے پاکستان میں میرٹ کی حکمرانی ہوگی۔‘

    پی ٹی آئی رہنما نے مزید کہا کہ تحریکِ انصاف ملک میں عام آدمی کے لیے کام کرے گی، عمران خان کے پاکستان میں کرپٹ عناصر کا کڑا احتساب ہوگا۔

    مولانا فضل الرحمان ایک کلو گوشت کیلئے پوری بھینس ذبح کرنا چاہتے ہیں، فواد چوہدری

    فواد چوہدری نے کہا ’عمران خان ملک کو ترقی کے راہ پر گام زن کرے گا، عمران خان کی کام یابی پر قوم کا خوشیاں منانا کپتان پر اعتماد کو ظاہر کرتا ہے۔‘

    واضح رہے کہ گزشتہ روز فواد چوہدری نے کہا تھا کہ منی لانڈرنگ پر سخت پالیسی بنے گی جسے دنیا کا تعاون حاصل ہوگا، حکومت پھولوں کی سیج نہیں کانٹوں کا بستر ہے، مولانا فضل الرحمان اپنے ایک کلو گوشت کےلئے پوری بھینس ذبح کرنا چاہتے ہیں۔


    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • مولانا فضل الرحمان 13 سال بعد وزرا کالونی چھوڑنے پر مجبور

    مولانا فضل الرحمان 13 سال بعد وزرا کالونی چھوڑنے پر مجبور

    اسلام آباد: جمعیت علمائے اسلام (ف) کے سربراہ مولانا فضل الرحمان کو آخر کار 13 سال بعد وزرا کالونی چھوڑنی پڑ گئی، وہ وفاقی وزیر نہ ہوتے ہوئے بھی مراعات لے رہے تھے۔

    تفصیلات کے مطابق متحدہ مجلس عمل کے صدر تیرہ سال تک وزرا کالونی میں رہائش کے مزے لوٹنے کے بعد آخر کار ان سے منہ موڑنے پر مجبور ہو گئے۔

    وزرا کالونی میں مولانا فضل الرحمان کی رہائش اور بغیرعہدہ مراعات استعمال کرنے کا معاملہ اے آر وائی نیوز نے اٹھایا تھا، آج مولانا فضل الرحمان کی وزرا کالونی کی رہائش کے تمام واجبات بھی ادا کر دیے گئے۔

    مولانا فضل الرحمان کو بہ طور چیئرمین کشمیر کمیٹی وفاقی وزیر جیسی مراعات حاصل تھیں، انتخابات 2018 میں اپنے 2 حلقوں میں شکست کے بعد انھوں نے بنگلہ نمبر 22 چھوڑنے کا فیصلہ کیا۔

    مولانا فضل الرحمان ہار کر بھی اقتدار کے مزے لوٹنے میں مصروف

    وزرا کالونی کی رہائش چھوڑنے کے بعد جے یو آئی (ف) کے سربراہ نے اپنا ڈیرہ سینیٹر طلحہ محمود کے فارم ہاؤس میں جما لیا ہے۔

    واضح رہے کہ اے آر وائی نیوز نے 29 جولائی کو یہ معاملہ اٹھایا تھا اور کہا تھا کہ ایک دینی جماعت کے سربراہ ہونے کے باوجود مولانا نے نہ تو پروٹوکول واپس کیا نہ سرکاری گھر، وہ پارلیمنٹ لاجز بھی چھوڑنے کے لیے تیار دکھائی نہیں دے رہے۔

    مولانا فضل الرحمان نے آرمی چیف کے بیان سے اپنی مرضی کا مطلب نکال لیا

    اپنی مستحکم سیٹیں ہارنے کے بعد اور دیگر سیاسی جماعتوں کی طرف سے اسمبلیوں میں بیٹھنے کے معاملے میں انھیں اکیلا چھوڑنے پر مولانا فضل الرحمان کئی تنازعات میں الجھ گئے تھے جن میں سے ایک آرمی چیف کے بیان سے غلط مطلب نکالنے والا معاملہ بھی شامل ہے۔


    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • امریکی رکن کانگریس شیلا جیکسن کا عمران خان کو ٹیلی فون، انتخابات میں کام یابی پر مبارک باد

    امریکی رکن کانگریس شیلا جیکسن کا عمران خان کو ٹیلی فون، انتخابات میں کام یابی پر مبارک باد

    واشنگٹن: امریکی کانگریس کی سینئر رکن شیلا جیکسن لی نے پاکستان تحریکِ انصاف کے چیئرمین عمران خان کو ٹیلی فون کرکے انتخابات میں کام یابی پر مبارک باد دی۔

    تفصیلات کے مطابق خاتون رکن کانگریس نے عمران خان سے ٹیلی فونک رابطہ کر کے کام یابی پر مبارک باد دی، انھوں نے فون پر تحریکِ انصاف کی حکومت کے لیے نیک تمناؤں کا بھی اظہار کیا۔

    امریکی رکن کانگریس نے نئی حکومت کو اپنی بھرپور حمایت کا یقین دلاتے ہوئے کہا کہ ان کی طرف سے عمران خان کی حکومت کو ہر ممکن تعاون فراہم کیا جائے گا۔

    شیلا جیکسن لی نے پاکستان میں حکومت سازی مکمل ہونے کے بعد امریکی وفد کے ہم راہ پاکستان کے دورے کا بھی عندیہ دیا۔

    چیئرمین تحریکِ انصاف نے رکن کانگریس کی جانب سے تہنیتی پیغام پر شیلا جیکسن لی کا شکریہ ادا کیا، عمران خان نے امریکی رکن کانگریس کے دورۂ پاکستان کے پروگرام کا خیر مقدم کیا۔

    امریکی کانگریس ارکان کی عمران خان کو مبارکباد


    واضح رہے کہ آج امریکی کانگریس کے متعدد ارکان نے عمران خان کو الیکشن جتینے پر مبارک باد دیتے ہوئے توقع ظاہر کی ہے کہ وہ پاک امریکا تعلقات کو بہتر بنانے میں اہم کردار ادا کریں گے۔

    ان کا کہنا تھا کہ عمران خان قوم کا درد رکھتےہیں، عمران خان کے امریکا میں بہت سے دوست اور خیر خواہ ہیں، وہ جمہوری اقدار پر یقین رکھتے ہیں۔


    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • قومی جدوجہد میں پولیس کے شانہ بشانہ کھڑے ہیں، آرمی چیف

    قومی جدوجہد میں پولیس کے شانہ بشانہ کھڑے ہیں، آرمی چیف

    راولپنڈی: پاک فوج کے سربراہ جنرل قمر جاوید باجوہ نے یومِ شہدائے پولیس کے موقع پر اپنے پیغام میں کہا ہے کہ فوج قومی جدوجہد میں پولیس کے شانہ بشانہ کھڑی ہے۔

    تفصیلات کے مطابق پاک فوج کے شعبہ تعلقاتِ عامہ (آئی ایس پی آر) کے ڈائریکٹر جنرل میجر جنرل آصف غفور کی طرف سے جاری ہونے والے ٹویٹ میں کہا گیا ہے کہ آرمی چیف نے یوم شہدا کے موقع پر پولیس کے شہدا کو خراج عقیدت پیش کیا۔

    آرمی چیف نے کہا ہے کہ پولیس نے دہشت گردی کے خاتمے کے لیے بے پناہ قربانیاں دی ہیں، دہشت گردی کے خلاف جنگ میں پولیس نے بھرپور کردار ادا کیا۔

    جنرل قمر جاوید باجوہ کا کہنا تھا کہ شہدا ہی ہمارے اصل ہیرو ہیں، ہم انھیں سلام پیش کرتے ہیں، انھوں نے مزید کہا کہ دہشت گردی کو شکست دینے میں پولیس کا کردار نمایاں رہا۔

    ملک بھرمیں یوم شہدائے پولیس آج منایا جارہا ہے


    واضح رہے کہ وطن کی خاطر اپنی جانوں کا نذرانہ پیش کرنے والے پولیس افسران اور اہل کاروں کو خراجِ عقیدت پیش کرنے کے لیے ملک بھر میں آج یومِِ شہدائے پولیس منایا جا رہا ہے۔


    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔