ARYNews.tv | Urdu – Har Lamha Bakhabar

Tag: پاکستان کی خبریں

  • پیٹرولیم مصنوعات میں ہوش ربا اضافے کے بعد نگراں حکومت نے قیمتوں میں کمی کردی

    پیٹرولیم مصنوعات میں ہوش ربا اضافے کے بعد نگراں حکومت نے قیمتوں میں کمی کردی

    اسلام آباد: نگراں حکومت نے پیٹرولیم مصنوعات میں رواں ماہ کی پہلی تاریخ کو ہوش ربا اضافے کے بعد آج قیمتوں میں کمی کرنے کا اعلان کر دیا ہے۔

    تفصیلات کے مطابق پیٹرول 4 روپے 26 پیسے فی لیٹر سستا کر دیا گیا، جب کہ ہائی اسپیڈ ڈیزل 6 روپے37 پیسے فی لیٹر سستا کر دیا گیا۔

    حکام وزارت خزانہ کے مطابق مٹی کا تیل 3 روپے 74 پیسے اور لائٹ ڈیزل 5 روپے 54 پیسے سستا کر دیا گیا، پیٹرولیم مصنوعات کی قیمتوں میں کمی کا اطلاق آج رات 12 بجے سے ہوگا۔

    نگراں حکومت نے پیٹرول اور مٹی کے تیل پر ٹیکس کی شرح بھی 17 سے 12 فی صد کرنے کا فیصلہ کر لیا ہے، جب کہ ہائی اسپیڈ ڈیزل میں سیلز ٹیکس کی شرح 31 سے 24 فی صد اور لائٹ ڈیزل پر سیلز ٹیکس کی شرح 17 سے 9 فی صد کر دی گئی ہے۔

    نگراں حکومت کے وزیر اطلاعات علی ظفر نے کہا ہے کہ نگراں حکومت عوامی شکایت سے متعلق مکمل آگاہ ہے، پیٹرولیم مصنوعات کی قیمتوں میں کمی سے معاشی پہیا تیزی سے چلے گا۔

    پیٹرول کی قیمت میں ایک بار پھر اضافہ، سو روپے لیٹر تک جا پہنچا

    نگراں وزیر اطلاعات کا مزید کہنا تھا کہ قیمتوں میں کمی سے حکومت کو 10 ارب کا نقصان ہوگا، تاہم حکومت کو عوامی پریشانیوں کا ادراک ہے۔

    واضح رہے کہ نگراں حکومت نے آتے ہی ایک ہی ماہ میں دو مرتبہ پیٹرولیم مصنوعات کی قیمتوں میں اضافہ کیا، وزارتِ خزانہ کی جانب سے سمری منظور ہونے کے بعد پیٹرول کی قیمت میں 7 روپے 54 پیسے اضافے سے پیٹرول 99.50 پیسے فی لیٹر ہوگیا تھا۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • میثاقِ جمہوریت کے نام پر ن لیگ اور پیپلز پارٹی نے چارٹر آف مک مکا کیا، عمران خان

    میثاقِ جمہوریت کے نام پر ن لیگ اور پیپلز پارٹی نے چارٹر آف مک مکا کیا، عمران خان

    کوہاٹ: پاکستان تحریک انصاف کے چیئرمین عمران خان کا کہنا ہے کہ میثاق جمہوریت کے نام پر ن لیگ اور پیپلز پارٹی نے چارٹر آف مک مکا کیا۔

    ان خیالات کا اظہار وہ کوہاٹ میں پی ٹی آئی کے جلسے سے خطاب کرتے ہوئے کر رہے تھے، کہا فضل الرحمان ہر حکومت میں شامل ہو جاتا ہے، ان کا اقتدار سے باہر رہنا ایسے ہے جیسے مچھلی کا پانی کے بغیر رہنا لیکن لگ رہا ہے اس بار مچھلی کو پانی نہیں ملے گا۔

    عمران خان نے کہا مغربی ممالک میں انصاف کا نظام ہے، وہاں چور کو پروٹوکول نہیں دیا جاتا، ن لیگ اور پیپلز پارٹی نے 10 سال میں ملک کو تباہ کر دیا ہے، 22 سال پہلے کہا تھا ملک کا سب سے بڑا مسئلہ کرپشن ہے۔

    انھوں نے کہا کہ کرپشن ملک کو کم زور اور اداروں کو تباہ کر دیتی ہے، پاکستان پر آج 27 ہزار ارب کا قرضہ ہے، حکومت میں آ کر سب سے پہلے کرپشن پر قابو پاؤں گا۔

    عمران خان کا کہنا تھا کہ اقتدار میں آ کر سادگی اپنائیں گے اور پہل خود سے کروں گا، ایف بی آر کو ٹھیک کر کے پیسا اکھٹا کریں گے، 4 ہزار سے 8 ہزار ارب روپیا ٹیکس اکھٹا کر کے دکھاؤں گا، یہ اکھٹا کر لیا تو قرضے لینے کی ضرورت نہیں ہوگی۔

    نواز شریف کو اللہ نے جتنے مواقع دیے، اتنے کسی اور لیڈر کو نہیں ملے: عمران خان

    قبل ازیں کوہاٹ میں جلسہ گاہ پہنچنے پر عوام نے پی ٹی آئی رہنما کا شان دار استقبال کیا، انھوں نے کہا ملک میں بے روزگاری سب سے بڑا مسئلہ ہے، نوجوانوں کو بیرون ملک جانا پڑتا ہے، ہر دوسرے دن مہنگائی میں بھی اضافہ ہو رہا ہے، ہم نوجوانوں کے مستقبل کے لیے جدوجہد کریں گے۔

    عمران خان نے کہا کہ سیاحت کو فروغ دے کر بے روزگاری کا خاتمہ کریں گے، ملک کو اسلامی فلاحی ریاست بنائیں گے، پاکستان کو سوئٹزر لینڈ نہیں بلکہ ادارے سوئٹزر لینڈ جیسے بناؤں گا، نوجوانوں کے لیے ٹیکلنیکل انسٹیٹوٹ بنائیں گے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • انتخابات کے لیے مکمل تعاون فراہم کریں گے، چیئرمین آرمی الیکشن سپورٹ سینٹر

    انتخابات کے لیے مکمل تعاون فراہم کریں گے، چیئرمین آرمی الیکشن سپورٹ سینٹر

    اسلام آباد: آرمی الیکشن سپورٹ سینٹر کے چیئرمین نے کہا ہے کہ ان کی طرف سے انتخابات کے پُر امن انعقاد کے لیے بھرپور تعاون فراہم کیا جائے گا۔

    تفصیلات کے مطابق ملک میں انتخابات 2018 کے پُر امن انعقاد کے سلسلے میں خصوصی طور پر قائم کردہ آرمی الکیشن سپورٹ سینٹر نے الیکشن کمیشن کو اپنے تعاون کا یقین دلایا ہے۔

    اس سلسلے میں چیئرمین آرمی الیکشن سپورٹ سینٹر نے چیف الیکشن کمشنرسے ملاقات بھی کی، ملاقات میں انتخابات میں سیکورٹی انتظامات اور فوج کے تعاون پر بات چیت کی گئی۔

    آرمی الیکشن سپورٹ سینٹر کے چیئرمین نے چیف الیکشن کمشنر سے کہا کہ انتخابات کے لیے مکمل تعاون فراہم کریں گے، ادارہ ملک میں انتخابات کے پُر امن انعقاد کے لیے تیار ہے۔

    چیف الیکشن کمشنر سردار رضا نے پاک فوج کےعزم کو سراہا، انھوں نے کہا صوبائی حکومتیں بھی شفاف الیکشن کے لیے بھرپور تعاون کریں گی۔

    الیکشن 2018 فوج کی نگرانی میں کروائے جائیں گے: ذرائع

    واضح رہے کہ الیکشن کمیشن کی طرف سے کہا جا چکا ہے کہ الیکشن 2018 فوج کی نگرانی میں کروائے جائیں گے۔ بیلٹ پیپرز کی چھپائی اور ترسیل بھی فوج کی نگرانی میں ہوگی۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • ایون فیلڈ ریفرنس: نوازشریف، مریم نواز اور کیپٹن صفدر کو قید کی سزا اور جرمانہ

    ایون فیلڈ ریفرنس: نوازشریف، مریم نواز اور کیپٹن صفدر کو قید کی سزا اور جرمانہ

    اسلام آباد : وفاقی دارالحکومت اسلام آباد میں احتساب عدالت نے سابق وزیراعظم نواز شریف، حسن اور حسین نواز، ان کی صاحبزادی مریم نواز اور داماد کیپٹن (ر) صفدر کے خلاف ایون فیلڈ ریفرنس کا فیصلہ سنادیا۔

    تفصیلات کے مطابق احتساب عدالت  کے جج محمد بشیر نے فیصلہ سناتے ہوئے نواز شریف کو دس سال قید اورجرمانے کی سزا سنادی گئی ہے جبکہ مریم نواز کو سات سال قید مع جرمانہ جبکہ کیپٹن صفدر کو ایک سال قید کی سزا سنادی گئی ہے۔

    فیصلے میں کہا گیا ہے کہ نواز شریف کو آٹھ ملین پاؤنڈ جرمانہ جبکہ مریم نواز کو دو ملین پاؤنڈ جرمانے کا حکم سنایا ہے، ایون فیلڈز فلیٹ  کی قرقی کا بھی حکم صادر کیا گیا ہے۔

    مانسہرہ میں موجود نیب کی ٹیم اور پولیس حکام کو  کیپٹن (ر) صفدر کو حراست میں لینے کا حکم صادر کردیا گیا ہے۔ فیصلے کی روشنی میں کیپٹن صفدر اور مریم نواز الیکشن میں حصہ لینے کے بھی اہل نہیں رہے، دونوں دس سال کے لیے الیکشن میں حصہ لینے سے نا اہل قراردیے گئے ہیں۔

    سینئر اینکر پرسن وسیم بادامی کا کہنا ہے کہ فیصلے پر اپیل کرنے کے لیے نواز شریف اور مریم نواز کو لازمی وطن واپس آنا ہوگا اور کیونکہ اس مقدمے میں ضمانت ممکن نہیں تو انہیں ایئرپورٹ پر ہی گرفتار کیا جائے گا۔ یاد رہے کہ اپیل کرنے کے لیے شریف خاندان ک پاس دس دن کا وقت ہے۔

    سابق وزیراعظم نواز شریف، ان کی صاحبزادی مریم نواز اور داماد کیپٹن (ر) صفدر کے خلاف ایون فیلڈ ریفرنس کا فیصلہ ساڑھے 12 بجے سنانے کا اعلان کیا تھا تاہم پھر اس فیصلے کوساڑھے تین بجے تک موخر کیا گیا تھا۔

    اس سے قبل مسلم لیگ ن کے قائد نوازشریف اور ان کی بیٹی مریم نواز کی جانب سے ایون فیلڈ ریفرنس کا فیصلہ موخر کرنے کی درخواست پر سماعت احتساب عدالت کے جج محمد بشیر نے کی۔ عدالت نے نواز شریف اور مریم نواز کی ایون فیلڈ ریفرنس کا فیصلہ مؤخر کرنے کی درخواست مسترد کردی تھی۔

    آج عدالت میں سماعت کے آغاز پر مریم نواز کے وکیل امجد پرویز نے سماعت کے آغاز پر فیصلہ مؤخرکرنے کی درخواست پردلائل دیتے ہوئے کہا کہ نوازشریف اورمریم نواز اشتہاری نہیں ہیں۔

    سابق وزیراعظم کی صاحبزادی کے وکیل نے کہا کہ 7دن بعد نوازشریف اور مریم نوازعدالت میں پیش ہوجائیں گے جس پر ڈپٹی پراسیکیوٹرنیب سردار مظفر نے کہا کہ محفوظ فیصلہ مؤخرنہیں کیا جاتا۔

    سردارمظفرعباسی نے کہا کہ 3 جولائی کوعدالت نے نوازشریف، مریم نوازکی طلبی کا نوٹس دیا جبکہ نوازشریف، مریم نوازکو6 جولائی کوطلب کیا گیا تھا، ڈپٹی پراسیکیوٹر نیب لاہوررہائش گاہ پر طلبی کا نوٹس بھجوایا لیکن وہ پیش نہیں ہوئے، درخواست ناقابل سماعت قرار دے کر خارج کی جائے۔

    احتساب عدالت نے سابق وزیراعظم نوازشریف، ان کی صاحبزادی مریم اور داماد کیپٹن محمد صفدر کے خلاف درخواست پرفیصلہ محفوظ کیا تھا۔

    وفاقی دارالحکومت اسلام آباد میں فیصلہ سنائے جانے کے موقع پرضلعی انتظامیہ نے رینجرز کو طلب کررکھا ہے، 500 رینجرز اہلکار اور 1400 پولیس اہلکار بھی تعینات ہیں اور احتساب عدالت  جانے والے تمام راستے عام ٹریفک کے لیے بند کردیے گئے ہیں اور اسلام آباد میں دفعہ 144 نافذ ہے۔

    سابق وزیراعظم نواز شریف نے کیس کا فیصلہ مؤخر کرنے کے لیے گزشتہ روز احتساب عدالت میں درخواست بھی دائر کی تھی نواز شریف نے اپیل کی تھی کہ مزید سات دن کی مہلت دی جائے۔

    احتساب عدالت میں فیصلہ مؤخر کرنے کی درخواست کے ساتھ مرکزی ملزم کی اہلیہ کلثوم نواز کی میڈیکل رپورٹ بھی جمع کرا ئی گئی تھی۔

    قانونی ماہرین کا کہنا ہے کہ ذرائع آمدن کے سلسلے میں کیس ثابت ہونے پر شریف فیملی کو چودہ سال قید سمیت پانچ سزائیں ہوسکتی ہیں، قید کے بعد دس سال نا اہلی بھی ہوسکتی ہے، اگر ملزمان عدالت میں پیش نہ بھی ہوں تو فیصلے پر فرق نہیں پڑے گا۔

    شریف خاندان کے خلاف مختلف ریفرنسز کی سماعت کے دوران کئی اہم معاملات سامنے آئے جن میں جعلی فونٹ اور جعلی کاغذات سے لے کر اصلی جائیداد، پاناما، اقامہ اور ایون فیلڈ ریفرنس شامل ہیں۔

    تفصیلی فیصلہ

    ایون فیلڈ ریفرنس میں احتساب عدالت نے تفصیلی فیصلہ جاری کر دیا ہے، جس کے مطابق نوازشریف کو 10 سال قید، 8 ملین پاؤنڈ جرمانے کی سزا، جب جائیداد ضبط کرنے کا حکم سنایا گیا ہے۔ احتساب عدالت نے ایون فیلڈ اپارٹمنٹس کی قرقی کا حکم بھی جاری کر دیا۔

    مریم نواز کو مجموعی طور پر8 سال قید، دو ملین پاؤنڈ جرمانے کی سزا سنائی گئی، جرم کی معاونت میں 7 سال قید، جب کہ مریم نواز کو ایک سال کیلبری فونٹ سے متعلق سزاسنائی گئی۔

    کیپٹن (ر) صفدرکو ایک سال قیدکی سزا سنائی گئی، کیپٹن (ر) صفدرنے بطور گواہ ٹرسٹ ڈیڈ پردستخط کیے تھے، انھوں نے جرم میں مجرمان کی معاونت کی۔

    فیصلے کے مطابق نوازشریف کونیب آرڈیننس شیڈول کی دفعہ 9 اے 5 کے تحت سزاسنائی گئی، مریم نواز کو نیب آرڈیننس سیکشن 9 اے پانچ، سات کے تحت سزا ہوئی۔

    نیب کے شیڈول 2 کے تحت کیپٹن (ر) صفدرکو ایک سال قید کی سزا سنائی گئی، مجرمان پر 10 سال کے لئے عوامی یا سرکاری عہدہ رکھنے پرپابندی عائد کی گئی، مجرمان کسی بینک سے مالی فائدہ نہیں اٹھا سکیں گے۔

    فیصلے کے مطابق حسن اور حسین نواز کو اشتہاری قرار دیا گیا ہے، دائمی وارنٹ گرفتاری جاری کر دیے گئے ہیں۔

    فیصلے کے مطابق مریم نواز کی جانب سے جمع کرائی گئی ٹرسٹ ڈیڈ جعلی قرار دی گئی، پراسیکیویشن اپنا مقدمہ ثابت کرنے میں کامیاب رہی، نوازشریف نے آمدن سے زائد اثاثے بنائے، مگر وہ زائد اثاثہ جات بتانے میں ناکام رہے۔

    ایون فیلڈ ریفرنس کا پس منظر

    خیال رہے کہ گزشتہ سال 28 جولائی کو سپریم کورٹ نے پاناما کیس کی تحقیقات کرنے والی جے آئی ٹی کی رپورٹ کی روشنی میں سابق وزیراعظم نوازشریف کو نا اہل قرار دیا تھا۔

    سپریم کورٹ نے مذکورہ فیصلے کی روشنی میں نیب کو نوازشریف، مریم نواز، حسن ، حسین نواز اور داماد کیپٹن محمد صفدر کے خلاف ریفرنسزدائر کرنے کا حکم دیا تھا جبکہ ان ریفرنسز پر6 ماہ میں فیصلہ سنانے کا بھی حکم دیا تھا۔

    بعدازاں قومی احتساب بیورو نے سابق وزیراعظم نوازشریف ان کے بچوں اور داماد کے خلاف گزشتہ سال 8 ستمبر کو ایون فیلڈ ریفرنس دائر کیا تھا۔

    سابق وزیراعظم کی صاحبزادی مریم نواز اور کیپٹن صفدر پر 19 اکتوبر2017 کو فرد جرم عائد کی گئی تھی جبکہ نوازشریف کی عدم موجودگی پر ان کے نمائندے ظافرخان کے ذریعے فرد جرم عائد کی گئی تھی۔

    احتساب عدالت نے نوازشریف کے بیٹے حسن نواز اور حسین نواز کو اس ریفرنس میں عدم حاضری پراشتہاری قرار دیا تھا۔

    نوازشریف 26 ستمبر2017 کو پہلی بار احتساب عدالت کے سامنے پیش ہوئے تھے جبکہ 9 اکتوبر کو مریم نواز عدالت کے روبرو پیش ہوئی تھیں اور کیپٹن محمد صفدر کو ایئرپورٹ سے گرفتار کرکے عدالت میں پیش کیا گیا تھا۔

    احتساب عدالت کی جانب سے مسلم لیگ ن کے قائد کے 26 اکتوبرکو نا قابل ضمانت وارنٹ گرفتاری جاری کیے گئے تھے جس کے بعد 3 نومبر2017 کو نوازشریف پہلی بار مریم نواز کے ہمراہ عدالت میں پیش ہوئے تھے۔

    سابق وزیراعظم نوازشریف پر8 نومبر2017 کو احتساب عدالت کی جانب سے براہ راست فرد جرم عائد کی گئی تھی۔

    شریف خاندان کے خلاف ریفرنسز کا فیصلہ 6 ماہ میں کرنے کی مدت رواں سال مارچ میں ختم ہوئی تھی تاہم احتساب عدالت کی درخواست پرعدالت عظمیٰ نے نیب ریفرنسز کی ٹرائل کی مدت میں 2 ماہ تک توسیع کردی گئی تھی۔

    احتساب عدالت کی جانب سے مئی میں نیب ریفرنسز کی توسیع شدہ مدت مئی میں ختم ہوئی تو جج محمد بشیر کی جانب سے ٹرائل کی مدت میں مزید توسیع کی درخواست کی گئی تھی۔

    عدالت عظمیٰ نے احتساب عدالت کی درخواست منظور کرتے ہوئے ٹرائل کی مدت میں 9 جون 2018 تک توسیع کی تھی۔

    واضح رہے کہ سپریم کورٹ آف پاکستان نے گزشتہ ماہ 10 جون کو سماعت کے دوران احتساب عدالت کو شریف خاندان کے خلاف نیب ریفرنسزپرایک ماہ میں فیصلہ سنانے کا حکم دیا تھا۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • 25 جولائی کو میڈیا سات بجے سے قبل پولنگ نتائج جاری نہ کرے، الیکشن کمیشن

    25 جولائی کو میڈیا سات بجے سے قبل پولنگ نتائج جاری نہ کرے، الیکشن کمیشن

    اسلام آباد: الیکشن کمیشن آف پاکستان نے میڈیا سے درخواست کی ہے کہ وہ انتخابات والے دن شام سات بجے سے قبل پولنگ کے نتائج جاری نہ کرے۔

    تفصیلات کے مطابق سیکریٹری الیکشن کمیشن نے کہا ہے کہ میڈیا اس بات کو یقینی بنائے کہ پچیس جولائی کو شام سات بجے سے پہلے انتخابات کے نتائج ٹی وی پر آن ایئر نہیں ہوں گے۔

    بابر یعقوب فتح محمد نے کہا ” برائے مہربانی اس بات کو یقینی بنائیں کہ پولنگ والے دن شام سات بجے سے قبل انتخابات کے نتائج جاری نہ ہوں۔“

    یہ درخواست ای سی اپی کے سیکریٹری، چیف الیکشن کمشنر ریٹائرڈ جسٹس سردار محمد رضا اور چیئرمین پاکستان الیکٹرونک میڈیا ریگولیٹری اتھارٹی (پیمرا) محمد بیگ کے مابین ایک ملاقات میں کی گئی۔

    کراچی شہر میں الیکشن کے روز32 ہزار 849 اہلکار تعینات ہوں گے

    پیمرا کے چیئرمین محمد بیگ نے انتخابات منعقد کرانے والے ادارے کو اپنے بھرپور تعاون کی یقین دہانی کرادی، انھوں نے اس موقع پر جسٹس سردار محمد رضا اور ای سی پی سیکریٹری کو میڈیا ضابطۂ اخلاق کے بارے میں بھی آگاہ کیا۔

    خیال رہے کہ پچیس جولائی کو عوام صبح آٹھ بجے سے شام چھ بجے تک ووٹ ڈال سکیں گے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • تحریک انصاف کا مقابلہ خاندانی سیاست سے ہے، عمران خان

    تحریک انصاف کا مقابلہ خاندانی سیاست سے ہے، عمران خان

    چارسدہ: پاکستان تحریک انصاف کے چیئرمین عمران خان نے کہا ہے کہ پی ٹی آئی کا مقابلہ خاندانی سیاست سے ہے، خاندانی سیاست میں میرٹ نہیں جب کہ حقیقی جمہوریت میں لیڈر میرٹ پر آتا ہے۔

    ان خیالات کا اظہار انھوں نے کے پی کے ضلع چارسدہ میں جلسے سے خطاب کرتے ہوئے کیا، انھوں نے کہا باچا خان چارسدہ کا بڑا لیڈر تھا، چارسدہ کے نوجوان مستقبل کے لیڈر ہیں، میں آج آپ کے مستقبل کے لیے یہاں کھڑا ہوں۔

    عمران خان نے کہا چارسدہ میں پی ٹی آئی کا مقابلہ خاندانی سیاست سے ہے، یہاں باپ بیٹا کھڑے ہیں، شیرپاؤ کا بیٹا بھی ہے، مولانا فضل الرحمان کا بیٹا اور بھائی بھی سیاست میں ہیں، جو اقتدار میں آتا ہے فضل الرحمان اس کے ساتھ جڑ جاتا ہے، یہ کیا مذاق بنا لیا گیا ہے۔

    [bs-quote quote=”25 جولائی کو میرے لیے نہیں اپنے مستقبل کے لیے نکلنا ہے، مجھے اللہ سب کچھ دے چکا ہے۔” style=”style-2″ align=”left” author_name=”عمران خان” author_job=”پی ٹی آئی چیئرمین” author_avatar=”https://arynewsudweb.wpengine.com/wp-content/uploads/2018/04/imran-khan-6.jpg”][/bs-quote]

    پی ٹی آئی چیئرمین کا کہنا تھا کہ زرداری کا بیٹا زمین پر ایک کلو میٹر پیدل نہیں چلا اور وزیر اعظم بننے چلا ہے، مریم نواز نے زندگی میں ایک گھنٹہ کام نہیں کیا مگر وزیر اعظم بننا چاہتی ہیں، ان دونوں بے چاروں کو کیا معلوم کہ کسان اور مزدور کس طرح محنت کرتا ہے۔

    انھوں نے کہا کہ رشتے داروں کے سوا ان کے پاس کوئی لیڈر نہیں، یہ کیسی جمہوریت ہے، معاشرہ اوپر اس وقت جاتا ہے جب میرٹ پر معاملات چلتے ہیں، ن لیگ کی مخصوص نشستیں سب رشتے داروں کو دی گئیں ہیں، جمہوریت اس لیے کام یاب نہیں کیوں کہ میرٹ نہیں خاندانی سیاست ہے۔

    عمران خان نے کہا کہ 25 جولائی پاکستان کی تاریخ کا سب سے اہم دن ہے، اللہ قوم کو تقدیر بدلنے کا موقع کبھی کبھی دیتا ہے، 25 جولائی ملک کا رخ بدلنے کا موقع ہے، پی ٹی آئی کےعلاوہ کوئی جماعت کرپشن ختم نہیں کرسکتی، کرپشن کے خلاف اداروں کو مضبوط کریں گے۔

    انھوں نے شرکا کو مخاطب کرتے ہوئے کہا آپ نے 25 جولائی کو میرے لیے نہیں اپنے مستقبل کے لیے نکلنا ہے، مجھے اللہ سب کچھ دے چکا ہے، انشاءاللہ 25 جولائی کو ایک نیا پاکستان دیکھیں گے۔

    عمران خان نے کہا کل عدالتی فیصلہ آ رہا ہے اور نواز شریف لندن سے کہتا ہے فیصلہ مؤخر کردو، وہ قوم کا مجرم ہے، اربوں روپیا چوری کیا، نواز اور زرداری کی جائیدادیں بڑھ گئیں، نیب نے بھی کہا 25 جولائی تک کسی کو نہیں پکڑیں گے، بتائیں کس قانون کے تحت، 25 جولائی کو ان سب کو شکست دینی ہے۔

    پی ٹی آئی چیئرمین نے کہا شہباز شریف کہتا ہے لاہور کو پیرس، کراچی کو لاہور بنادوں گا، لاہور میں بارش ہوئی تو لوگوں کو معلوم ہوا ترقی صرف اشتہاروں میں ہے اور اصل امپائر خدا ہے، شہباز شریف نے بجلی، اسکول و کالج بھی اشتہاروں میں بنائے۔

    [bs-quote quote=”جو اقتدار میں آتا ہے فضل الرحمان اس کے ساتھ جڑ جاتا ہے، بارش ہوئی تو معلوم ہوا شہباز شریف کی لائی ہوئی ترقی صرف اشتہاروں میں ہے” style=”style-13″ align=”center” color=”#97abbf”][/bs-quote]

    عمران خان نے مزید کہا پاکستان کا بچہ بچہ مقروض ہے، عوام حکمرانوں سے پوچھیں قرضے کا پیسا کہاں گیا، دبئی میں پاکستانیوں نے چار سال میں 900 ارب روپے کے گھر خریدے، 10سال میں پاکستان پر قرضہ 6 ہزار سے بڑھ کر 27 ہزار ارب ہو گیا ہے اور ڈالر 60 روپے سے 125 روپے ہو گیا ہے۔

    پی ٹی آئی انتخابی مہم

    پاکستان تحریک انصاف کی انتخابی مہم زور و شور سے جاری ہے، عمران خان کل بھی خیبر پختونخوا میں سیاسی میدان سجائیں گے، کل تیمر گرہ اور سوات کا دورہ کریں گے اور مختلف جلسوں سے خطاب کریں گے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • مسلم لیگ ن نے انتخابی منشور کا اعلان کر دیا: صحت اور تعلیم کے شعبے میں پنجاب میں کی جانے والی اصلاحات ملک بھر میں پھیلانے کا اعلان

    مسلم لیگ ن نے انتخابی منشور کا اعلان کر دیا: صحت اور تعلیم کے شعبے میں پنجاب میں کی جانے والی اصلاحات ملک بھر میں پھیلانے کا اعلان

    لاہور: مسلم لیگ ن نے انتخابی منشور 2018 کا اعلان کر دیا، پارٹی کے صدر شہباز شریف نے منشور پیش کرتے ہوئے صحت اور تعلیم کے شعبے میں پنجاب میں کی جانے والی اصلاحات ملک بھر میں پھیلانے کا اعلان کر دیا۔

    تفصیلات کے مطابق لاہور میں منعقدہ تقریب میں شہباز شریف نے کہا کہ 2013 میں جب ن لیگ بر سرِ اقتدار آئی تو بڑے چیلنجز کا سامنا تھا، لوڈ شیڈنگ اور دہشت گردی جیسے بڑے مسائل سامنے تھے، معیشت تباہ تھی، ہر طرف بے روزگاری تھی، بر آمدات کا برا حال تھا، زرعی و صنعتی شعبے زوال پذیر تھے، ن لیگ نے ان چیلنجز پر کام یابی سے قابو پایا۔

    شہباز شریف نے کہا نیب کو چیلنج کرتا ہوں، عدالت عظمیٰ سے بھی کہتا ہوں، چیک کرے اگر ایک پائی کا بھی ذمہ دار ہوں، جنھوں نے ایک دھیلے کا کام نہیں کیا وہ بڑے بڑے نعرے لگا رہے ہیں، جماعتوں نے 2013 میں جو منشور پیش کیا اس پر کتنا عمل کیا؟ کس پارٹی نے منشور پرعمل کیا یا سیاسی قلابازیاں ہی کھائیں۔

    سابق وزیر اعلیٰ نے کہا کہ ہم نے 5 ہزار میگا واٹ پر دو ڈھائی ارب ڈالر لگائے، توانائی منصوبوں میں قوم کے 160 ارب بچائے، خود روزگار اسکیم پروگرام کے تحت 20 لاکھ افراد کو روزگار ملا، ہمارے منصوبے شفاف ترین تھے، سی پیک بجلی منصوبوں میں چین سرمایہ کاری کر رہا ہے۔

    انھوں نے کہا کراچی سمیت میں ملک بھر میں امن قائم کیا، پنجاب ایجوکیشن انڈوومنٹ فنڈ کے تحت پونے 4 لاکھ بچوں کو وظائف دیے، ہیلتھ کارڈ کا اجرا کیا، 17 اضلاع میں اجرا ہوچکا ہے، پورے ملک تک دائرہ بڑھائیں گے، پنجاب کے تمام اضلاع میں سی ٹی اسکین کی مفت سہولت میسر ہے، اسپتالوں میں 7 ہزار بیڈز کا اضافہ کیا، بے نظیر انکم سپورٹ پروگرام کے فنڈز 40 ارب سے بڑھا کر 120 ارب کیے۔

    منشور 2018

    شہباز شریف نے کہا کہ معاشرے کے محروم طبقے کو پاؤں پر کھڑا کرنا پارٹی منشور کا حصہ ہے، عوامی فلاح کے پروگراموں کا دائرہ ملک بھر میں پھیلائیں گے، پنجاب میں شعبہ صحت میں کی گئی اصلاحات ملک بھرمیں نافذ کریں گے، پیف جیسے انقلابی تعلیمی پروگرام کا دائرہ بھی ملک بھر میں پھیلایا جائے گا، ہر اسکول میں ٹیکنیکل ووکیشنل ٹریننگ سینٹر بنائیں گے۔

    صدر ن لیگ نے منشور پیش کرتے ہوئے کہا تعلیم یافتہ اور ہنرمند طبقے کوروزگار کی فراہمی کے لیے سرمایہ کاری کو فروغ دیں گے، موزوں صنعتوں کا قیام ہمارے منشور کا حصہ ہے، زرعی اجناس کی پراسیسنگ کے لیے انڈسٹریل کمپلیکس تعمیر کریں گے، خنجراب سے گوادر تک ایک نئی دنیا آباد ہو رہی ہے، دیامر بھاشا ڈیم کا بڑا توانائی منصوبہ مکمل کریں گے۔

    شہباز شریف نے کہا زرعی صنعتی انقلاب لائیں گے، ملک بھر کو دنیا کا جدید ترین ٹرانسپورٹ سسٹم دیں گے، پنجاب اسپیڈ کو پاکستان اسپیڈ میں تبدیل کریں گے، محصولات کے نظام کو کرپشن فری بنانے کے لیے جدید ٹیکنالوجی سے منسلک کریں گے۔

    ن لیگ نے کیا دیا؟

    شہباز شریف نے کہا کہ ن لیگ کی حکومت نے کاشت کاروں کو اربوں روپے کے قرضے دیے، ٹیوب ویلز اور کھاد پر کسانوں کو اربوں روپے کی سبسڈی دی، پکیاں سڑکاں، سوکھے پینڈے پروگرام پر 100 ارب خرچ کیے، کسانوں کی منڈیوں تک آسان رسائی کے لیے ہزاروں کلو میٹر روڈ بنائے۔

    اینگری ”ینگ“ مین

    لاہور میں انتخابی منشور کے اعلان کے دوران کارکن کے نعروں پر شہباز شریف برہم ہوگئے، نعرے لگانے پر ڈائس سے اتر گئے، پارٹی رہنماؤں کے اصرار پر شہباز شریف دوبارہ ڈائس پر آگئے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • آئی ایس پی آر کے زیرِ اہتمام ٹوئٹر پر منفرد تصویری مقابلہ

    آئی ایس پی آر کے زیرِ اہتمام ٹوئٹر پر منفرد تصویری مقابلہ

    راولپنڈی: پاک فوج کے شعبہ تعلقات عامہ (آئی ایس پی آر) نے سماجی رابطوں کی ویب سائٹ ٹوئٹر پر ”مثبت پاکستان“ کے عنوان سے ایک منفرد تصویری مقابلہ منعقد کیا۔

    تفصیلات کے مطابق آئی ایس پی آر کی طرف سے منعقدہ تصویری نمائش ”پازیٹو پاکستان“ میں بڑی تعداد میں پاکستانیوں نے جوش و خروش سے شرکت کی۔

    پاکستان کے حسین اور دل فریب نظاروں، افواج پاکستان اور وطن سے محبت پر مبنی تصاویر کے ذریعے ہزاروں پاکستانیوں نے ملک سے محبت کا بھرپور اظہار کیا۔

    آئی ایس پی آر کے مقابلے کی وجہ سے سوشل میڈیا خوب صورت پاکستان کی تصاویر سے سج گیا، سوشل میڈیا کے مثبت استعمال کا عملی مظاہرہ بھی دیکھنے میں آیا۔

    مقابلے کی ٹوئٹ کو گیارہ ہزار سے زائد لائک اور ری ٹوئٹ کیا گیا، جب کہ سات ہزار سے زائد کمنٹ کیے گئے۔

    مثبت پاکستان تصویری نمائش میں 4433 تصویریں بھیجی گئیں، تصاویر ملک کے خوب صورت مقامات کی منظر کشی پر مبنی تھیں۔

    وہ تصاویر جو انعام کے لیے منتخب کی گئیں، ان کی تعداد 4033 تھی، جب کہ چار سو تصاویر کو مقابلے میں شامل نہیں کیا گیا۔

     

    چار نامور بین الاقوامی ریسلرز کی پاکستان آمد، جنرل آصف غفور سے ملاقات

    واضح رہے کہ پاک فوج کے شعبہ تعلقات عامہ کی طرف سے ملک میں کھیلوں کو فروغ دینے کے لیے بھی سرگرمیاں جاری ہیں، گزشتہ روز بین الاقوامی ریسلرز کی آمد کے ساتھ رِنگ آف پاکستان کو سجایا گیا۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • سپریم کورٹ: بھاشا اور مہمند ڈیم کی فوری تعمیر اور کالا باغ کے لیے کمیٹی قائم کرنے کا حکم

    سپریم کورٹ: بھاشا اور مہمند ڈیم کی فوری تعمیر اور کالا باغ کے لیے کمیٹی قائم کرنے کا حکم

    اسلام آباد: سپریم کورٹ آف پاکستان نے ڈیموں کی تعمیر سے متعلق مختصر لیکن تاریخی فیصلہ سناتے ہوئے حکم دیا کہ دیامر بھاشا اور مہمند ڈیم فوری طور پر تعمیر کیے جائیں۔

    اپنے مختصر فیصلے میں عدالتِ عالیہ نے کالا باغ ڈیم کے حوالے سے بھی حکم جاری کرتے ہوئے کہا کہ اس کی تعمیر کے لیے ایک کمیٹی قائم کی جائے۔

    ملک میں ڈیموں کی تعمیر سے متعلق سپریم کورٹ نے تاریخی فیصلہ سنا دیا ہے، عدالت نے حکم دیا کہ حکومت اور متعلقہ ادارے ڈیموں کی تعمیر سے متعلق اقدامات کریں۔

    عدالت نے حکم دیا کہ ڈیموں کی تعمیر کے لیے ایک خصوصی اکاؤنٹ بھی کھولا جائے، فیصلے کے مطابق یہ اکاؤنٹ سپریم کورٹ کے رجسٹرار کے نام پر پر کھولا جائے گا۔

    ڈیموں کی تعمیر کے لیے کھولے جانے والے خصوصی اکاؤنٹ میں عوام عطیات اور فنڈ جمع کراسکیں گے، اس سلسلے میں متعلقہ اداروں کو ہدایت کی گئی ہے کہ عطیات اور فنڈ دینے والوں سے ذرائع آمدن نہ پوچھے جائیں۔ چیف جسٹس آف پاکستان نے پہل کرتے ہوئے ڈیم کی تعمیر کے لیے 10 لاکھ روپے عطیہ کرنے کا اعلان کر دیا۔

    ملک میں 138 ملین ایکڑ فٹ پانی آتا ہے، اسٹوریج کی گنجائش صرف 13.7 ملین ایکڑ فٹ ہے، ارسا

    سپریم کورٹ کی جانب سے ملک میں ڈیموں کی تعمیر کے لیے جاری کیے گئے حکم پر عمل در آمد شروع ہوگیا ہے، اس سلسلے میں ایک کمیٹی بھی تشکیل دے دی گئی، کمیٹی اس امر کی نگرانی کرے گی کہ عدالتی حکم پر عمل در آمد کیا جا رہا ہے یا نہیں۔

    عدالت نے چیئرمین واپڈا کو کمیٹی کا سربراہ مقرر کر دیا ہے، کمیٹی کے دیگر ارکان کا اعلان بعد میں کیا جائے گا۔ یہ فیصلہ چیف جسٹس کی سربراہی میں 4 رکنی بینچ نے سنایا۔ خیال رہے کہ آرٹیکل 184 تین کے تحت سپریم کورٹ کو بنیادی حقوق کے تحفظ کے لیے اختیارات حاصل ہیں۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • ملک میں 138 ملین ایکڑ فٹ پانی آتا ہے، اسٹوریج کی گنجائش صرف 13.7 ملین ایکڑ فٹ ہے، ارسا

    ملک میں 138 ملین ایکڑ فٹ پانی آتا ہے، اسٹوریج کی گنجائش صرف 13.7 ملین ایکڑ فٹ ہے، ارسا

    اسلام آباد: ارسا (انڈس ریور سسٹم اتھارٹی) نے کہا ہے کہ ملک میں 138 ملین ایکڑ فٹ پانی آتا ہے جب کہ ہمارے پاس 13.7 ملین ایکڑ فٹ پانی اسٹوریج کی گنجائش ہے۔

    تفصیلات کے مطابق ڈیموں کی تعمیر سے متعلق سپریم کورٹ میں جاری کیس کی سماعت کے دوران ارسا نے بریفنگ دیتے ہوئے کہا کہ ملک میں دو نئے ڈیم بننے کی ضرورت ہے۔

    ارسا نے سپریم کورٹ کو بریفنگ دیتے ہوئے کہا کہ ملک میں دو نئے ڈیموں کے بننے سے مزید 7 ملین ایکڑ فٹ پانی جمع کرنے کی گنجائش پیدا ہوجائے گی۔

    انڈس ریور سسٹم اتھارٹی کے مطابق ملک کی ضرورت 25 ملین ایکڑ فٹ کی ہے، تاہم فوری طور پر دو ڈیم بننے کے بعد ہر 10 سال بعد نیا ڈیم بننےسے فائدہ ہوگا۔

    ارسا کی طرف سے عدالت کو دی جانے والی بریفنگ میں کہا گیا کہ 1976 میں تربیلہ ڈیم مکمل کیا گیا تھا جس کے بعد پھر نئے ڈیم کی تعمیر شروع ہونی چاہیے تھی لیکن 1990 میں نئے ڈیم بننے کی بات کی گئی، دراصل پانی کا مسئلہ کسی بھی حکومت کی ترجیحات میں شامل نہیں رہا۔

    ارسا کی بریفنگ پر چیف جسٹس ثاقب نثار نے سیکریٹری خزانہ سے استفسار کیا کہ قوم ڈیموں کی تعمیر سے متعلق مدد کرنا چاہتی ہے، کیا قانون ہمیں ڈیمز کے لیے عطیات لینے کی اجازت دیتا ہے؟

    ہم رہیں نہ رہیں، ڈیم ضرور بنے گا، چیف جسٹس

    قبل ازیں ڈیموں کے لیے قرضہ لینے کے سوال پر سیکریٹری خزانہ نے کہا تھا کہ ہم پہلے ہی اندرونی اور بیرونی قرضوں کے نیچے دبے ہوئے ہیں، چیف جسٹس کے استفسار پر انھوں نے کہا کہ آئین کسی مخصوص کام کے لیے اکاؤنٹ کھولنے کی اجازت دیتا ہے۔

    سیکریٹری خزانہ نے عدالت کو بتایا کہ اس وقت سالانہ 170 روپے فی ایکڑ وصول کیا جاتا ہے، زرعی ادویات کی قیمتیں بھی 1900 روپے فی ایکڑ تک پہنچ چکی ہیں، صوبوں کو 1500 روپے فی ایکڑ آبیانہ وصول کرنے کا حکم دیا جائے تو 70 ارب سالانہ جمع ہوں گے جس سے 10 سال بعد نیا ڈیم بنایا جاسکتا ہے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔