Tag: پاکستان کی خبریں

اسلام آباد: وزیر اعظم شہباز شریف کا کہنا ہے کہ عوامی خدمت کے میدان میں سیاست کو شجر ممنوعہ قرار دینا چاہیئے، کوئی حکومت آئے یا جائے، تعلیم اور صحت کے میدان میں سیاست کی اجازت نہیں ہونی چاہیئے۔

تفصیلات کے مطابق وزیر اعظم شہباز شریف نے راولپنڈی انسٹی ٹیوٹ آف یورولوجی اینڈ ٹرانسپلانٹیشن اسپتال کا دورہ کیا۔

وزیر اعظم شہباز شریف کو اسپتال سے متعلق انتظامیہ کی جانب سے بریفنگ دی گئی، بریفنگ میں بتایا گیا کہ اسپتال 255 بستروں پر مشتمل ہے، اسپتال کا ایک فیز تقریباً مکمل ہوچکا ہے، دوسرا فیز دسمبر 2023 میں مکمل ہوگا۔

اسپتال کے دورے کے بعد وزیر اعظم نے میڈیا سے گفتگو کرتے ہوئے کہا کہ آج راولپنڈی یورولوجی سینٹر کا دورہ کیا ہے، اسپتال میں مریضوں کا بہترین طریقے سے علاج کیا جا رہا ہے۔

وزیر اعظم کا کہنا تھا کہ اس اسپتال کی بنیاد میں نے 2009 میں رکھی تھی اور 2013 میں اس کے لیے فنڈز مہیا کیے گئے، راولپنڈی یورولوجی اسپتال میں 5 ارب کے فنڈز لگ چکے ہیں، کرونا کے دور میں بھی اس اسپتال نے بے پناہ خدمات انجام دیں۔

انہوں نے کہا کہ اسپتال میں علاج معالجے کی سہولتوں سے مطمئن ہوں، ثاقب نثار دن رات کہتا تھا شہباز شریف نے 20 ارب روپے کہاں لگائے، یہ غرق ہوگئے، پیسے غرق ہوگئے تھے تو لاہور کا اسپتال کرونا میں اہم مرکز کیسے بن گیا تھا۔

وزیر اعظم نے مزید کہا کہ خدارا ہمیں عوامی خدمت کے میدان میں سیاست کو شجر ممنوعہ قرار دینا چاہیئے، کوئی حکومت آئے یا جائے، تعلیم اور صحت کے میدان میں سیاست کی اجازت نہیں ہونی چاہیئے۔