اسلام آباد: نوجوانوں کی آبادی کے حوالے سے پاکستان دنیا کا پانچواں بڑا ملک بن چکا ہے مگر کیا نوجوان ملکی تعمیر و ترقی میں اپنا کردار بخوبی ادا کر رہے ہیں۔
نوجوانوں کا زیادہ پڑھا لکھا اور فنی تعلیم وتربیت کا حامل ہونا مسابقت کے اس دور میں ملک کو کہیں اونچا مقام مہیا کرتا ہے، یہی وجہ ہے کہ دنیا بھر میں نوجوانوں کی صلاحیتوں سے استفادہ کرنے کی ہر ممکن کوشش کی جاتی ہے۔
نوجوانوں کی آبادی کے تناسب سے پاکستان دنیا کا پانچواں بڑا ملک ہے مگر نوجوانوں سے متعلق بنائی جانے والی قومی پالیسیوں کے فقدان کے باعث نئی نسل کو مشکلات کا سامنا ہے۔
نوجوان طبقہ کے مطابق بیروزگاری، وسائل کی کمی اور سفارش کلچر ان کی اور ملکی ترقی کی راہ میں بڑی رکاوٹ ہے، جس کے باعث وطن عزیز کی تعمیر و ترقی میں فعال کردار ادا کرنے میں ناکام ہیں۔
اقوام متحدہ کے مطابق پاکستان کی مجموعی تناسب میں نوجوانوں کی آبادی کا تنا سب 30.7%ہے، ملک میں نوجوانوں کے معاشی مسائل کو حل کرنے سمیت معیاری تعلیمی سہولت تک ان کی رسائی کو یقینی بنایا جائے تو علاقائی و ملکی امور میں اپنا بھر پور تعمیراتی کردار ادا کر سکتے ہیں۔