22 مئی 1975ء کو پاکستان کی پہلی فلم ’’تیری یاد‘‘ کے ہدایت کار دائود چاند دنیا سے رخصت ہوگئے تھے۔ ہدایت کار کی حیثیت سے داؤد چاند کی بنائی ہوئی یہ فلم ستمبر 1948ء میں ریلیز ہوئی تھی اور اسے قیامِ پاکستان کے بعد یہاں بننے والی اوّلین فلم قرار دیا جاتا ہے۔
دائود چاند کا تعلق بھارت کے صوبے گجرات (کاٹھیا واڑ) سے تھا۔ وہ 1907ء میں پیدا ہوئے تھے۔ عالمِ شباب میں بمبئی اور پھر کلکتہ چلے گئے جہاں اندرا مووی ٹون میں ملازمت اختیار کرلی اور اپنی لگن اور محنت سے پہلے اداکاری اور پھر ہدایت کاری کے شعبے میں مہارت حاصل کی اور فلم انڈسٹری میں اپنی صلاحیتوں کو منوایا۔
انھوں نے فلم سسی پنوں سے ہدایت کاری کا باقاعدہ آغاز کیا۔ اس کے بعد دائود چاند نے چند مزید فلموں کی ہدایت کاری دی اور پھر لاہور چلے آئے۔ قیامِ پاکستان کے بعد جب دیوان سرداری لعل نے ’’تیری یاد‘‘ بنانے کا اعلان کیا تو ہدایت کاری کے لیے دائود چاند کا انتخاب کیا، اس فلم کے بعد داؤد چاند نے ہچکولے، مندری، سسی، مرزاں صاحباں، حاتم، مراد اور دیگر فلمیں بنائیں۔
لاہور میں انتقال کرنے والے دائود چاند مقامی قبرستان میں آسودۂ خاک ہوئے۔
