اسلام آباد : چین کے صدر شی جن پنگ کا جون میں پاکستان آنے کا امکان ہے، چینی صدر کی دورے کی حتمی تاریخوں کا تعین کیا جا رہا ہے، پاکستان اور چینی وزارت خارجہ اس حوالے سے آپس میں رابطے میں ہیں۔
تفصیلات کے مطابق چین کے صدر شی جن پنگ جون میں پاکستان کا دورہ کریں گے، چینی صدر اعلٰی سطح وفد کے ہمراہ پاکستان آئیں گے ، دفتر خارجہ ذرائع کا کہنا ہے کہ چینی صدر شی جن پنگ کا دورہ انتہائی اہم نوعیت کا ہوگا، صدر کی دورے کی حتمی تاریخوں کا تعین کیا جا رہا ہے، اس سلسلے میں پاکستان اور چینی وزارت خارجہ اس حوالے سے آپس میں رابطے میں ہیں۔
شی جن پنگ کے دورے کے دوران دونوں ممالک میں اہم معاہدوں پر دستخط اور سرمایہ کاری میں مزید اضافہ متوقع ہیں، عمران خان نے دورہ چین کے دوران شی جن پنگ کو پاکستان آنے کی دعوت دی تھی۔
یاد رہے وزیراعظم عمران خان نے چینی صدر سے رابطہ کرکے چینی عوام کی مدد کے لیے پاکستانی ڈاکٹرز، فیلڈ اسپتال بھجوانے کی پیشکش کی تھی اور کہا تھا کہ پاکستانی حکومت، عوام کرونا وائرس کے خاتمے کے لیے چین کےساتھ ہے، کرونا وائرس کے بعد چین کے فوری، مؤثر اقدامات کو دنیا بھر میں سراہاگیا، چین وائرس پر قابو پانے میں کامیاب ہوگا۔
مزید پڑھیں : وزیراعظم کی چینی عوام کی مدد کے لیے پاکستانی ڈاکٹرز بھیجنے کی پیشکش
چینی صدر نے مشکل کی گھڑی میں پاکستان کی جانب سے حمایت پر اظہار تشکر کرتے ہوئے کہا تھا کہ چین کرونا وائرس کے خلاف بروقت اور تیز ترین اقدامات کر رہا ہے، چینی عوام کرونا وائرس کے خلاف جنگ میں فتح حاصل کریں گے۔
شی جن پنگ کا کہنا تھا کہ پاکستانی طلبہ کی اپنے شہری کی طرح دیکھ بھال اور علاج کیا جا رہا ہے، پاکستانی طلبا کی حفاظت،صحت اور فلاح یقینی بنانے کے لیے اقدامات کیے ہیں۔
چینی صدر نے اقتصادی شراکت داری کو نئی جہتوں تک لے جانے کے عزم کا اعادہ کرتے ہوئے کہا تھا کہ سی پیک پاک چین اقتصادی شراکت داری کا محور ہوگا۔
