وزیرستان سے تعلق رکھنے والے رضوان محسود نے اپنی غیر معمولی مہارت اور عزم سے دنیا کو حیران کر دیا ہے۔
مکس مارشل آرٹ کا شوقین یہ پاکستانی بچہ ہیروز آف پاکستان میں سے ایک ہے، جس نے یہ شوق بہت کم عمری سے پالا، رضوان کا کہنا ہے کہ وہ سر عرفان کی ویڈیو دیکھ کر بہت متاثر ہوئے تھے، اور تبھی سے وہ مکس مارشل آرٹ سیکھنا چاہتا تھا۔
رضوان محسود کی کامیابی کا سفر ناقابل یقین ہے، اس نے اپنے کوچ کی ویڈیو سے متاثر ہونے کے بعد گنیز ورلڈ ریکارڈز کے حصول کے لیے کوششیں تیز کر دیں۔
رضوان محسود نے غیر متزلزل حوصلے اور عزم کے ساتھ خود کو مختلف کھیلوں میں ریکارڈ توڑنے کے لیے وقف کر دیا، اس نے سب سے پہلے کے پی میں ایم ایم اے چیمپئن شپ جیتی، صوبائی سطح پر اس نے کک باکسنگ میں گولڈ میڈل حاصل کیا۔
رضوان نے جمناسٹک میں بھی صوبائی سطح کے مقابلوں میں حصہ لیا، رضوان جس کلب میں تربیت حاصل کر رہا ہے اس کے پاس 100 گنیز ورلڈ ریکارڈز ہیں، اور کوچ عرفان محسود خود 82 ریکارڈز بنا چکے ہیں۔
