اسلام آباد : آئندہ مالی سال کا بجٹ کل پیش کیا جائے گا، جس میں دفاع کیلئے 950 ارب تک مختص کرنے کا امکان ہے۔
زرائع کے مطابق اگلے مالی سال میں دفاعی بجٹ کیلئے 950ارب روپے مختص کیے جانے کا امکان ہے، آپریشن رد الفساد اور آپریشنل اپ گریڈنگ کے تناظر میں اضافہ کیا جارہا ہے، نئے مالی سال میں دفاعی بجٹ میں 10سے 12فیصد اضافہ کیا جائے گا۔
وزارت دفاع نے دفاعی بجٹ میں ایک سو چالیس ارب روپے اضافے کا مطالبہ کیا تھا، رواں مالی سال کا دفاع کیلئے 860 ارب روپے مختص کئے گئے تھے، رواں مالی سال بھی دفاعی اخراجات مختص رقم سے40ارب زائد رہنے کا امکان ہے۔
ذرائع کا کہنا ہے کہ رواں مالی سال دفاع کی مد میں اخراجات 9سو ارب روپے تک پہنچ جائیں گے ، نئے مالی سال میں 450 ارب روپے فراہم کئے جانے کاامکان ہے، پاک فوج کو رواں مالی سال کے دوران 409 ارب روپے ملے تھے۔
نئے مالی سال میں پاک فضائیہ کو 200ارب روپے ملنے کا امکان ہے جبکہ پاک فضایہ کیلئے رواں مالی سال 182 ارب روپے مختص کئے گئے تھے۔
پاک بحریہ نے نئے مالی سال میں 100ارب روپے کا مطالبہ کیا جبکہ پاک بحریہ کو رواں مالی سال 93 ارب روپے ملے تھے۔
