آسٹریلیا کے بعد بنگلہ دیش سے ہوم ٹیسٹ سیریز میں وائٹ واش کی شرمناک شکست کے بعد سابق کرکٹر نے پیشگوئی کی ہے کہ شان مسعود کپتان برقرار نہیں رہیں گے۔
بنگلہ دیش نے دو ٹیسٹ میچوں کی سیریز میں پاکستان کو اس کی سر زمین پر ہی پچھاڑ دیا اور غیر ملکی سر زمین پر پہلی بار کسی مخالف کو ٹیسٹ سیریز میں وائٹ واش کرنے کا سنگ میل عبور کیا۔
اس شکست کے ساتھ ہی پاکستان ٹیسٹ ٹیم کے کپتان شان مسعود جن پر پہلے ٹیسٹ میچ کی پہلی اننگ 448 رنز 6 کھلاڑی آؤٹ پر ڈکلیئر کرنے پر تنقید کی جا رہی تھی اب یہ سلسلہ دراز ہو گیا ہے۔
سابق ٹیسٹ کرکٹر اور موجودہ تجزیہ کار بابر اعظم نے اے آر وائی نیوز کے پروگرام الیونتھ آور میں گفتگو کرتے ہوئے پیشگوئی کی ہے کہ شان مسعود پاکستان ٹیسٹ ٹیم کے کپتان برقرار نہیں رہیں گے۔
باسط علی نے کہا کہ شان مسعود کی دونوں ٹیسٹ میچز میں بطورکپتان کارکردگی اچھی نہیں تھی۔ محمد رضوان موجود ہیں، تو شان مسعود کو کپتان بنانے کی ضرورت نہیں تھی۔
سابق بلے باز نے کہا کہ کپتان کے فیصلے میدان میں نظر آنے چاہئیں کہ وہ کس قسم کے فیصلے کر رہا ہے۔ کپتان کی وہ اتھارٹی نظر ہی نہیں آ رہی، وہ بولرز کو پلان ہی نہیں دے پا رہے۔ جب کپتان کی سوچ اور کھلاڑیوں میں ہم آہنگی نہیں ہو گی تو پھر ایسی ہی کارکردگی ہو گی۔
پاکستان کو ہوم ٹیسٹ سیریز میں تاریخی شکست، بنگلہ دیش نے پہلی بار وائٹ واش کر دیا
ان کا کہنا تھا کہ بد قسمتی سے ہماری کرکٹ گرتی جا رہی ہے، لیکن پاکستان ٹیم کا تھنک ٹیم کیا سوچ رہا ہے، یہ پتہ ہی نہیں لگتا۔ ہمارے کھلاڑیوں کی فٹنس بھی نہیں ہے۔
واضح رہے کہ شان مسعود کو گزشتہ سال ون ڈے ورلڈ کپ میں ناکامی پر بابر اعظم کی جانب سے مستعفی ہونے کے بعد ٹیسٹ ٹیم کا کپتان مقرر کیا گیا تھا۔
شان مسعود کی قیادت میں پاکستان نے پہلے آسٹریلیا میں تین ٹیسٹ میچوں کی سیریز تین صفر سے ہاری اور اب ہوم گراؤنڈ پر اپنے سے کمزور ٹیم بنگلہ دیش سے پہلی بار وائٹ واش کی ہزیمت پائی۔
