Tag: پاک افغان تعلقات

پشاور: وزیر اعلیٰ کے پی محمود خان اور وزیر اعظم کے مشیر ارباب شہزاد نے طور خم بارڈر کا دورہ کیا جہاں انھوں نے پاک افغان سرحد 24 گھنٹے آمد و رفت کے لیے کھلی رکھنے کے انتظامات کا جائزہ لیا۔

تفصیلات کے مطابق خیبر پختون خوا کے وزیر اعلیٰ نے مشیر وزیر اعظم ارباب شہزاد کے ہم راہ طور خم بارڈر پر 24 گھنٹے آپریشنز شروع کرنے کی تیاریوں کا جائزہ لیا، انھیں اس سلسلے میں تفصیلی بریفنگ بھی دی گئی۔

وزیر اعلیٰ محمود خان نے اس موقع پر کہا کہ بارڈر کھلا رکھنے سے پاک افغان سرحد پر تجارت کو فروغ ملے گا۔

انھوں نے کہا کہ سرحد کھلی رکھنے کے عمل میں سہولت فراہم کرنے کے لیے صوبائی حکومت نے 79 ملین روپے فراہم کیے ہیں، بارڈر کھلنا دونوں ممالک کے درمیان ٹرانزٹ اور ٹریڈ بڑھانے کی طرف اہم پیش رفت ہے۔

وزیر اعظم کے مشیر کا کہنا تھا کہ 24 کھنٹے سرحد کھلی رکھنے کے لیے افغان حکومت بھی خواہش مند ہے، سرحد 24 گھنٹے کھلی رکھنے کے لیے ایف آئی اے اور دیگر اداروں کی وسعت کار بڑھا دی گئی ہے۔

مشیر ارباب شہزاد کا یہ بھی کہنا تھا کہ صوبائی حکومت نے اپنے مینڈیٹ سے بڑھ کر اس سلسلے میں مدد کی ہے۔

قبل ازیں، وزیر اعلیٰ کو بریفنگ میں بتایا گیا کہ دونوں اطراف کاؤنٹرز کی تعداد 16 سے بڑھا کر 24 کر دی گئی ہے، ایمیگریشن اور کسٹم حکام کی تعداد بھی بڑھا دی گئی ہے۔

دریں اثنا، وزیر اعلیٰ کے پی کے نے عوام کے لیے پیدل راہ داری کو بہتر بنانے کی ہدایت کی۔

اسلام آباد: وزیر اعظم عمران خان اور افغان صدر اشرف غنی کی ملاقات کا اعلامیہ جاری کر دیا گیا، جس میں کہا گیا ہے کہ دونوں رہنماؤں نے ملاقات میں دوستی کے نئے باب کے آغاز پر اتفاق کیا۔

تفصیلات کے مطابق وزیر اعظم اور افغان صدر کے درمیان ہونے والی ملاقات کے اعلامیے میں کہا گیا ہے کہ خطے میں امن و استحکام اور خوش حالی کے لے مثبت اقدامات کیے جائیں گے، نیز دونوں ممالک میں عوام کی بہتری کے لیے تعاون بڑھانے پر اتفاق کیا گیا۔

اعلامیے کے مطابق دونوں ممالک نے توانائی سے جڑے منصوبوں کی جلد تکمیل اور دو طرفہ تجارت کے لیے مشترکہ اقتصادی کمیشن کی خدمات لینے پر اتفاق کیا، یہ بھی کہا گیا کہ کاسا 1000، تاپی گیس منصوبے سے اقتصادی سرگرمیوں کو فروغ ملے گا، اور دونوں ممالک کے درمیان اقتصادی، کمرشل رابطے بڑھائیں جائیں گے۔

دونوں رہنماؤں نے خطے کی مجموعی صورت حال پر بھی تبادلۂ خیال کیا، وزیر اعظم نے جنوبی ایشیا میں امن، ترقی اور خوش حالی کا وژن پیش کیا، اور کہا پاکستان پُر امن ہم سائیگی کے وژن پر یقین رکھتا ہے اور افغانستان کے ساتھ معیاری تعلقات کا خواہاں ہے۔

یہ بھی پڑھیں:  افغان صدراشرف غنی پاکستان پہنچ گئے

وزیر اعظم نے افغان امن عمل میں بھرپور حمایت جاری رکھنے کے عزم کا بھی اعادہ کیا اور کہا کہ افغانستان میں دہائیوں کے تنازعے کا حل پُر امن مذاکرات میں ہے، افغان امن کے لیے پاکستان نے مذاکراتی عمل کا ساتھ دیا، پاکستان افغانستان کی خود مختاری اور سالمیت کا احترام کرتا ہے اور مشکل وقت میں افغان عوام کے ساتھ کھرا ہوگا۔

اعلامیے کے مطابق وزیر اعظم نے افغانستان میں سیاسی، تجارتی اور معاشی مضبوطی کی خواہش کا اظہار کرتے ہوئے کہا پاکستان افغانستان میں امن اور جمہوریت چاہتا ہے، دونوں ممالک کے درمیان عوامی رابطوں کا فروغ ضروری ہے، افغانستان میں پائیدار امن اقتصادی طور پر فائدہ مند ہے۔

دریں اثنا دونوں رہنماؤں نے ملاقات میں دو طرفہ تجارت، ٹرانزٹ ٹریڈ رابطے بڑھانے کے لیے مشترکہ کوششوں کا عزم دہرایا۔

اسلام آباد: پڑوسی ملک افغانستان کے صدر اشرف غنی رواں ہفتے پاکستان کا دورہ کریں گے، وہ 2 روزہ دورے پر پاکستان آئیں گے۔

تفصیلات کے مطابق افغان صدر اشرف غنی رواں ہفتے 2 روزہ دورے پر پاکستان پہنچیں گے، ذرایع کا کہنا ہے کہ افغان صدر 27 جون کو سرکاری دورے پر پاکستان آئیں گے۔

صدر اشرف غنی دورۂ پاکستان کے دوران وزیر اعظم عمران خان اور دیگر اعلیٰ حکام سے ملاقات کریں گے۔

ذرایع کے مطابق افغان صدر لاہور کی بادشاہی مسجد میں نماز جمعہ بھی ادا کریں گے، یاد رہے کہ اشرف غنی وزیر اعظم عمران خان کی دعوت پر پاکستان آ رہے ہیں۔

یہ بھی پڑھیں:  افغان صدر اشرف غنی کا پاکستان کا دورہ کرنے کا اعلان

وزیر اعظم عمران خان نے گزشتہ ماہ ٹیلی فونک گفتگو میں افغان صدر اشرف غنی کو دورۂ پاکستان کی دعوت دی تھی۔

یاد رہے کہ افغان صدر اشرف غنی نے پاکستان کے دورے کا اعلان رواں ماہ کے آغاز میں کیا تھا، دونوں رہنماؤں کی سعودی عرب میں ہونے والے او آئی سی اجلاس میں ملاقات بھی ہوئی، افغان صدر نے ملاقات کو مثبت قرار دیا تھا۔

انھوں نے عمران خان سے ہونے والی ملاقات کو تعمیری قرار دیتے ہوئے کہا تھا کہ وہ عمران خان سے اگلی ملاقات 27 جون کو اسلام آباد میں کریں گے، توقع ہے دورۂ پاکستان سے تعلقات بہتر ہوں گے۔

اسلام آباد: امریکی نمائندہ خصوصی زلمے خلیل زاد کے دورۂ پاکستان سے متعلق امریکی سفارت خانے نے اعلامیہ جاری کر دیا ہے۔

تفصیلات کے مطابق اعلامیے میں کہا گیا ہے کہ امریکی نمائندہ خصوصی نے 2 جون کو افغان مفاہمتی عمل کے تحت پاکستان کا دورہ کیا۔

اعلامیے میں کہا گیا ہے کہ زلمے خلیل زاد اور ایڈیشنل سیکریٹری آفتاب کھوکھر نے مذاکرات میں حصہ لیا، امریکی نمائندہ خصوصی نے افغان امن عمل میں پیش رفت اور آیندہ کے لائحۂ عمل سے آگاہ کیا۔

زلمے خلیل زاد نے کہا کہ انھوں نے پاک افغان تعلقات کی بہتری پر بات کی اور کہا کہ پاکستان سے مزید مثبت ممکنہ تبدیلیوں پر بھی بات ہوئی۔

یہ بھی پڑھیں:  زلمے خلیل زاد کی وزیر اعظم سے ملاقات طے کرانے کے لیے امریکی حکام سرگرم

انھوں نے کہا کہ امریکا افٖغان امن عمل میں پاکستان کے کردار کا معترف ہے، پاک افغان بہتر تعلقات دیرپا امن کے لیے نا گزیر ہیں، امریکا وسیع تر پاک افغان تعاون میں ہر ممکن تعاون کو تیار ہے۔

یاد رہے کہ افغان مفاہمتی عمل کی کام یابی کے سلسلے میں امریکی نمائندہ خصوصی زلمے خلیل زاد کل اسلام آباد پہنچے تھے، دوسری طرف ذرایع کا کہنا تھا کہ امریکی حکام ان کی ملاقات وزیر اعظم عمران خان سے کرانے کے لیے سرگرم ہو گئے ہیں تاہم شیڈول میں نہ ہونے کے سبب یہ ملاقات نہیں ہو سکی۔

اسلام آباد: شمالی وزیرستان میں سیکورٹی اہل کاروں پر حملے کے واقعے پر پاکستان نے افغان ناظم الامور کو دفتر خارجہ طلب کر کے شدید احتجاج کیا۔

تفصیلات کے مطابق پاکستان نے سرحد پار سے حملے میں 3 جوانوں کی شہادت پر افغانستان سے شدید احتجاج کیا، افغان ناظم الامور کو دفتر خارجہ طلب کر کے احتجاج ریکارڈ کرایا گیا۔

دفتر خارجہ کے مطابق افغان ناظم الامور کی طلبی ایڈیشنل سیکریٹری کی طرف سے کی گئی، ترجمان دفتر خارجہ نے بتایا کہ حملے میں 3 سیکورٹی اہل کار شہید اور 7 زخمی ہوئے۔

ترجمان کا کہنا تھا کہ 80 دہشت گردوں نے افغان ضلع گیان، برمل سے سرحد عبور کی، دہشت گردوں نے سرحدی باڑ لگانے والے اہل کاروں پر حملہ کیا، پاکستان کی جوابی کارروائی کے بعد دہشت گرد واپس افغانستان فرار ہوئے۔

ڈاکٹر فیصل نے بتایا کہ دہشت گرد افغانستان کی طرف سیکورٹی نہ ہونے کی وجہ سے فرار میں کام یاب ہوئے، پاکستان اس دہشت گرد حملے کی بھرپور مذمت کرتا ہے۔

یہ بھی پڑھیں:  سرحد پر باڑ لگانے والی پاک فوج کی ٹیم پر افغان علاقے سے حملہ ، 3 جوان شہید،7 زخمی

انھوں نے کہا کہ افغانستان اپنی طرف موجود دہشت گردوں کے خلاف بھرپور کارروائی کرے، امید کرتے ہیں افغانستان ایسے انتظامات کرے گا کہ آئندہ ایسے حملے نہ ہوں۔

خیال رہے کہ آج شمالی وزیرستان میں سرحد پر باڑ لگانے والی پاک فوج کی ٹیم پر سرحد پار سے حملہ کے نتیجے میں پاک فوج کے 3 جوان شہید اور 7 زخمی ہوئے ہیں۔