Tag: پاک افغان سرحد

  • پاک افغان سرحد سے خوارج کی دراندازی ناکام، 5 مبینہ خودکش حملہ آور گرفتار

    پاک افغان سرحد سے خوارج کی دراندازی ناکام، 5 مبینہ خودکش حملہ آور گرفتار

    راولپنڈی : سیکیورٹی فورسز نے پاک افغان سرحد سے خوارج کی دراندازی کی کوشش ناکام بناتے ہوئے 5 مبینہ خودکش حملہ آوروں کو گرفتار کرلیا۔

    تفصیلات کے مطابق پاک افغان سرحد سے خوارج کی دراندازی ناکام بناتے ہوئے 5 مبینہ خودکش حملہ آوروں کو گرفتار کرلیا گیا۔

    سیکیورٹی ذرائع نے بتایا کہ 17 جولائی شام 5 بجے خوارج نے پاک افغان سرحدسےدراندازی کی کوشش کی ، جس پر سکیورٹی فورسز نے اطلاع ملتے ہی 5 مختلف مقامات پر ناکہ بندی کی۔

    ذرائع کا کہنا تھا کہ شام 6 بجکر25 منٹ پر خوارج سرحد سے پاکستانی حدودمیں داخل ہوئے اور دراندازی کے بعد خوارج نے عزیز خیل ، منڈی خیل کی سمت پیش قدمی کی، سیکیورٹی فورسز کی موجودگی کے باعث خوارج نے بیسی خیل میں پناہ لی۔

    سیکیورٹی ذرائع نے کہا کہ فورسز کے فوری محاصرے اور بہترین حکمت عملی پر خوارج نے ہتھیار ڈال دیئے، گرفتار خوارج افغان شہری ہیں اور 3 کے پاس افغان شناختی کارڈبھی موجودہے۔

    مزید پڑھیں : پاک افغان بارڈر سے دراندازی کی کوشش ناکام، کارروائی میں 54 خارجی ہلاک

    ذرائع کے مطابق گرفتار خوارج کی عمریں 15 سے 18 سال کے درمیان ہیں تاہم تمام خوارج کو مزید تفتیش کے لیے نا معلوم مقام پر منتقل کردیا گیا ہے اور سیکیورٹی حکام نے سرحدی علاقوں میں سرچ آپریشن جاری رکھا ہوا ہے۔

    ذرائع نے بتایا کہ شمالی وزیرستان میں فورسز نے 25 سے27اپریل کےدوران 71 خوارج ہلاک کئے گئے ، سیکیورٹی فورسز  نے  4جولائی کو بھارتی حمایت یافتہ 30 خوارج ہلاک جبکہ 23 مارچ 2025 کو بھی سرحدی دراندازی کی کوشش پر 16 خوارج ہلاک کئے گئے تھے۔

  • پاک افغان سرحد کے قریب سیکیورٹی فورسز کا کامیاب آپریشن ،  4 اہم دہشت گرد گرفتار

    پاک افغان سرحد کے قریب سیکیورٹی فورسز کا کامیاب آپریشن ، 4 اہم دہشت گرد گرفتار

    راولپنڈی : بلوچستان میں پاک افغان سرحد کے قریب سیکیورٹی فورسز نے کامیاب آپریشن کرتے ہوئے 4 اہم دہشت گرد گرفتار کر لئے۔

    تفصیلات کے مطابق 5 مارچ 2025 کو بلوچستان میں پاک افغان سرحد کے قریبی علاقے ٹوبہ کاکڑی میں سیکیورٹی فورسز نے کامیاب آپریشن کیا اور اس دوران 4 اہم دہشتگرد گرفتار کر لئے گئے۔

    سیکیورٹی ذرائع نے بتایا کہ گرفتار دہشتگردوں سے کلاشنکوفیں، دستی بم اور دیگر آتشیں اسلحہ برآمد کیا گیا ہے جبکہ دہشت گردوں نے دہشت گردی کی بڑی کارروائی کی منصوبہ بندی کا اعتراف کر لیا ہے۔

    سیکیورٹی ذرائع کا کہنا تھا کہ افغانستان سے دراندازی کے مزید شواہد سامنے آگئے، پاکستان میں دہشت گردی کے واقعات میں افغان دہشتگردوں کے ملوث ہونے میں بتدریج اضافہ ہوا ہے اور افغانستان سے دہشت گردوں کی پاکستان میں دراندازی بڑھنے لگی ہے۔

    ذرائع نے مزید کہا کہ مختلف دہشت گرد تنظیموں کو افغان طالبان کی مکمل حمایت، سہولت کاری اور سر پرستی حاصل ہے۔

    ذرائع کے مطابق دہشت گردوں کے خلاف اس آپریشن کی کامیابی میں مقامی لوگوں نے اہم کردار ادا کیا تاہم گرفتار دہشت گردوں کو مزید تفتیش کیلئے نامعلوم مقام پر منتقل کر دیا گیا ہے۔

    دفاعی ماہرین کا کہنا ہے کہ پاکستان کے بار بار شواہد دینے کے باوجود افغان عبوری حکومت کی خاموشی دراصل دہشت گردوں کی حمایت ہے۔

    دفاعی ماہرین نے بتایا کہ مقامی لوگوں کا دہشت گردوں کے خلاف سیکیورٹی فورسز کے شانہ بشانہ لڑنا خوش آئند امر ہے، پاکستان میں دہشتگردی کی لہر میں اضافے کی بنیادی وجہ افغانستان کی سرزمین پر پنپتی دہشتگرد تنظیمیں ہیں۔

    یاد رہے پہلے بھی کئی افغان دہشت گرد سیکیورٹی فورسز کے ہاتھوں جہنم واصل ہو چکے ہیں، ہلاک افغان دہشتگردوں میں افغان صوبے باغدیس کے گورنر کا بیٹا خارجی بدرالدین بھی شامل تھا۔

    28 فروری 2025 کو ہلاک ہونے والا افغان دہشتگرد مجیب الرحمان افغانستان کی حضرت معاذ بن جبل نیشنل ملٹری اکیڈمی میں کمانڈر تھا۔

    افغانستان دہشتگردوں کی آماجگاہ بن چکا ہے جس پر بین الاقوامی سطح پر فوری کارروائی وقت کی اہم ضرورت ہے، دہشت گردوں کے ساتھ پاکستان میں گھسنے والے زیادہ تر افغان شہری یا تو مارے جاتے ہیں یا پکڑے جاتے ہیں۔

  • سرحد پر سیکیورٹی فورسز کی بڑی کامیابی، افغانستان سے غیرملکی اسلحے کی بڑی کھیپ اسمگل کرنے کی کوشش ناکام

    سرحد پر سیکیورٹی فورسز کی بڑی کامیابی، افغانستان سے غیرملکی اسلحے کی بڑی کھیپ اسمگل کرنے کی کوشش ناکام

    پاک افغان سرحد پر سیکیورٹی فورسز نے افغانستان سے غیر ملکی اسلحے کی بڑی کھیپ پاکستان میں اسمگل کرنے کی کوشش ناکام بنا دی۔

    سیکیورٹی ذرائع نے پاک افغان سرحد پر سیکیورٹی فورسز نے بڑی کارروائی کرتے ہوئے افغانستان سے غیر ملکی اسلحے کی بڑی کھیپ پاکستان میں اسمگل کرنے کی کوشش ناکام بنا دی۔

    ذرائع کے مطابق سیکیورٹی فورسز نے 8 جنوری 2025 کو پاک افغان سرحد سے متصل غلام خان بارڈر ٹرمینل پر اسلحہ بردار ٹرک قبضے میں لیا تھا جس سے جدید ساخت کا غیر ملکی اسلحہ اور میگزین برآمد کر لیے گئے۔

    سیکیورٹی ذرائع کے مطابق 26ایم 16 رائفلیں، ایم16 اور ایم 4 رائفلز کے 292 میگزین شامل ہیں، برآمد اسلحہ کیساتھ 10 ہزار سے زائد گولیاں بھی شامل ہیں، اس کے علاوہ لائٹ مشین گن کی 744گولیاں اور بڑی تعداد میں لنکرز بھی برآمد کر لیے گئے۔

    سیکیورٹی ذرائع کا کہنا ہے کہ برآمد کیا گیا اسلحہ ٹرک میں ڈرائیور کیبن میں خفیہ طور پر چھپایا گیا تھا، افغان ٹرک میں پوشیدہ کمپارٹمنٹس، سامان کی پیکنگ افغانستان میں ہوئی، برآمد ہتھیار،گولہ بارود پاکستان میں دہشتگردی کیلئے استعمال ہونا تھا۔

    ذرائع کے مطابق اس سے پہلے بھی فتنہ الخوارج کے خارجیوں سے غیر ملکی اسلحہ برآمد ہوا، غیر ملکی اسلحہ افغان سرزمین کے پاکستان کیخلاف استعمال ہونے کا ثبوت ہے۔

  • ژوب: پاک افغان سرحد سے در اندازی کی کوشش کرنے والے 5 خوارج مارے گئے

    ژوب: پاک افغان سرحد سے در اندازی کی کوشش کرنے والے 5 خوارج مارے گئے

    سیکیورٹی فورسز نے ژوب میں پاک افغان سرحد کے قریب کامیاب کارروائی کرتے ہوئے دراندازی کی کوشش کرنے والے 5 خوارج مارے گئے۔

    پاک فوج کے شعبہ تعلقات عامہ (آئی ایس پی آر) کے مطابق خوارج کے ایک گروپ کی 18 اور 19 جنوری کی رات پاک افغان سرحد پر ضلع ژوب کے علاقے سمبازہ کے قریب نقل و حرکت دیکھی گئی جس پر سیکیورٹی فورسز نے بروقت کارروائی کرکے دراندازی کی یہ کوشش ناکام بنادی۔

      آئی ایس پی آر کے مطابق سیکیورٹی فورسز کی بروقت کارروائی سے جہاں دراندازی کی یہ کوشش ناکام بنا دی گئی، وہیں 5 خوارج بھی مارے گئے۔

    ترجمان کے مطابق پاکستان بارھا عبوری افغان حکومت سے کہتا رہا ہے کہ وہ سرحد پر اپنی اطراف میں موثر بارڈر مینجمنٹ کو یقینی بنائے، توقع ہے کہ عبوری افغان حکومت اپنی ذمہ داریاں پوری کرے گی اور خوارج کی جانب سے پاکستان کے خلاف دہشت گردی کی کارروائیوں کو جاری رکھنے کے لیے افغان سرزمین کے استعمال سے روکے گی۔

    آئی ایس پی آر کے ترجمان کا کہنا ہے کہ سیکیورٹی فورسز اپنی سرحدوں کو محفوظ بنانے اور ملک سے دہشت گردی کی لعنت کو ختم کرنے کے لیے پرعزم ہیں۔

  • پاکستانی فوج  کا پاک افغان سرحد پر بلااشتعال جارحیت کا منہ توڑ جواب، 16 افغان طالبان ہلاک، 27 زخمی

    پاکستانی فوج کا پاک افغان سرحد پر بلااشتعال جارحیت کا منہ توڑ جواب، 16 افغان طالبان ہلاک، 27 زخمی

    راولپنڈی : پاکستانی فوج کی پاک افغان سرحد سے چیک پوسٹوں پر بلااشتعال فائرنگ پر جوابی کارروائی میں 16 افغان طالبان ہلاک ہوگئے جبکہ 2ٹینک بھی تباہ کردیئے گئے۔

    تفصیلات کے مطابق افغان طالبان کی پاک افغان سرحد پر بلااشتعال جارحیت کا منہ توڑ جواب دیا گیا، سیکیورٹی ذرائع نے بتایا کہ 7ستمبرکی صبح افغان طالبان کی جانب سےبلااشتعال فائرنگ کی گئی، فائرنگ سرحدسےمتصل افغان علاقے پلوسین سے پاکستانی چیک پوسٹوں پرکی گئی۔

    ذرائع کا کہنا تھا کہ افغان طالبان کی جانب سے بڑے ہتھیاروں سے بلااشتعال فائرنگ کی گئی، بلااشتعال فائرنگ کا سلسلہ افغان سائیڈ سے8 اور 9 ستمبرکی شام تک جاری رہا۔

    سیکیورٹی ذرائع نے کہا کہ پاکستان آرمی کی جانب سےافغان سائیڈسےفائرنگ کامنہ توڑجواب دیاگیا، پاکستانی فوج کی جوابی فائرنگ سے افغان طالبان کے بھاری نقصان کی اطلاعات ہے ، اطلاعات کےمطابق اب تک16افغان طالبان ہلاک اور 27 زخمی ہوچکے ہیں۔

    ذرائع کے مطابق منہ توڑجواب میں افغان طالبان کے2ٹینک بھی تباہ کر دیئے گئے، پاک افغان بارڈرپربلااشتعال جارحیت کا منہ توڑ جواب دیا جائےگا۔

  • افغان فورسز کی ایک بار پھر پاکستانی علاقوں پر گولہ باری، 1 شخص شہید ، 15 زخمی

    افغان فورسز کی ایک بار پھر پاکستانی علاقوں پر گولہ باری، 1 شخص شہید ، 15 زخمی

    چمن: افغان فورسز کی جانب سے ایک بار پھر پاکستانی علاقوں پر فائرنگ اور گولہ باری کی گئی ، جس کے نتیجے میں ایک شہری شہید اور 2 بچوں سمیت 15افراد زخمی ہوگئے۔

    تفصیلات کے مطابق چمن پاک افغان سرحد پر فورسز کے درمیان تین دن وقفے کے بعد ایک بار پھر سرحدی تنازعہ پر لڑائی شروع ہوگئی، ۔ افغان فورسز نے ایک بار پھر شہری آبادی کو نشانہ بنایا۔

    چمن میں افغانستان کی حدود سے فائرنگ اور گولہ باری کی گئی، گولہ باری سے ایک شہری شہید جبکہ خواتین اور بچوں سمیت15 زخمی ہو گئے ہیں، جن میں 2 شدید زخمیوں کو کوئٹہ منتقل کیا گیا ہے۔

    پاک افغان سرحد کے قریب متعدد پاکستانی گاؤں اور کسٹم ہاؤس کو خالی کرا لیا گیا ہے، جس میں گلدار باغیچہ، طور پل ، مال روڈ، بارڈر روڈ اور اڈہ کہول شامل ہیں ۔

    علاقے میں شدید دھماکوں کی آوازیں سنائی دے رہی ہیں، جس سے شہریوں میں خوف و ہراس پھیل گیا۔

    ایم ایس ڈسٹرکٹ ہیڈ کوارٹر اسپتال چمن نے اسپتال میں ایمرجنسی نافذ کردی ہے اور تمام عملے کو ڈیوٹی پر طلب کرلیا ہے۔

    یاد رہے گذشتہ ہفتے افغان فورسز نے اچانک چمن میں پاکستانی علاقوں پر گولہ باری شروع کر دی تھی، جس سے 5 پاکستانی شہری شہید اور 17 زخمی ہوگئے تھے۔

    افغان فورسز کے فائر کیے گئے گولے گلدار باغیچہ، بارڈر روڈ اور مال روڈ پر گرے، جس سے شہادتیں ہوئیں تھیں۔

    بعد ازاں پاکستان نے افغان فورسز کی چمن میں شہری آبادی پر بلا اشتعال فائرنگ کی شدید مذمت کرتے ہوئے ملوث ملزمان کیخلاف سخت ترین کارروائی کا مطالبہ کیا تھا۔

  • افغان حکومت فوری طور پر دہشت گردوں کے خلاف کارروائی کرے: دفتر خارجہ

    افغان حکومت فوری طور پر دہشت گردوں کے خلاف کارروائی کرے: دفتر خارجہ

    اسلام آباد: پاک افغان سرحد کی صورتحال پر دفتر خارجہ کا کہنا ہے کہ پچھلے کئی دنوں سے پاکستانی سیکیورٹی فورسز کو نشانہ بنانے کے واقعات میں اضافہ ہوا ہے، افغان حکومت فوری طور پر دہشت گردوں کے خلاف کارروائی کرے۔

    تفصیلات کے مطابق ترجمان دفتر خارجہ نے پاک افغان سرحد کی صورتحال پر ردعمل دیتے ہوئے کہا ہے کہ پچھلے کئی دنوں سے پاکستانی سیکیورٹی فورسز کو نشانہ بنانے کے واقعات میں اضافہ ہوا ہے۔

    دفتر خارجہ کی جانب سے کہا گیا کہ پاکستان نے افغان حکومت سے بار بار سرحد کو محفوظ بنانے کی درخواست کی، دہشت گرد پاکستان میں دہشت گردی کی کارروائیوں میں افغان سرزمین کا استعمال کر رہے ہیں۔ کئی مہینوں سے مؤثر چینل کے ذریعے دونوں ملکوں کی کوآرڈی نیشن جاری ہے۔

    ترجمان کا کہنا ہے کہ بدقسمتی سے کالعدم جماعتوں خصوصاً تحریک طالبان پاکستان نے پاکستانی فورسز پر حملے جاری رکھے ہوئے ہیں، حملوں کے نتیجے میں کئی پاکستانی فورسز کے جوان شہید ہو چکے ہیں۔ 14 اپریل کو 7 پاکستانی فورسز کے جوان شہید ہوئے ہیں۔

    دفتر خارجہ کی جانب سے کہا گیا کہ پاکستان ایک مرتبہ پھر دہشت گردوں کی جانب سے افغان سرزمین استعمال کرنے کی مذمت کرتا ہے، افغان حکومت فوری طور پر دہشت گردی کی کارروائیوں میں ملوث افراد کے خلاف کارروائی کرے۔

    ترجمان کا کہنا تھا کہ دہشت گردوں کے خلاف کارروائی دونوں برادرانہ ممالک کے امن اور ترقی کے لیے ہے، پاکستان افغانستان کی خود مختاری کی عزت کرتا ہے۔

    ترجمان کی جانب سے مزید کہا گیا کہ پاکستان تمام شعبوں میں افغان حکومت کے ساتھ تعاون جاری رکھے گا۔

  • پاکستان اور افغانستان کے مابین سرحدی ٹرمینل بند، پیدل آمد و رفت پر پابندی

    پاکستان اور افغانستان کے مابین سرحدی ٹرمینل بند، پیدل آمد و رفت پر پابندی

    اسلام آباد: این سی او سی نے افغانستان کے ساتھ بارڈر ٹرمینل فوری بند کرنے کا فیصلہ کر لیا ہے۔

    تفصیلات کے مطابق نیشنل کمانڈ اینڈ آپریشن سینٹر (این سی او سی) نے لینڈ بارڈر منیجمنٹ پالیسی پر نظر ثانی کر لی ہے، ذرائع کا کہنا ہے کہ پاکستان افغانستان کے مابین بارڈر ٹرمینل فوری بندکرنے کا فیصلہ ہوا ہے۔

    این سی او سی نے پاک افغان بارڈر ٹرمینل بند کرنے کی منظوری دے دی، بارڈر بندش کا فیصلہ افغانستان میں کرونا وائرس کے پھیلاؤ کے باعث کیا گیا ہے، فیصلے کے مطابق دونوں ممالک کے مابین پیدل آمد و رفت مکمل بند رہے گی۔

    این سی او سی کا کہنا ہے کہ افغانستان میں پہلے سے موجود پاکستانیوں کو واپس آنے کی اجازت ہوگی، تاہم واپس آنے والے پاکستانیوں کو کرونا ٹیسٹ کے بعد آنے کی اجازت ہوگی۔

    این سی او سی کے مراسلے کے مطابق پاکستان میں مقیم افغان شہری پابندی کے باوجود واپس جا سکیں گے، جب کہ میڈیکل ایمرجنسی کی صورت میں افغانستان سے پاکستان آنے کی بھی اجازت ہوگی، تاہم اس صورت میں آمد کرونا ٹیسٹنگ سے مشروط ہوگی۔

    افغانستان اور پاکستان کے مابین ایئر لائن آپریشن کارگو موومنٹ جاری رہے گی، این سی او سی نے فیصلے سے متعلق وزارت خارجہ کو آگاہ کر دیا۔

    واضح رہے کہ پاکستان کی جانب سے افغانستان میں امن مذاکرات کے سلسلے میں ناقابل فراموش کردار ادا کرنے کے باوجود افغان مشیر قومی سلامتی نے پاکستان مخالف بیان جاری کر دیا تھا، جس پر آج دفتر خارجہ کا رد عمل آیا تھا۔

    دفتر خارجہ نے کہا کہ افغان مشیر قومی سلامتی حمداللہ محب کے الزامات کی مذمت کرتے ہیں، افغان امن عمل میں پاکستان کے کردار کو عالمی سطح پر سراہا گیا ہے، زاہد حفیظ نے بیان میں کہا کہ افغان این ایس اے کے الزامات امن عمل کو خراب کرنے کی کوشش ہے۔

    ترجمان نے کہا افغان این ایس اے کو یاد دہانی کراتے ہیں کہ دونوں ملکوں میں ایک فورم موجود ہے، اے پیپس فورم میں طے پایا جا چکا ہے کہ الزام تراشی سےگریز کیا جائے گا۔

  • پاک افغان سرحد پر خواتین کے لیے علیحدہ راستہ مختص

    پاک افغان سرحد پر خواتین کے لیے علیحدہ راستہ مختص

    چمن: پاک افغان سرحد پر خواتین کے لیے علیحدہ راستہ مختص کردیا گیا جس پر کام کا آغاز کردیا گیا ہے، خواتین کے لیے علیحدہ راستہ مقرر کرنا قبائلی مشران اور سیاسی پارٹیوں کا دیرینہ مطالبہ تھا۔

    تفصیلات کے مطابق پاک افغان سرحد پر خواتین کے لیے علیحدہ راستے کے کام کا آغاز ہوگیا، خواتین کے لیے نادرا سے باب دوستی تک 12 فٹ کا راستہ مقرر کیا گیا ہے۔

    اس موقع پر سیاسی پارٹیوں کے رہنماؤں اور قبائلی مشران نے باب دوستی کا دورہ کیا، خواتین کے لیے علیحدہ راستہ مقرر کرنا قبائلی مشران اور سیاسی پارٹیوں کا دیرینہ مطالبہ تھا۔

    قبائلی مشران کا کہنا تھا کہ روایات کے مطابق خواتین کے لیے علیحدہ راستے کا قیام خوش آئند ہے۔

    یاد رہے کہ گزشتہ برس پاک افغان سرحد کے قریب ایک خیمہ بستی قائم کی گئی تھی جہاں افغانستان سے آنے والے پاکستانی شہریوں کو قرنطینہ میں رکھا جارہا تھا۔

    افغانستان سے واپس آنے والے پاکستانیوں میں 17 بچے اور 25 خواتین شامل تھے، بعد ازاں خواتین اور بچوں کو گھروں میں منتقل کردیا گیا تھا۔

  • محرم الحرام میں سیکیورٹی خدشات ، پاک افغان سرحد 2 دن کے لیے بند

    چمن : پاکستان نے محرم الحرام میں سیکیورٹی خدشات کے پیش نظر پاک افغان سرحد کو 2 دن کے لیے بند کر دی، اس دوران ہر قسم کی آمدورفت معطل رہے گی۔

    تفصیلات کے مطابق حکومت پاکستان نے محرم الحرام میں سیکیورٹی انتظامات کرتے ہوئے چمن کے ساتھ پاک افغان بارڈر کو 2 روز کے لیے بند کر دیا ہے۔

    سکیورٹی ذرائع کا کہنا ہے کہ افغان سرحد 9 اور 10 محرام الحرام کو بند رہے گی اور افغانستان کے ساتھ ہر قسم کی دوطرفہ تجارت اور پیدل آمدورفت معطل رہے گی۔

    سرحد کے بندش سے پاک افغان ٹرانزٹ ٹریڈ اور نیٹو سپلائی معطل ہوگئی جبکہ ایف آئی اے کے امیگریشن آفس اور ویزا سیکشن کو بند کر دیا گیا ہے۔

    خیال رہے حضرت امام حسین اور ان کے ساتھیوں کی لازوال قربانی کی یاد میں آج شہر شہرنویں محرم کے جلوس نکالے جا رہے ہیں، اس موقع پرسیکیورٹی کے سخت ترین انتظامات کئے گئے ہیں، جلوس والے راستوں میں موبائل سروس معطل رہے گی۔

    واضح رہے وفاقی حکومت نے ملک بھر میں 9 اور 10 محرم کو عام تعطیل کا اعلان کیا ہے۔