یو اے ای (29 اگست 2025): ٹرائی سیریز کا افتتاحی میچ آج پاکستان اور افغانستان کے درمیان ہوگا پر امن انعقاد کے لیے دونوں شائقین کیلیے الگ الگ انکلوژر بنائے گئے ہیں۔
اے آر وائی نیوز کے مطابق یو اے ای میں ایشیا کپ سے قبل ٹرائی سیریز کا آج سے آغاز ہو رہا ہے۔ شارجہ کے میدان میں ہونے والے افتتاحی میچ میں پاکستان اور افغانستان مدمقابل ہوں گے۔ ماضی کے ناخوشگوار واقعہ کو مدنظر رکھتے ہوئے میچ کے پر امن انعقاد کے لیے دونوں ممالک کے شائقین کے لیے الگ الگ انکلوژر بنائے گئے ہیں۔
شارجہ میں 2022 ایشیا کپ کے سیمی فائنل میں پاکستان سے جیتا ہوا میچ ہارنے کے بعد اپنی ٹیم کی شکست پر افغان شائقین آپے سے ایسے باہر ہوئے کہ ڈنڈوں اور کرسیوں سے پاکستانی فینز پر حملہ کر دیا تھا اور نازیبا جملے کسے تھے، جس کے بعد افغان فینز پر شدید تنقید کی گئی تھی۔
یہ وہ میچ تھا جس میں افغانستان کو تاریخی فتح کے لیے صرف ایک وکٹ درکار تھی لین نسیم شاہ نے مرد بحران کا کردار ادا کرتے ہوئے دو چھکے مار کر نہ صرف پاکستان کو فتح یاب کرایا تھا بلکہ افغان فینز پر بجلیاں بھی گرا دی تھیں۔
یہ پہلا موقع نہیں کہ جب افغان ٹیم نے پاکستانی شائقین پر حملہ کیا ہو۔ اس سے قبل 2019 کے ون ڈے ورلڈ کپ کے دوران پاکستان سے شکست کے بعد افغان شائقین کرکٹ نے پاکستانی ٹیم اور کھلاڑیوں پر حملہ کرنے کی کوشش کی تھی، جس کے بعد پولیس اور سیکیورٹی اہلکاروں کو مداخلت کرنا پڑی تھی۔
افغان پرستاروں نے چیمپئینز ٹرافی کے دوران نیشنل بینک اسٹیڈیم کراچی کی کرسیاں توڑ دی تھیں۔
ان واقعات کو مدنظر رکھتے ہوئے شارجہ انتظامیہ نے میچ کے انعقاد کو پر امن بنانے کے لیے آج اور اگلے پاک افغان میچ کے لیے دونوں ممالک کے شائقین کے لیے الگ الگ انکلوژر بنائے گئے ہیں۔
دوسری جانب بات کی جائے کہ دونوں ٹیموں میں سے کس کا میدان میں پلڑا بھاری ہے تو ٹی 20 فارمیٹ میں گرین شرٹس افغان ٹیم پر حاوی ہیں۔ اب تک کھیلے گئے 6 میچز میں سے قومی ٹیم 4 میں کامیاب رہی ہے۔ شارجہ میں تین دو سے پاکستان کو برتری حاصل ہے۔
تاہم یو اے ای میں پاکستان اور افغانستان کی ٹیمیں جب بھی آمنے سامنے آئی ہیں۔ فینز کو ہائی وولٹیج مقابلے دیکھنے کو ملے ہیں اور اس بار بھی شائقین کو کانٹے دار مقابلے کی امید ہے۔
ٹرائی سیریز کی تیسری ٹیم میزبان یو اے ای ہے۔ تینوں ٹیمیں اس سیریز میں ایشیا کپ کے لیے اپنی تیاریوں کا جائزہ لیں گی۔ ایشیا کپ ٹرائی سیریز کے بعد یو اے ای میں ہی کھیلا جائے گا۔ پہلی بار اس میں 8 ٹیمیں شرکت کر رہی ہیں۔
سیریز کے تمام میچز پاکستانی وقت کے مطابق رات 8 بجے شروع ہوں گے۔
