دبئی: ایشیا کپ 2018 کا ایک اور بڑا مقابلہ آج دبئی کے کرکٹ اسٹیڈیم میں ہوگا، سپر فور مرحلے میں روایتی حریف پاکستان اور بھارت کی ٹیمیں آپس میں ٹکرائیں گی۔
تفصیلات کے مطابق گروپ میچ میں شکست کا بدلہ لینے کے لیے پاکستان ٹیم آج ایک بار پھر اپنے روایتی حریف بھارتی ٹیم کا سامنا کرے گی، زخمی شاہینوں نے بلے بازوں سے امیدیں وابستہ کر لیں۔
دونوں ٹیمیں سپر فور مرحلے میں ایک ایک میچ جیت چکی ہیں، آج کا میچ جیتنے والی ٹیم ٹاپ پر آجائے گی، دبئی اسٹیڈیم میں جیت کے لیے پاکستانی بولنگ اور بھارتی بیٹنگ کی آزمائش ہوگی۔
پاک بھارت ٹاکرے میں آج جیتنے والی ٹیم کی فائنل تک رسائی کی راہ ہموار ہو جائے گی، یہ میچ پاکستانی وقت کے مطابق شام ساڑھے چار بجے شروع ہوگا۔
یاد رہے کہ اب تک دونوں حریف ٹیموں میں ایک ہی میچ کھیلا گیا ہے، قومی ٹیم کو بیٹنگ لائن کی ناکامی کی وجہ سے بھارت کے ہاتھوں شکست کا سامنا کرنا پڑا۔
یہ بھی پڑھیں: پاکستان نےافغانستان کوسنسنی خیزمقابلے کے بعد شکست دیدی
بھارت سے میچ میں پاکستان کو 8 وکٹوں سے شکست ہوئی، پاکستان نے پہلے بیٹنگ کرتے ہوئے 43.1 اوور میں 162 رنز بنائے تھے اور اس کے تمام کھلاڑی آؤٹ ہوئے، بھارت نے دو وکٹوں کے نقصان پر ہدف پورا کیا۔
تاہم سپر فور مرحلے کے پہلے میچ میں پاکستان نے افغانستان کو سنسنی خیز مقابلے کے بعد 3 وکٹوں سے شکست دے کر بیٹنگ پر اپنا اعتماد بحال کر دیا ہے، اس میچ میں شعیب ملک کے 51 رنز کی فتح گر بیٹنگ کے علاوہ امام الحق اور بابر اعظم نے بھی نصف سنچریاں اسکور کیں۔
