Tag: پاک بحریہ

کراچی: پاک بحریہ کے سربراہ ایڈمرل ظفر محمود عباسی نے سعودی عرب میں انٹرنیشنل میری ٹائم فورم میں شرکت کی، نیول چیف نے کمانڈر رائل سعودی نیول فورسز سے بھی خصوصی ملاقات کی۔

تفصیلات کے مطابق پاک بحریہ کے سربراہ ایڈمرل ظفر محمود عباسی سعودی عرب کے سرکاری دورے پر پہنچ گئے۔ نیول چیف نے پہلے سعودی انٹرنیشنل میری ٹائم فورم میں شرکت کی۔

ترجمان پاک بحریہ کے مطابق نیول چیف کو فورم کے دوسرے سیشن کا مہمان اعزازی بنایا گیا۔ ایڈمرل ظفر محمود عباسی نے فورم سے خطاب بھی کیا۔

ترجمان کے مطابق 3 روزہ انٹرنیشنل فورم میں 13 ممالک کی بحری قیادت شرکت کر رہی ہے، فورم کے دوران علاقائی سمندری تحفظ پر بات چیت ہوئی جبکہ سمندری ماحول میں تبدیلی کے اثرات اور میری ٹائم انڈسٹری کو درپیش چیلنجز پر بھی بات ہوئی۔

نیول چیف نے کمانڈر رائل سعودی نیول فورسز سے بھی خصوصی ملاقات کی جبکہ فورم میں شریک دیگر ممالک کے ہم منصبوں سے بھی ملاقاتیں کیں۔

ملاقاتوں میں باہمی دلچسپی کے امور اور دو طرفہ بحری تعاون کے فروغ پر تبادلہ خیال کیا گیا۔ نیول چیف نے سمندری تحفظ اور امن یقینی بنانے کے لیے پاک بحریہ کے عزم کو اجاگر کیا۔

اس سے قبل نیول چیف نے برطانیہ کا سرکاری دورہ کیا تھا۔ اپنے دورہ برطانیہ کے دوران انہوں نے فرسٹ سی لارڈ آف رائل نیوی اور اسسٹنٹ چیف آف دی نیول اسٹاف سے الگ الگ ملاقاتیں کیں۔ ملاقاتوں کے دوران باہمی دلچسپی کے امور اور دو طرفہ بحری تعاون کو فروغ دینے پر تبادلہ خیال کیا گیا۔

نیول چیف کو برطانیہ رائل نیول کالج میڈل بھی تفویض کیا گیا۔ لندن میں انہوں نے اسٹریٹجک راؤنڈ کانفرنس میں شرکت کی اور نیشنل میری ٹائم انفارمیشن سینٹر کا دورہ بھی کیا، جہاں انہیں آپریشنل امور پر بریفنگ دی گئی۔