اسلام آباد: وزیر اعظم نواز شریف سے پاک بحریہ کے سربراہ ایڈمرل محمد ذکا اللہ نے ملاقات کی۔
تفصیلات کے مطابق وزیر اعظم ہاؤس میں وزیر اعظم نواز شریف اور پاک بحریہ کے سربراہ ایڈمرل محمد ذکا اللہ کے درمیان ملاقات ہوئی۔
ترجمان کے مطابق ملاقات میں قومی سلامتی اور پاک بحریہ کے پیشہ ورانہ امور پر تبادلہ خیال کیا گیا۔ ملاقات میں بحری سلامتی سے متعلق امور بھی زیر غور آئے۔
ملاقات میں وزیر اعظم نے ملک کی سمندری حدود کے تحفظ کے لیے پاک بحریہ کے کردار اور کوششوں کو سراہا۔
کراچی: بھارتی بحریہ کی آبدوز پاکستان کے سمندروں میں داخل ہونے کی کوشش کو پاک بحریہ نے بر وقت ردعمل دیتے ہوئے ناکام بنادیا ۔
پاک بحریہ کے ترجمان کے مطابق بھارتی آبدوز نے بین الاقوامی سرحد عبور کرکے پاکستانی سمندر حدود کی خلاف ورزی کرنے کی خفیہ کوشش کی تاہم پاک بحریہ کی بہترین دفاعی تکنیک کسے سبب بھارت کی یہ مذموم سازش ناکام ہوگئی۔
ترجمان کا کہنا ہے کہ پاک بحریہ کے اینٹی سب میرین وار فیئر یونٹ نے بروقت کارروائی کی اور بھارتی آبدوز کی پاکستان میں داخل ہونے کی کوششوں کو ناکام بنادیا۔
انہوں نے مزید کہا کہ پاکستان نیوی نے بھارتی آبدو ز کی نقل وحرکت کو محسوس کرتے ہی بروقت کارروائی کی اور مسلسل تعاقب کرتے ہوئے اسے بھارتی پانیوں میں پچا س ناٹیکل میل اندر دکھیل دیا۔
واضح رہے کہ بھارت کی جانب سےلائن آف کنٹرول پر مسلسل دراندازی کر رہا ہے اور آئے دن اسے وہاں منہ کی کھانی پڑرہی ہے جس کے سبب بھارت نے سمندر ی مقام دراندازی کرنے کی کوشش کی جہاں اسے منہ کی کھانی پڑی۔
ایڈمرل احمد تسنیم نے اے آروائی نیوز سے خصوصی گفتگو کرتے ہوئے کہا ’’ بھارت نے پانی کےنیچے سے کبوتر بھیجا تھا جو کہ ہم نے پکڑلیا‘‘۔
انہوں نے یہ بھی کہا پاک بحریہ اپنے محدود وسائل میں رہتے ہوئے بھارت کو ہرقسم کی محاذ آرائی کا منہ توڑ جواب دینے کی قوت رکھتے ہیں۔
گوادر: بحریہ کے جہازوں کی نگرانی میں گوادر پورٹ پر کارگو جہازوں کی آمدورفت جاری ہے۔ کارگو کنٹینرز جہاز مشرق وسطیٰ اور افریقی ممالک روانہ ہوگئے۔
ترجمان پاک بحریہ کے مطابق آج کارگو کنٹینرز مرچنٹ ویسل کاسکو ویلنگٹن اور الحسین جہاز مشرق وسطیٰ اور افریقی ممالک کی جانب روانہ ہوگئے ہیں۔
ترجمان پاک بحریہ کا مزید کہنا تھا کہ راہداری منصوبے کے بحری راستوں کی حفاظت پاک بحریہ کی اولین ترجیح ہے۔ دفاعی تجزیہ کاروں کا کہنا ہے کہ راہداری منصوبہ نہ صرف ملکی ترقی میں اہم کردار ادا کرے گا بلکہ پاک چین تعلقات میں بہتری لانے کا سبب بھی بنے گا اوراس منصوبے سے نوجوانوں کو روزگار کے مواقع بھی میسر آئیں گے۔
واضح رہے کہ گزشتہ روز وزیر اعظم نواز شریف اور آرمی چیف جنرل راحیل شریف نے منعقدہ تقریب میں پہلے بحری جہاز کی روانگی کا افتتاح کیا تھا جس میں وزیر اعظم کا کہنا تھا کہ اب سی پیک منصوبہ حقیقت کا روپ دھار رہا ہے۔
چینی سفیر نے اس موقع پر کہا کہ پاک چین اقتصادی راہداری سے دونوں ملکوں میں خوشحالی کے نئے دور کا آغاز ہوگا۔ ان کا مزید کہنا تھا کہ سی پیک منصوبہ تمام چینی اور پاکستانی اداروں کی کوشش سے ممکن ہوا ہے۔
اس حوالے سے دفاعی تجزیہ کاروں کا کہنا ہے کہ راہداری منصوبہ پڑوسی ملک کو ایک آنکھ نہیں بھا رہا ہے مگر ہم ہرصورت اس منصوبے کو مکمل کرکے رہیں گے۔
کراچی : چیئرمین جوائنٹ چیف آف اسٹاف کمیٹی جنرل راشد محمود نے کہا ہے کہ پی این ایس حمید موثر دفاع کے لیے پاک بحریہ مستعد ہے اور دشمن کو منہ توڑ جواب دینے کی صلاحیت رکھتی ہے ۔
جنرل راشد محمود نے نیول بیس پی این ایس حمید میں کمیشننگ کی تقریب سے خطاب کرتے ہوئے کہا کہ پی این ایس حمید کی کمیشننگ پر پاک بحریہ مبارکباد کی مستحق ہے یہ نیوی کی آپریشنل صلاحیتوں میں کلیدی اضافہ ہے۔
پاک بحریہ کے ترجمان نے کہا ہے کہ میری ٹائم براڈ کاسٹ سروس اسٹیشن اور نیول بیس پی این ایس حمید کی کمشننگ کی گئی ہے جس کے لیے باقاعدہ ایک تقریب کا انعقاد کیا گیا جس کے چیئرمین جوائنٹ چیفس آف اسٹاف کمیٹی جنرل راشد محمود مہمان خصوصی تھے،سربراہ پاک بحریہ ایڈمرل محمد ذکاءاللہ بھی تقریب میں موجود تھے۔
انہوں نے کہ میری ٹائم براڈ کاسٹنگ سروس اپنی طرز کی پہلی سہولت ہے جس سے زیر آب آپریشنز میں مدد اور وسعت میں اضافہ ہو سکے گا اور یہ سہولت محفوظ ترین عسکری مواصلاتی رابطوں میں معاون ثابت ہو گی کیوں کہ نیول بیس حمید موثر فریکونسی ٹرانسمیشن سے آراستہ ہے۔
کراچی : کمانڈر پاکستان فلیٹ ایڈمرل عارف اللہ نے کہا ہے کہ پاک بحریہ کسی بھی جارحانہ کارروائی کا منہ توڑ جواب دے گی۔
ترجمان پاک بحریہ کے مطابق کمانڈرپاکستان فلیٹ نے کہا ہے کہ جنگی جہازوں پر تعینات افسروں کے حوصلے اور عزم قابل تعریف ہیں۔
ایڈمرل عارف اللہ کا کہنا تھا کہ پاک بحریہ کسی بھی قسم کی جارحیت کا سامنا کرنے کے لیے تیار ہے جس کے لیے بحری سرحدوں ،کریکس اورساحلی علاقوں کی کڑی نگرانی کی جا رہی ہے۔
کمانڈر پاکستان فلیٹ ایڈمرل عارف اللہ کا کہنا تھا کہ پاک بحریہ پیشہ وارانہ لحاظ سے قابل اور با صلاحیت فورس ہے جو دشمن کی جانب سے کی کی گئی کسی بھی قسم کی پیش قدمی کا منہ توڑ جواب دینا جانتی ہے او کسی بھی چیلنج کا مقابلہ کرنے کے لیے ہروقت تیار ہے۔
کمانڈر پاکستان فلیٹ نے مزید کہا کہ بحرہ فوج کے جوانوں کے عزم جواں ہیں گو کہ پاکستان امن پسند ملک ہے اور خطے میں امن و امان کا خواہشمند ہے لیکن اگر کسی نے ہمارے ملک کی سلامتی پر بری نظر ڈالی تو بھرپوقر جواب دینا جانتے ہیں۔
دو روز قبل بھارت کی جانب سے لائن آف کنٹرول کی خلاف ورزی کے بعد پاک بھارت کشیدگی میں اضافے کے بعد ملک کی تینوں فورسز اپنے اپنے محاذ پر سینہ تانے کھڑی ہیں اور کسی بھی جارحیت کا جواب دینے کے لیے مستعد ہیں۔
اسلام آباد چین ساحلی علاقوں کو محفوظ بنانے کے لیے پاکستان کو آٹھ آبدوزیں مہیا کرے گا جن میں سے چارچین میں اور چار پاکستان میں تیار ہوں گی.
تفصیلات کےمطابق جمعے کے روز قومی اسمبلی قائمہ کمیٹی دفاع کے وفد نے چیئرمین شیخ روہیل اصغر کی سربراہی میں نیول ہیڈکوارٹر کا دورہ کیا.
ترجمان پاک بحریہ کے مطابق کمیٹی کے اراکین کو خطے میں موجودہ سیکورٹی چیلنجز اور پاکستان کے میری ٹائم اثاثوں کے تحفظ اور قومی تعمیر میں پاک بحریہ کے کردار پر بریفنگ دی گئی.
کمیٹی کو سی پیک اورگوادر بندر گاہ کی ترقی کے تناظر میں پاکستان نیوی کے ترقیاتی اور اسٹرٹیجک منصوبوں سے بھی آگاہ کیا گیا.
قائمہ کمیٹی دفاع نے سی پیک اورگوادر بندرگاہ کے ترقیاتی منصوبے کے حوالے سے پاکستان نیوی کی اضافی ذمے داریوں کا اعتراف کیا ہے.
قومی اسمبلی سے جاری بیان کے مطابق نیول چیف نے کمیٹی کا نیول ہیڈ کوارٹر آمد پر استقبال کیا،چیف ڈائریکٹر سب میرین نے کمیٹی کو تفصیلی بریفنگ دی.
واضح رہے کہ چین میں بنائی گئی چار آبدوزیں پاکستان نیوی کو 2022-23 میں حوالے کی جائیں گی جبکہ باقی 4 آبدوزیں پاکستان میں کراچی شپ یارڈ میں 2028 تک تیار کی جائیں گی.
کراچی: پاکستان کی جانب سے چینی بحریہ کے سربراہ ایڈمرل ووشینگلی کو نشان امتیاز ملٹری عطا کیا گیا۔
ترجمان پاک بحریہ کے مطابق ایڈمرل ووشینگلی کو پاکستان اور چین کے درمیان دوطرفہ تعلقات اور دونوں ممالک کی بحری افواج کے تعلقات کو مستحکم کرنے کے اعتراف میں نشان امتیاز دیا گیا۔
پاکستان نیوی ڈاکیارڈ میں منعقدہ تقریب میں عبدالقادر بلوچ نے معزز مہمان کو اعزاز تفویض کیا۔
واضح رہے کہ گزشتہ روز چینی بحریہ کے سربراہ ایڈمرل وو شینگلی پاک چیف آف نیول اسٹاف ایڈمرل محمد ذکا ء اللہ کی دعوت پر پاکستان کے سرکاری دورے پر پہنچےتھے۔
چینی بحریہ کے سربراہ ایڈمرل وو شینگلی کی پاکستان نیوی فلیٹ ہیڈ کوارٹرز آمد پر پاک بحریہ کے سربراہ نے ان کا پرتپاک استقبال کیا تھا۔
اس موقع پر پاک بحریہ کی جانب سے ایک چاق و چوبند دستے نے گارڈ آف آنر پیش کیا گیا، ایڈمرل وو شینگلی نے چیف آف نیول اسٹاف سے ملاقات میں پیشہ ورانہ امور پر تفصیلی تبادلہ خیال کیا اورآپریشنل امور پر بریفنگ بھی دی گئی۔
چینی بحریہ کے سربراہ نے خطے کی میری ٹائم سیکیورٹی کے حوالے سے پاک بحریہ کی کاوشوں اور عزم کی تعریف کی۔
کراچی : چینی بحریہ کے سربراہ ایڈمرل وو شینگلی پاک چیف آف نیول اسٹاف ایڈمرل محمد ذکا ء اللہ کی دعوت پر پاکستان کے سرکاری دورے پر پہنچے.
چینی بحریہ کے سربراہ ایڈمرل وو شینگلی کی پاکستان نیوی فلیٹ ہیڈ کوارٹرز آمد پر پاک بحریہ کے سربراہ نے ان کا پرتپاک استقبال کیا۔
اس موقع پر پاک بحریہ کے ایک چاق و چوبند دستے نے گارڈ آف آنر پیش کیا۔ ایڈمرل وو شینگلی نے چیف آف نیول اسٹاف سے ملاقات میں پیشہ ورانہ امور پر تفصیلی تبادلہ خیال کیا اورآپریشنل امور پر بریفنگ بھی دی گئی۔
چینی بحریہ کے سربراہ نے خطے کی میری ٹائم سیکیورٹی کے حوالے سے پاک بحریہ کی کاوشوں اور عزم کی تعریف کی۔
کراچی: پاک بحریہ نے اینٹی شپ میزائل ” ضرب ” کا کامیاب تجربہ کیا ہے ، پاکستان نیوی نے ساحل سے بحری جنگی جہازوں کو مارکرنے والے میزائل ضرب کی کامیاب لانچنگ اور تجربے کے بعد اسے پاک بحریہ میں شامل کر لیا گیا ہے۔
پاک بحریہ کے ترجمان کے مطابق اینٹی شپ میزائل ” ضرب ” کو ساحلی علاقے سے فائر کیا گیا ، جس نے سمندر میں اپنے ٹارگٹ کو کامیابی سے نشانہ بنایا ۔
پاک بحریہ کے سربراہ ایڈمرل ذکاء اللہ نے اس کامیاب تجربے پر ساینسدانوں اور انجینئروں کو مبارکباد دیتے ہوئے کہا کہ میزائل لانچنگ کے اس کامیاب تجربے سے پاکستان نیوی کے جنگی اثاثوں کی صلاحیتوں میں قابل ذکر اضافہ ہو ا ہے ، یہ نیا میزائل سسٹم پاکستان نیوی کی حربی صلاحیتوں میں اضافے کی کاوشوں کا حصہ ہے ۔
چیف آف دی نیول اسٹاف ایڈمرل محمد ذکاء اللہ نے کہا کہ اینٹی شپ میزائل ” ضرب ” کا کامیاب تجربہ پاک نیوی کی حربی تیاریوں پر مہر ِ سند ہے ، جو ملکی بحری سرحدوں کے دفاع کو مزید مضبوط بنانے میں اہم قدم ہے۔
ترجمان کے مطابق نیول چیف اورڈپٹی چیف آف نیول اسٹاف(آپریشنز) نے اس کامیاب تجربے میں شامل تمام لوگوں کی کوششوں کو سراہااور میزائل بیٹری کے عملے کو مبارک باد دی ہے ۔
کراچی : پاک بحریہ کے سربراہ ایڈمرل محمد ذکاء اللہ نے آج پاکستان نیوی وار کالج میں 44ویں پی این اسٹاف کورس کے افسران سے پاکستان کی قومی سلامتی کو درپیش چیلنجز کے موضوع پر خطاب کیا۔
انہوں نے اس بات پر زور دیتے ہوئے کہا کہ قوم کو درپیش متعدد اندرونی اور بیرونی چیلنجز کے باوجود پاک بحریہ پوری طرح سے مسلح اوربھرپور جذبے سے معمور ہے اور ملک کی بحری سرحدو ں کے دفاع کی مکمل صلاحیت رکھتی ہے۔
افسران سے خطاب کرتے ہوئے چیف آف دی نیول اسٹاف نے کہا کہ عالمی منظر نامہ تیزی کے ساتھ مسلسل تبدیل ہورہا ہے۔ آج جبکہ یک قطبی نظام کمزور پڑتا جارہا ہے، متعدد قوتوں کے مراکز تیزی سے اپنی جگہ بنارہے ہیں اور ان کے اثر و رسوخ کا دائرہ وسیع ہوتا جارہا ہے۔
نیول چیف نے کہا کہ گذشتہ کئی دہائیوں سے سمندروں پر دفاعی کنٹرول بڑی قوتوں کے درمیان وسائل ، توانائی اور سیاسی اثرو رسوخ کے حوالے سے پیدا ہوتی ہوئی سیاسی و جغرافیائی صورتحال کے سبب نہایت اہمیت کا حامل ہوگیا ہے۔ بحر ہند کا خطہ غیر علاقائی افواج کی سمندر اور خشکی دونوں پر تقریبا مستقل موجودگی کے باعث نمایاں اہمیت اختیار کرگیا ہے۔
انہوں نے مزید کہا کہ موجودہ صورت حال کے پس منظر میں موجودہ دور کے تجزیہ کار خیال کرتے ہیںکہ اکیسویں صدی میری ٹائم سے متعلقہ صدی کے طور پر جانی جائے گی کہ جہاں دنیا کی تقدیر کا فیصلہ سمندروں پر ہو گا۔
بحری افواج کے ہمہ جہتی عسکری آپریشنز پر روشنی ڈالتے ہوئے ایڈمرل ذکا اللہ نے کہا کہ ان کی اہمیت دونوں خلیجی جنگوں کے دوران جارحانہ آپریشنز، 2011ء میں لیبیاء میں مداخلت کے دورا ن بحری گھیرائو اور حال ہی میں یمن بحران کے دوران شدت پسندوں کی ہتھیاروں تک رسائی ناممکن بنانے کے ذریعے واضح طور پر نمایاں ہوئی۔ ان تمام مثالوں سے ظاہر ہوتا ہے کہ بحری افواج زمینی مسلح جھڑپوں کی صورت میں خشکی پر بغیر قدم رکھے بھی اپنا اثر و رسوخ قائم کرنے کے لیے انتہائی موزوں ہیں۔
قبل ازیں پاکستان نیوی وار کالج آمد پر کمانڈنٹ پی این وار کالج ریئر ایڈمرل عبدالعلیم نے چیف آف دی نیول اسٹاف ایڈمرل محمد ذکاء اللہ کا استقبال کیا۔یہ بات قابل ذکر ہے کہ پاکستان نیوی وار کالج پاکستان اور دوست ممالک کی مسلح افواج کی مستقبل کی قیادت کی تعلیم وتربیت کی بنیادی ذمہ داری کے ساتھ ساتھ پاکستان کے شمالی حصے کے لوگوں خصوصاً پنجاب کے تعلیمی اداروں میں میری ٹائم آگاہی کے فروغ میں اہم کردار ادا کر رہا ہے۔