ARYNews.tv | Urdu – Har Lamha Bakhabar

Tag: پاک بھارت کرکٹ

  • ویڈیو: ’2016 کے بعد اب آنا ہوا‘ پاک بھارت کرکٹ مقابلوں کی کہانی

    ویڈیو: ’2016 کے بعد اب آنا ہوا‘ پاک بھارت کرکٹ مقابلوں کی کہانی

    آئی سی سی کرکٹ ورلڈ کپ کا سب سے بڑا مقابلہ کل ہوگا جس کا انتظار پاکستان بھارت سمیت دنیا بھر کے کرکٹ شائقین کو ہے۔

    اسی موقع پر احمدآباد میں آر جے پراوین نے دونوں ممالک کے میچز کو انتہائی خوبصورتی سے شاعری ’’اس بات کو ایک زمانہ ہوا کیوں کہ  2016 کے بعد اب آنا ہوا‘‘ کی شکل میں پاکستانی کھلاڑیوں کے سامنے پیش کیا۔

     ویڈیو میں دیکھا جاسکتا ہے کہ کپتان بابر اعظم، شاہین آفریدی، محمد نواز، حارث رؤف، حسن علی اور افتخار احمد نے آر جے پراوین کی شاعری کو سراہتے ہوئے پرانی یادوں کو تازہ کیا۔

     احمدآباد میں بھارتی آر جے پراوین نے پاک بھارت مقابلوں کو انتہائی خوبصورتی سے لفظوں میں بیان کیا ہے، جسے انہوں نے پاکستان کرکٹ ٹیم کے کھلاڑیوں بابر اعظم، شاہین آفریدی، محمد نواز ، حارث رؤف، حسن علی اور افتخار احمد کے سامنے پیش کیا۔

    شاعری سننے کے بعد بابر اعظم نے کہا کہ ہر ملک میں کھیلا ہوں، صرف بھارت ہی رہ گیا تھا، اب یہاں آیا ہوں تو اچھی یادیں لے کر جاؤں گا، شاہین شاہ نے کہا کہ آپ نے اس شاعری میں پوری حقیقت بتادی۔

    https://www.youtube.com/watch?v=FjD0JKQPN7g

    واضح رہے کہ پاکستان اور بھارت کےد رمیان میچ 14 اکتوبر کو بھارتی شہر احمد آباد میں کھیلا جائے گا۔

  • دنیا میں دو ہستیاں دیکھیں جو ٹانگ پکڑتی ہیں، میاں داد نے ایک اور راز سے پردہ اٹھا دیا

    دنیا میں دو ہستیاں دیکھیں جو ٹانگ پکڑتی ہیں، میاں داد نے ایک اور راز سے پردہ اٹھا دیا

    کراچی: سابق لیجنڈ کرکٹر جاوید میاں داد نے ایک اور راز سے پردہ اٹھا دیا ہے، اس راز کا تعلق سابق بھارتی اسپنر دلیپ دوشی سے ہے۔

    تفصیلات کے مطابق میاں داد اسٹوریز میں سابق مایہ ناز پاکستانی کرکٹر جاوید میاں داد نے ایک اور ویڈیو شیئر کی ہے، جس میں انھوں نے مشہور واقعے ‘تیرا روم نمبر کیا ہے؟’ سے متعلق وضاحت کی ہے۔

    میاں داد نے بتایا کہ سابق بھارتی اسپنر دلیپ دوشی میرے اچھے دوست تھے، ہم فیملی فرینڈ رہے، ہم نے ساتھ کاؤنٹی کرکٹ کھیلی، انھوں نے ناٹنگھم سے نہایت شائستگی سے کاؤنٹی کرکٹ کھیلی، ہمارا ملنا جلنا بہت تھا، اکثر لوگ پوچھتے ہیں کہ آپ دلیپ دوشی سے میچ کے دوران کیوں بار بار پوچھتے تھے کہ تیرا روم نمبر کیا ہے؟

    میاں داد نے کہا کہ جب بنگلور میں میچ ہو رہا تھا تو ایک تو وہ سنیل گواسکر کی ہدایت پر لیگ سائیڈ پر گیند کرے جا رہے تھے، اور میں پیڈ مارے جا رہا تھا، وکٹ بہت ٹرننگ تھی، اس وقت میں نے سنیل گواسکر سے کہا کہ دنیا میں میں نے دو ہستیاں دیکھیں جو ٹانگ پکڑتی ہیں، ایک تو کتا ٹانگ پکڑتا ہے اور ایک دلیپ نے میری ٹانگ پکڑی ہوئی ہے، جس پر وہ بہت ہنسے تھے۔

    جاوید میاں داد نے تاریخی ورلڈ کپ میں بھارتی کھلاڑی کی نقل کیوں‌ اتاری؟

    میاں داد نے کہا کہ میں دلیپ دوشی سے پوچھا کرتا تھا کہ تیرا روم نمبر کیا ہے؟ دلیپ اور سنیل اس پر پوچھنے لگے کہ یہ روم نمبر کیوں پوچھ رہے ہیں بار بار۔ جب دلیپ نے روم نمبر بتایا تو میں نے کہا دو چار فیلڈر وہاں بھی کھڑے کر لیں، میں اب وہاں ماروں گا گیند۔

    انھوں نے کہا کہ ہمارے درمیان اس طرح کے مذاق چلتے رہتے تھے، انھیں غلط نہیں لینا چاہیے، کیوں کہ پاکستان اور انڈیا کے کھلاڑی ایک وقت میں اتنے قریب آ گئے تھے کہ فیملی جیسے تعلقات بن گئے تھے، بھارت سے میچ دیکھنے آنے والے کہتے تھے کہ ہم اس طرح کی مہمان نوازی نہیں کر سکتے جس طرح پاکستان میں ہمارا خیال رکھا گیا۔ لاہور میں میچ کے دوران لوگوں نے مہمانوں کو اپنے گھروں میں ٹھہرایا تھا کیوں کہ ہوٹل سارے بک تھے، وہ وقت واپس آنا چاہیے۔ بھارتی ٹی وی پر میرا پروگرام چلتا تھا ‘میاں داد آپ کے گھر میں’ کے نام سے۔ میں نے انڈیا میں لوگوں کو بیٹ سائن کر کے دیے، لوگ ہمیں چائے پلاتے تھے، بڑی تعداد میں لوگ ملنے آ جاتے تھے۔ ہم نے بہت اچھا وقت گزارا۔

    خیال رہے کہ راجکوٹ گجرات میں پیدا ہونے والے دلیپ دوشی نے بھارت کی طرف سے صرف 33 ٹیسٹ میچ کھیل کر 114 وکٹیں حاصل کی تھیں، سلو لفٹ آرم لیگ اسپنر دوشی ابھی اور کھیل سکتے تھے مگر اس وقت کے کپتان سنیل گواسکر کے ساتھ ان کے اختلافات جو دورہ پاکستان کے دوران شدت اختیار کر گئے تھے، کی وجہ سے انھیں وقت سے پہلے انٹرنیشنل کرکٹ چھوڑنا پڑی۔

  • پاک بھارت کرکٹ تنازع، آئی سی سی نے بڑا اعلان کردیا

    پاک بھارت کرکٹ تنازع، آئی سی سی نے بڑا اعلان کردیا

    لاہور: انٹرنیشنل کرکٹ کونسل (آئی سی سی) نے پاک بھارت کرکٹ تنازع کو حل کرنے کے لیے اپنا تعاون پیش کرنے کا فیصلہ کرلیا۔

    تفصیلات کے مطابق پاکستان کرکٹ بورڈ کی جانب سے جاری بھارت کے خلاف جرمانہ کی درخواست سننے والے پینل نے روایتی حریفوں کی دو طرفہ کرکٹ سیریز  بحال کروانے کے لیے ثالثی کا کردار ادا کرنے کا فیصلہ کیا۔

    آئی سی سی پینل کا کہنا تھا کہ دونوں ممالک کے درمیان جاری سیاسی کشیدگی اور دیگر معاملات کی وجہ سے کرکٹ سیریز تعطل کا شکار ہے اور 2014 میں ہونے والے معاہدے کی بھارت مسلسل خلاف ورزی کررہا ہے جس کے تحت اُسے 2015 سے 2023 میں سیریز کھیلنی تھی۔

    انٹرنیشنل کرکٹ کونسل کی گورننگ باڈی کے پینل ممبران کا کہنا ہے کہ رواں سال پاکستان کی جانب سے دائر درخواست پر سماعت مکمل کرلی جائے گی، درخواست پر سماعت یکم سے تین اکتوبر تک دبئی میں ہوگی جس میں پاکستان اور بھارت دونوں ممالک کے کرکٹ بورڈ کے سربراہان اپنا مؤقف پیش کریں گے۔

    مزید پڑھیں: سیریز کیوں نہیں کھیلی؟ پی سی بی کا بھارتی کرکٹ بورڈ کو نوٹس

    آئی سی سی کے ترجمان کا کہنا ہے کہ پینل کی کوشش ہوگی کہ کوئی درمیانی راستہ نکال کر سیریز کو دوبارہ بحال کروایا جائے اور درخواست پر ایسا فیصلہ کیا جائے جس سے انصاف نظر آئے۔

    واضح رہے کہ بی سی سی آئی نے سن 2015 اور 2017 میں پاکستان کے خلاف کرکٹ سیریز کھیلنے سے انکار کرتے ہوئے کہا تھا کہ ’بھارت کی حکومت موجودہ حالات کے پیش نظر ہمیں کھیلنے کی اجازت نہیں دے رہی‘۔

    علاوہ ازیں 2008 میں ممبئی حملوں کے بعد بھارت نے پاکستان کے ساتھ ہر قسم کے کھیلوں کی سیریز کھیلنے پر پابندی عائد کردی تھی جبکہ پاکستان نے بھارت کا دورہ کرکے سن 2012 اور 2013 میں ٹی ٹوئنٹی کے علاوہ تین ایک روزہ میچز کی سیریز بھی کھیلنی تھی۔

    یہ بھی پڑھیں: پاکستان سے نہ کھیلنے کی ضد، بھارت ایشیا کپ کی میزبانی سے محروم

    خیال رہے کہ پاکستان کرکٹ بورڈ نے معاہدے کی خلاف ورزی کرنے پر بھارت کے خلاف انٹرنیشنل کرکٹ کونسل میں 70 لاکھ ہرجانے کی درخواست گذشتہ نومبر میں دائر کی تھی۔

    یاد رہے کہ ایشیا کپ رواں برس ستمبر میں ہونا ہے جس کا میزبانی بھارت کے پاس تھی تاہم منفی رویے کی وجہ سے پاکستان نے انڈیا جاکر کھیلنے پر شدید تحفظات کا اظہار کرتے ہوئے انکار کردیا تھا جس کے باعث بھارت میزبانی سے محروم ہوگیا اور اب یہ سیریز متحدہ عرب امارات میں منعقد کی جائے گی۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • پاکستان سے کرکٹ تعلقات بحال نہیں ہونگے، بھارتی وزیرخارجہ

    پاکستان سے کرکٹ تعلقات بحال نہیں ہونگے، بھارتی وزیرخارجہ

    نئی دہلی : پاکستان کا خوف بھارت پر سوار، کھیل کے میدان سے بھی راہ فرار اختیار کرلی، بھارتی وزیرخارجہ سشماسوراج کا کہنا ہے کہ پاکستان سے کرکٹ تعلقات بحال نہیں ہونگے۔

    تفصیلات کے مطابق بھارت کا نئے سال کا آغاز رونے کے ساتھ ہوا اور 2018میں بھی پرانے راگ الاپنا شروع کردیئے، نئی دہلی میں پڑوسی ممالک سے تعلقات پر نظرثانی کے حوالے سے کمیٹی کا اجلاس ہوا، اجلاس میں دونوں ممالک کے درمیان کشیدگی کے خاتمے کے لئے کرکٹ سیریز کے انعقاد پر تبادلہ خیال کیا گیا۔

    اجلاس میں وزیر خارجہ سشما سوراج کا کہنا تھا کہ سرحد پر کشیدگی کی وجہ سے پاکستان سےکرکٹ تعلقات بحال نہیں ہونگے یہاں تک کہ پاکستان کےساتھ نیوٹرل وینیوپربھی نہیں کھیلیں گے تاہم انسانی بنیاد کے تحت قیدیوں اور خواتین کی رہائی جیسے اقدامات اٹھائے جاسکتے ہیں۔

    سشما سوراج نے الزام عائد کیا کہ پاکستان کی جانب سے سے 800زائد مرتبہ سرحدی معاہدے کی خلاف ورزی کی گئی، جس کے باعث سرحد پر بڑھتی ہوئی کشیدگی اور موجودہ حالات کے پیش نظر دونوں ممالک کے درمیان کرکٹ سیریز کے لئے راہ ہموار نہیں ہوسکتی۔

    یاد رہے اس سے قبل  اسلام آباد میں کلبھوشن یادیو کی ان کے اہل خانہ کی ملاقات کے بعد سشما سوراج نے پاکستان پر الزام عائد کیا تھا کہ ملاقات میں دونوں خواتین کے ساتھ  مبینہ ’غیر انسانی سلوک‘ کیا گیا۔

    مزید پڑھیں : بھارتی دہشت گردکلبھوشن کی اہلیہ اوروالدہ سےملاقات

    بھارتی وزیر خارجہ نے کلبھوشن سے ملاقات سے قبل دونوں خواتین کے منگل سوتر اور بندیاں اتروانے کی بھی مذمت کرتے ہوئے کہا تھا کہ پاکستانی حکام نے دانستہ طور پر ان دونوں خواتین کو مجبور کیا کہ وہ کلبھوشن کے سامنے بیواؤں کی طرح پیش ہوں۔ اس سے زیادہ انسانی تذلیل اور کیا ہوگی؟

    خیال رہے کہ 25 دسمبر کو بھارتی دہشت گرد کلبھوشن کی اہلیہ اور والدہ ملاقات کیلیے پاکستان آئیں تھیں، ملاقات 40 منٹ تک جاری رہی تھیں اور کلبھوشن نے اپنے اہل خانہ کے سامنے پاکستان میں جاسوسی اور دہشت گرد کاروائیوں میں ملوث ہونے کا اعتراف بھی کیا تھا ۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

  • پاک بھارت کرکٹ ٹیمیں آج ڈھاکہ میں ٹکرائیں گی

    پاک بھارت کرکٹ ٹیمیں آج ڈھاکہ میں ٹکرائیں گی

    میرپور : کرکٹ کی دنیاکاسب سےبڑادنگل آج ہوگا، تفصیلات کے مطابق کرکٹ کی دنیا کا سب سے بڑا مقابلہ آج میر پور ڈھاکہ کے شیربنگلہ اسٹیڈیم میں ہونے جارہا ہے۔ ۔

    اعصاب شکن مقابلے میں آج روایتی حریف مد مقابل ہونگے۔ دوہزار چودہ کے ایشیا کپ میں پاکستان نے بھارت کو دھول چٹائی تھی۔

    آئی سی سی کے بڑے ایونٹس میں بھارت نے زیادہ تر میچوں میں پاکستان کو شکست سے دوچار کیا ہے لیکن ایشیا کپ 2014 کے انتہائی اہم میچ میں پاکستان نے بھارت کو سنسنی خیز مقابلے کے بعد آخری اوور میں ایک وکٹ سے کامیابی حاصل کرکے ایونٹ سے باہر کردیا تھا۔

    شاہد آفریدی کے ہاتھوں ایشون کی دھنائی ماضی کی یاد پھر سے تازہ کردے گی۔ شاہینوں نے بھارت کے منہ سے فتح چھین لی تھی۔

    دوسری جانب پاکستان ٹی ٹوئنٹی ٹیم کے کپتان شاہد آفریدی نے کہا ہے کہ بھارتی بیٹسمین فارم میں ہیں تو پاکستان کی بولنگ لائن بھی مضبوط ہے اور خاص طور پر لیفٹ آرم آف اسپنر محمد نواز سے کافی امیدیں وابستہ ہیں اور کوشش کررہا ہوں کہ خود بھی اصل بوم بوم بن کر دکھاؤں۔

  • پاک بھارت کرکٹ سیریز اب ہوجانی چاہیئے، آئی سی سی صدر

    پاک بھارت کرکٹ سیریز اب ہوجانی چاہیئے، آئی سی سی صدر

    دبئی: ممبئی میں بی سی سی آئی کے ہیڈ کوارٹر پر شیو سینا کے حملے کے بعد آئی سی سی کے صدر ظہیر عباس نے بھارت میں ورلڈ ٹی ٹوئنٹی پر سوال اٹھادیا۔

    بھارت کی انتہا پسند جماعت شیو سینا کی غنڈہ گردی نے آئی سی سی کو بھی پریشانی میں مبتلا کردیا آئی سی سی کے صدر ظہیر عباس نے سوال اٹھا دیا کہ کیا آئندہ سال بھارت کی سرزمین پر ورلڈ ٹی ٹوئنٹی ہوسکے گا یہ نہیں۔

    کرکٹ کی عالمی تنظیم کے سربراہ کا کہنا ہے کہ موجودہ صورتحال سے پاکستانی کرکٹرز بھی بھارت جانے سے گھبرائینگے۔

    ظہیرعباس نےکہا کہ حالات میں بہتری لانے کے لئے پاک بھارت کرکٹ سیریزاب ہوجانی چاہیے۔

     ظہیر عباس نے کہا کہ وہ شیو سینا پر کوئی بات نہیں کرنا چاہتے کرکٹ تعلقات کیسے بحال کرنے ہیں اب یہ فیصلہ دونوں ممالک کو کرنا ہوگا۔