Tag: پاک بھارت

اسلام آباد: بھارت میں کرونا وائرس کی خطرناک قسم کے پھیلاؤ سے تباہ کاریاں جاری ہیں، ایسے حالات میں بھی پڑوسی ملک سے 12 سفارتی اہل کار پاکستان پہنچ گئے ہیں۔

تفصیلات کے مطابق بھارت میں کرونا کی خطرناک قسم کے پھیلاؤ کے باوجود خطرناک بے احتیاطی کی گئی ہے، بارہ سفارتی اہل کار پاکستان پہنچ گئے ہیں، پنجاب ہیلتھ کیئر ڈیپارٹمنٹ نے اہل کاروں کے کرونا ٹیسٹ کر لیے۔

پنجاب ہیلتھ کیئر ڈیپارٹمنٹ کا کہنا ہے کہ بھارتی سفارتی اہل کار بریپیش کی اہلیہ منجو کا کرونا ٹیسٹ مثبت آ گیا ہے۔

سفارتی اہل کار کی اہلیہ منجو کو واپس بھیجنے کی بجائے بھارتی سفارت خانے بھیج دیا گیا، کرونا پازیٹو خاتون کو سفارت خانے ہی میں قرنطینہ کی ہدایت کر دی گئی ہے۔

نیویارک: پاکستان کے مستقل مندوب منیر اکرم نے سیکریٹری جنرل یو این انتونیو گوتریس سے ملاقات میں انھیں پاکستان کی جانب سے بھارت کے خلاف ڈوزیئر پیش کر دیا۔

اے آر وائی نیوز کے مطابق ڈوزیئر بھارت کی ریاستی دہشت گردی پر پاکستانی کی جانب سے دستاویزات پر مبنی ہے، بھارتی دہشت گردی کے خلاف پاکستانی ڈوزیئر کے اہم نکات مندرجہ ذیل ہیں۔

یہ ڈوزیئر شواہد کی بنیاد پر مرتب کیا گیا ہے، جس میں لکھا گیا ہے کہ دہشت گردی کے خلاف بحیثیت فرنٹ لائن اسٹیٹ پاکستان نے بے انتہا قربانیاں دیں، جب پاکستان قربانیاں دے رہا تھا تو بھارت دہشت گرد نیٹ ورک مضبوط کر رہا تھا۔

ڈوزیئر میں دہشت گردی کی ریاستی کفالت کے بھارتی ڈیزائن اور خطے میں امن کی راہ میں حائل بھارتی رکاوٹوں کو بے نقاب کیا گیا ہے، ثبوت پیش کیے گئے ہیں کہ تحریک طالبان پاکستان (ٹی ٹی پی) اور اس کی تمام ذیلی تنظیمیں بھارتی پراکسی ہیں، مختلف ذیلی دہشت گرد ادارے بھی ناقابل تردید بھارتی پراکسی ہیں۔

ڈوزیئر کے مطابق شواہد سے واضح ہے کہ بھارت پاکستان میں دہشت گردی کی معاونت کر رہا ہے، بھارت دہشت گردوں کو مالی اعانت، تربیت اور انھیں فروغ دینے کا کام کر رہا ہے، بھارتی خفیہ ایجنسیوں کے دہشت گرد تنظیموں کے ساتھ رابطے قائم ہیں، پچھلے برسوں کے دوران بھارت نے ان تنظیموں پر 22 ارب سے زائد کی سرمایہ کاری کی۔

ڈوزیئر کے مطابق پاکستان میں حالیہ تشدد میں اضافہ بھارتی کوششوں کا براہ راست نتیجہ ہے، بھارت دہشت گردوں کے اتحاد کے لیے کوششیں کر رہا ہے، بلوچستان میں دہشت گردوں کی سرپرستی پاک چین اقتصادی راہ داری (سی پیک) کمزور کرنے کے لیے ہے، سی پیک کے اعلان کے ساتھ ہی بھارت منصوبے کو روکنے کے لیے کوشاں ہوگیا، 2015 میں سی پیک کے خلاف بھارتی خفیہ ایجنسی را کے دفتر میں سیل قائم کیاگیا۔

اس سیل کو ابتدا میں دہشت گردانہ کارروائیوں کے لیے 80 بلین روپے مختص کیےگئے تھے، دہشت گرد تنظیموں کے خلاف کارروائی سے بہت سے شواہد ملے ہیں، شواہد ہیں کہ افغانستان میں بھارتی سفارت خانے اور قونصل خانے دہشت گردی کے مرکز ہیں، افغانستان میں بھارتی سفیر دہشت گردوں کی تربیت اور مالی مدد کی نگرانی کر رہے ہیں۔

پاکستانی ڈوزیئر میں کہا گیا ہے کہ بھارتی خفیہ ایجنسیاں دہشت گردوں کے 87 اڈے، تربیتی کیمپ چلا رہی ہیں، جن میں سے 66 افغانستان اور 21 بھارت میں ہیں، اجمل پہاڑی نے عدالت میں بھارت سے تربیت حاصل کرنے کا اعتراف کیا، اس نے بھارتی تربیتی کیمپ اور انسٹرکٹر سے تربیت ملنے کا اعتراف کیا۔

ڈوزیئر کے مطابق بھارتی خفیہ ایجنسیاں کشمیر میں بدامنی پیدا کرنے کی کوشش کر رہی ہیں، بھارتی خفیہ ایجنسی’را‘ کشمیر میں بارودی سرنگیں لگا رہی ہے، کشمیر میں ٹارگٹ کلنگ کی مالی اعانت بھی کر رہا ہے بھارت، گلگت میں بھی بھارت سازشوں کے ذریعے انتشار پیدا کرنا چاہتا ہے، پاکستان کو ایف اے ٹی ایف میں ناکام کرنے کے لیے بھارت لابنگ کرتا رہا۔

ڈوزیئر میں مطالبہ کیا گیا ہے کہ دنیا بھارت پر دباؤ ڈالے کہ وہ دہشت گردی کی ریاستی کفالت بند کرے، دنیا بھارت پر زور دے کہ وہ ملک سے دہشت گردوں کا اسٹرکچر ختم کرے۔