Tag: پاک فوج

خیبر پختونخوا (17 اگست 2025): فیلڈ مارشل جنرل عاصم منیر کی ہدایت پر سیلاب متاثرہ علاقوں میں پاک فوج کی جانب سے امدادی سرگرمیاں جاری ہیں۔

اے آر وائی نیوز کے مطابق خیبر پختونخوا میں اس بار بارش قدرتی آفت کے طور پر آئی۔ کلاؤڈ برسٹ، غیر معمولی طوفانی بارشوں، سیلابی ریلوں میں بہہ کر سینکڑوں افراد اپنی جان سے ہاتھ دھو بیٹھے جب کہ اس سے کہیں زیادہ زخمی اور درجنوں افراد لاپتہ ہیں۔ بارش سے صوبے میں اربوں روپے مالیت کی عوامی املاک اور سرکاری انفرا اسٹرکچر تباہ ہو چکا ہے۔

آرمی چیف فیلڈ مارشل جنرل عاصم منیر کی ہدایت پر کے پی کے سیلاب زادہ علاقوں میں پاک فوج کی جانب سے راشن کی تقسیم جاری ہے اور خراب موسم کے باوجود پاک فوج کے ہیلی کاپٹرز بونیر، شانگلہ، سوات میں ریسکیو اینڈ ریلیف آپریشن میں مصروف ہیں۔

آرمی چیف کی ہدایت پر پاک فوج کے ہیلی کاپٹرز نے خواڑ بانڈہ کے علاقے میں راشن پہنچایا۔ راشن پیکٹوں میں آٹا، چاول، دالیں، ملک پاوڈر، نمک، چائے کی پتی اور کوکنگ آئل شامل ہیں۔

اس کے علاوہ پاک فوج کے ہیلی کاپٹرز دور دراز علاقوں سے زخمیوں کو محفوظ مقام تک بھی پہنچا رہے ہیں۔ فوج کے ڈاکٹرز نے متاثرہ علاقوں میں میڈیکل کیمپ لگا لیا ہے اور جہاں مریضوں کا معائنہ اور مفت ادویات دی جا رہی ہیں۔

واضح رہے کہ اس سے قبل پاک فوج نے اپنی ایک روز کی تنخواہ اور ایک روز کا راشن جو تقریباً 600 ٹن سے زائد کا بنتا ہے، وہ سیلاب متاثرین کو دینے کا اعلان کیا تھا۔ پاک فوج سیلاب زدگان کی بحالی تک عوامی خدمت کامشن جاری رکھے گی۔

اسکردو : پاک فوج نے دیوسائی میں پھنسے سیاحوں کو ریسکیو کرنے کا آپریشن کامیاب ہوگیا اور تمام سیاحوں کو اسکردو منتقل کر دیا گیا۔

تفصیلات کے مطابق گزشتہ دنوں اسکردو دیوسائی روڈ شدید بارشوں سےکئی جگہ پرلینڈسلائیڈنگ کی زد میں آئی، جس سے 40 سے 50 گاڑیوں میں سوار سیاح اور مقامی افراد پھنس گئے۔

جس کے بعد پاک فوج نے فوری طور پر ریسکیو آپریشن شروع کیا اور رات بھر کی انتھک کوششوں سے پاک فوج انجینئرنگ ٹیموں نے بھاری مشینری کے ذریعے اسکردو سے سدپارہ ماؤنٹینئرنگ اسکول اور دیوسائی سے سدپارہ گاؤں تک سڑک مکمل طور پر کلیئر کر دی ہے۔

ذرائع کا کہنا تھا کہ تمام بند راستے کھول دیے گئے ہیں اور تمام پھنسے افراد اور گاڑیاں محفوظ طریقے سے نکال لی گئیں ، جس کے بعد اسکردو دیوسائی روڈ پر آمدورفت بحال ہو چکی اور ٹریفک روانی سے جاری ہے۔

ممکنہ ہنگامی صورتحال سے بروقت نمٹنےکیلئے فوجی دستے اب بھی علاقے میں موجود ہے، مقامی افراد اور سیاحوں نے پاک فوج کی بروقت کارروائی اور پیشہ ورانہ صلاحیتوں کو سراہا۔

ریسکیو ذرائع نے بتایا کہ دیوسائی میں پھنسے سیاحوں کو ریسکیو کر کے اسکردو منتقل کر دیا گیا، سیلاب اور لینڈ سلائیڈنگ کے باعث دیوسائی روڈ بند ہو گئی تھی تاہم دیوسائی روڈ کو بحال کر دیا گیا ہے۔

کمشنر بلتستان کا کہنا ہے کہ سیاح بارشوں کے دوران پہاڑی علاقوں کا سفر نہ کریں،بارش کے دوران لینڈ سلائیڈنگ اور سیلاب کا خطرہ بڑھ جاتا ہے، عوام ندی نالوں اور دریاؤں کے قریب جانے سے گریز کریں۔