Tag: پاک فوج

اسلام آباد: وزیر خارجہ شاہ محمود قریشی نے پڑوسی ملک بھارت کو خبردار کیا ہے کہ وہ کوئی حماقت نہ کرے، ہم تیار ہیں، منہ توڑ جواب ملے گا۔

وزیر خارجہ شاہ محمود قریشی نے اے آر وائی نیوز سے بات چیت کرتے ہوئے کہا کہ پاکستان نے بھارت کی جاسوسی کی ایک اور کوشش ناکام بنا دی، بھارتی ڈرون سرحدی حدود کی خلاف ورزی کر رہا تھا، اور مار گرایا گیا۔

انھوں نے کہا بھارت مسلسل ہزیمت اٹھا رہا ہے، لداخ میں بھارت بری طرح ناکام ہوا، کشمیر میں بھارت کی پالیسی ناکام ہوئی، وہ فالس فلیگ آپریشن کے بہانے بھی ڈھونڈ رہا ہے۔ انھوں نے بھارت کو مخاطب کرتے ہوئے کہا ‘کوئی حماقت نہیں کرنا، ہم تیار ہیں، منہ توڑ جواب ملے گا’۔

پاک فوج نے ایل او سی پر ایک اور بھارتی کواڈ کاپٹر مار گرایا

شاہ محمود کا کہنا تھا اندرونی مسائل سے توجہ ہٹانے کے لیے بھارت یہ سب کر رہا ہے، بھارتی میڈیا بھی اپنی حکومت کی پالیسیوں پر تنقید کر رہا ہے، بھارتی میڈیا کہہ رہا ہے کہ دوول سے بھارتی فوج مطمئن نہیں، بھارتی فوج سمجھتی ہے کہ اسے بند گلی میں دکھیلا جا رہا ہے۔

وزیر خارجہ نے واضح پیغام دیا کہ جو راستہ دلی سرکار اپنا رہی ہے، وہ غلط ہے۔

واضح رہے گزشتہ روز پاک فوج نے ایل او سی پر ایک اور بھارتی کواڈ کاپٹر مار گرایا ہے، بھارتی کواڈ کاپٹر نکرون سیکٹر میں پاکستانی حدود میں داخل ہوا تھا۔ آئی ایس پی آر کے مطابق بھارتی کواڈ کاپٹر 700 میٹر تک پاکستانی حدود میں آ گیا تھا۔

راولپنڈی: آرمی چیف جنرل قمر جاوید باجوہ کے ساتھ اے آروائی نیوز کے پروگرام دی رپورٹرز کی ٹیم نے ایل او سی کا دورہ کیا۔پاک فوج کے سربراہ کے ساتھ کسی بھی میڈیا ٹیم کا یہ پہلا دورہ ہے۔

تفصیلات کے مطابق آرمی چیف جنرل قمر جاوید باجوہ نے ایل او سی کا دورہ کیا۔اے آروائی نیوز کے پروگرام دی رپورٹرز کی ٹیم بھی آرمی چیف کے ہمراہ تھی۔آرمی چیف اور دی رپورٹرز کی ٹیم نے ابھی نندن کوگرفتار کرنے والے یونٹ افسران،جوانوں کے ساتھ دن گزارا۔

پاک فوج کے سربراہ کے ساتھ کسی بھی میڈیا ٹیم کا یہ پہلا دورہ ہے۔آرمی چیف کے ساتھ ایل او سی کا دورہ کرنا اے آروائی نیوز کا خصوصی اعزاز ہے۔

آرمی چیف جنرل قمر جاوید باجوہ نے دی رپورٹرز کی ٹیم کے ساتھ غیر رسمی گفتگو کرتے ہوئے کہا کہ نریندر مودی کا کشمیر ماڈل تباہ اور ناکام ہوچکا ہے،کشمیریوں اور عالمی برادری نے بھارتی اقدامات تسلیم نہیں کیے،بھارت اپنی مقبوضہ کشمیرمیں ناکامیوں کا ملبہ پاکستان پر ڈالنا چاہتا ہے۔

پاک فوج کے سربراہ کا کہنا تھا کہ بی جے پی کی حکومت ہندوتوا کے نظریے کا غلبہ چاہتی ہے،مودی کے انتہا پسندانہ اقدامات سے بھارت کا چہرہ مسخ ہوگیا۔

انہوں نے کہا کہ بھارت کے سی اے اے، این آر سی جیسے قوانین پر عالمی سطح پر تشویش ہے،بھارت اقلیتوں کو ختم کرنا چاہتا ہے،عالمی تنظیمیں بھی بھارت سے متعلق تشویش کا اظہار کرچکی ہیں۔

دی رپورٹرز کی ٹیم سے گفتگو کرتے ہوئے جنرل قمر جاوید باجوہ کا کہنا تھا کہ بھارت پاکستان اور چین کے خلاف سازشوں میں مصروف ہے،افواج پاکستان مادر وطن کا دفاع کرنے کی بھرپور صلاحیت رکھتی ہے۔

آرمی چیف نے کہا کہ پاک فوج ایک منظم ادارہ ہے،پاک فوج میں احتساب کا موثر نظام ہے،ایک افسرکی بیوی کی ویڈیو سامنے آنے پر افسر اور اس کی اہلیہ کے خلاف سخت ترین کارروائی ہوچکی ہے۔

پاک فوج کے سربراہ کا کہنا تھا کہ پاکستان کی ترقی،خوشحالی،مستقبل صرف اور صرف جمہوریت میں ہے،اداروں کو مضبوط کرنا ہوگا، تمام مسائل کا حل نظام اور جمہوریت کے اندر ہے۔انہوں نے کہا کہ پاکستان میں جس طبقے پر ہاتھ ڈالیں وہ مافیا کی طرح ری ایکٹ کرتا ہے۔

پاک فوج کے سربراہ کا ایل او سی پر جوانوں سے خطاب

آرمی چیف جنرل قمر جاوید باجوہ نے ایل او سی کے دورے کے دوران جوانوں کے ساتھ نماز عید ادا کی اور ابھی نندن کو گرفتار کرنے والے یونٹ افسران، جوانوں کے ساتھ دن گزارا۔

اس موقع پر پاک فوج کے سربراہ نے جوانوں سے خطاب کرتے ہوئے کہا کہ جن جوانوں سےخطاب کر رہا ہوں، یہ یونٹ100جانیں قربان کرچکا ہے،شہدا کا اجر صرف اللہ تعالیٰ کے پاس ہے۔انہوں نے کہا کہ پاک فوج کا ہر جوان ہمارے لیے انتہائی اہم ہے۔

آرمی چیف کا کہنا تھا کہ پاک فوج کے جوان قرآن مجید سے استفادہ کریں،جوان رمضان کے بعد بھی قرآن مجید سے اپنا رابطہ مضبوط رکھیں،دین اسلام تحمل،بردباری اور برداشت کا درس دیتا ہے۔انہوں نے کہا کہ اسلام میں حقوق العباد نہ نبھانے پرمعافی نہیں ہے۔

جنرل قمر جاوید باجوہ نے کہا کہ کرونا،سیلاب،زلزلہ ہر آفت میں مسلح افواج نے قومی ذمہ داری سمجھ کر فرض نبھایا،کرونا کے باعث بہت سےسقم سامنے آئے ہیں،پاک فوج کرونا سے محفوظ رہنے کے لیے غیر معمولی احتیاط برتے۔

راولپنڈی: آرمی چیف جنرل قمر جاوید نے ایرانی فوج کے سربراہ میجر جنرل باقری سے ٹیلیفونک رابطہ کر کے بارڈر پر فورسز پر حملے پر تحفظات کا اظہار کیا۔

آئی ایس پی آر کے مطابق پاک ایرانی بارڈر پر پاکستانی سیکورٹی فورسز پر دہشت گردانہ حملے کے سلسلے میں پاک فوج کے سربراہ جنرل قمر جاوید باجوہ نے ایرانی فوج کے سربراہ کو ٹیلی فون کر کے تحفظات کا اظہار کیا۔

پاک فوج کے شعبہ تعلقات عامہ کا کہنا تھا کہ پاک، ایران سرحد پر حملے میں 6 سیکورٹی اہل کار شہید ہو گئے تھے، اس سلسلے میں کی گئی ٹیلی فونک گفتگو میں دونوں فوجی سربراہوں نے سیکورٹی اقدامات بڑھانے پر اتفاق کیا۔

آرمی چیف جنرل قمر جاوید باجوہ کا کہنا تھا کہ پاکستان نے پاک ایران بارڈر پر فینسنگ کا کام شروع کر دیا ہے، جس کے لیے مشترکہ تعاون کو فروغ دینا ہوگا، فینسنگ سے دہشت گردوں، اسمگلروں کی نقل و حرکت روکنے میں مدد ملے گی۔

آرمی چیف نے ایرانی ہم منصب سے کہا کہ پاکستان عدم مداخلت کی پالیسی پر گامزن ہے، اور ہم برابری کی بنیاد پر خطے میں امن اور استحکام کے قیام کے خواہاں ہیں۔ انھوں نے کہا کہ سرحد پر چوکیوں کو مزید فعال بنانا ہوگا۔

آئی ایس پی آر کے مطابق ٹیلی فونک رابطے میں کرونا کی وبا کی صورت حال پر بھی بات چیت ہوئی۔