راولپنڈی: بھارتی فوج نے ایل او سی سیکٹرز پر سیز فائر کی ایک بار پھر خلاف ورزی کی، اور اشتعال انگیزی کرتے ہوئے ایک خاتون اور ایک لڑکے کو شہید کر دیا۔
آئی ایس پی آر کے مطابق بھارتی فورسز کی جانب سے ایک بار پر لائن آف کنٹرول پر سیز فائر کی خلاف ورزی ہوئی ہے، بھارتی فوجیوں نے فائرنگ کرتے ہوئے ایک خاتون سمیت دو پاکستانیوں کو شہید کر دیا۔
بھارتی فائرنگ سے شہید ہونے والوں میں 45 سال کی نسرین بی بی اور 12 سال کا محمد زاہد شامل ہیں۔
پاک فوج کے ترجمان ادارے کا کہنا ہے کہ بھارتی فائرنگ سے سونیا بی بی شدید زخمی ہوئیں، بھارتی فوج نے تتہ پانی اور کوٹ کٹیرا سیکٹرز میں آبادی کو جان بوجھ کر نشانہ بنایا۔
یہ بھی پڑھیں: ایل او سی: پاک فوج کا بھارتی اشتعال انگیزی کا منہ توڑ جواب، پانچ بھارتی فوجی ہلاک
آئی ایس پی آر نے بتایا کہ پاک فوج نے بھرپور جوابی کارروائی کی اور بھارتی پوسٹوں کو نشانہ بنایا، جب کہ تتہ پانی اور کوٹ کٹیرا میں وقفے وقفے سے فائرنگ جاری ہے۔
یاد رہے کہ ایک ماہ قبل بھارتی فوج نے ایل او سی کی شہری آبادی پر بلا اشتعال فائرنگ کر کے خاتون اور بچوں سمیت چھ پاکستانیوں کو زخمی کر دیا تھا جس پر پاک فوج نے جوابی کارروائی میں پانچ بھارتی فوجی مار گرائے تھے۔
