(24 اگست 2025): فیلڈ مارشل جنرل سید عاصم منیر نے کہا ہے کہ پاک چین اسٹریٹجک شراکت داری چٹان کی طرح مضبوط ہے۔
اے آر وائی نیوز کے مطابق چینی وزیر خارجہ وانگ پی کی فیلڈ مارشل سید عاصم منیر سے ملاقات پر چینی وزارت خارجہ نے بیان جاری کیا ہے جس میں کہا گیا ہے کہ اس ملاقات میں دونوں ممالک کے درمیان روایتی دوستی کا اعادہ کیا گیا۔
فیلڈ مارشل سید عاصم منیر نے کہا کہ پاک چین اسٹریٹجک شراکت داری چٹان کی طرح مضبوط ہے اور چین کے ساتھ دوستانہ تعلقات قائم رکھنا پاکستانی قوم کا متفقہ موقف ہے۔
جنرل عاصم منیر نے پاکستانی فوج انسداد دہشتگردی، سیکیورٹی تعاون کو فعال طور پر فروغ دینے کیلیے تیار ہے۔ چینی اہلکاروں، منصوبوں اور اداروں کی حفاظت یقینی بنانےکی کوشش جاری رہیں گی۔
انہوں نے پاکستان کی معاشی اور سماجی ترقی میں قیمتی تعاون پر چینی قیادت کا شکریہ ادا کرتے ہوئے کہا کہ دونوں ممالک ہمیشہ ایک دوسرے کے دکھ سکھ میں شریک رہے ہیں۔ پاک چین دوستی مزید مستحکم بنانے کیلیے اقدامات اور ترقی کا سفر جاری رکھا جائے گا۔
چینی وزارت خارجہ کے جاری بیان کے مطابق اس ملاقات کے حوالے سے چین کے وزیر خارجہ وانگ پی نے کہا کہ فیلڈ مارشل سید عاصم منیر نے کہا ہے کہ چین پاکستان کا "آہنی دوست” ہے اور پاک فوج نے ہمیشہ دونوں ممالک کے درمیان اہم اتفاقِ رائے پرعملدرآمد کی بھرپور حمایت کی ہے۔ پاکستانی فوج پاک چین دوستی وتعاون کی مضبوط محافظ ہے۔
وانگ پی کا کہنا تھا کہ چین نے ہمیشہ اپنی پڑوسی سفارت کاری میں پاکستان کو اولین ترجیح دی ہے۔ وقت کے کڑے امتحانات کے باوجود پاک چین تعلقات مزید مضبوط ہوئے ہیں اور دونوں ممالک ایک مضبوط روایتی دوستی قائم کر چکے ہیں۔
چینی وزیر خارجہ نے مزید کہا کہ چین عالمی امور میں پاکستان کے بڑے کردار کا خیر مقدم کرتا ہے اور پاکستان کی علاقائی سالمیت اور قومی سلامتی کے تحفظ میں بھرپور تعاون جاری رکھے گا۔ دنیا میں غیر یقینی حالات میں مضبوط پاک چین تعلقات کو فروغ دینا امن و استحکام کیلیے سودمند ہے۔
