Tag: پاک چین دوستی

بیجنگ(31 اگست 2025): وزیراعظم شہباز شریف نےکہا ہے کہ پاک چین دوستی پائیدار ہے کبھی ختم نہیں ہوگی، اختلافات پیدا کرنے کی ہر کوشش ناکام ہوئی۔

تفصیلات کے مطابق وزیراعظم شہباز شریف نے تیانجن یونیورسٹی میں طلباء سے خطاب میں کہا پاکستان اور چین کا مستقبل مشترکہ ہے، کرپشن کیخلاف چینی صدر کے وژن کی حمایت کرتے ہیں، میں نے بھی پاکستان میں یہی پالیسی اپنائی اور ڈیڑھ سال ہوگیا کوئی میری حکومت پر کرپشن کا الزام نہیں لگا سکتا۔

تیانجن یونیورسٹی میں نیشنل فیسلٹی فار ارتھ کوئیک انجینئرنگ سمولیشن کے دورے کے دوران، وزیر اعظم شہباز شریف کو جدید ترین ٹیکنالوجیز بشمول میڈیکل ریسکیو گاڑیاں اور آفات سے نمٹنے کے نظام کے بارے میں بریفنگ دی گئی۔

وزیر اعظم شہباز شریف نے ڈیزاسٹر مینجمنٹ میں چین کی ٹیکنالوجی کے جدید استعمال اور جدید تکنیکوں کی تعریف کرتے ہوئے اعتماد کا اظہار کیا اور کہا کہ پاکستان اپنی حفاظتی اور ردعمل کی حکمت عملیوں کو مضبوط بنانے کے لیے اس مہارت سے بھرپور فائدہ اٹھا سکتا ہے۔

انہوں نے کہا کہ اس طرح کی اختراعات کو اپنانے سے پاکستان قدرتی آفات کے خلاف موثر احتیاطی تدابیر اختیار کر سکے گا، دوطرفہ تعاون کی اہمیت کو اجاگر کرتے ہوئے شہباز شریف نے ہدایت کی کہ چین پاکستان جوائنٹ لیب فار ڈیزاسٹر اینڈ ایمرجنسی میڈیسن اور انٹرنیشنل میڈیکل کوآپریشن سینٹر جیسے منصوبوں کو مزید فعال بنایا جائے۔

وزیر اعظم نے دورے کے بعد خطاب میں کہا کہ تیانجن یونیورسٹی دوبارہ آنے پر خوشی محسوس ہورہی ہے میں پہلی بار 2017 میں تیانجن یونیورسٹی آیا تھا، انہپوں نے اپنے دور ے میں پاکستانی طلبا سمیت بہترین پروفیسرز سے ملاقات کی۔

وزیراعظم نے کہا کہ تیانجن یونیورسٹی پاکستانی طلبا کیلئے بہترین تعلیم  حاصل کرنے کا مرکز ہے، تیانجن یونیورسٹی میں پاکستانی طلبا کی بڑی تعداد دیکھ کر خوشی ہوئی۔

وزیراعظم شہباز شریف نے مزید کہا کہ پاکستان اور چین کے درمیان مضبوط دوستی ہے، دونوں ممالک کے درمیان اختلافات پیدا کرنے کی ہر کوشش ناکام ہوئی، پاکستان اور چین کے درمیان دوستی پائیدار ہےکبھی ختم نہیں ہوگی۔

وزیراعظم کا کہنا تھا کہ پاکستان پہلا اسلامک ملک تھا جس نے چین کو تسلیم کیا، ہمیں چین کے ساتھ اپنی مضبوط دوستی پر فخر ہے، شاہراہ قراقرم دونوں ممالک کے درمیان دوستی کا عظیم منصوبہ ہے، چین آج دنیا کی بڑی معاشی اور فوجی طاقت ہے۔

وزیراعظم شہبازشریف نے مزید کہا کہ پاکستان چینی صدر کے ویژن کی بھرپور حمایت کرتا ہے، کرپشن کیخلاف چینی صدر کے ویژن کی بھرپور حمایت کرتے ہیں، چین اور پاکستان کا مشترکہ مستقبل ہے۔

اسلام آباد: وزیر اعظم پاکستان شہباز شریف نے 1200 میگا واٹ جوہری پاور پلانٹ معاہدے کو پاک چین دوستی کے لیے ایک اور سنگ میل قرار دیتے ہوئے کہا ہے کہ دو بہترین دوست ملکوں کے لیے آج اہم دن ہے۔

اے آر وائی نیوز کے مطابق وزیر اعظم شہباز شریف نے کہا کہ 1200 میگا واٹ جوہری پاور پلانٹ معاہدہ پاک چین دوستی کے لیے ایک سنگ میل کی حیثیت رکھتا ہے، دو بہترین دوست ملکوں کے لیے آج اہم دن ہے، 4.8 ارب ڈالرز کا منصوبہ یہ پیغام ہے کہ چینی سرمایہ کار پاکستان پر اعتماد کرتے ہیں، مشکل معاشی حالات کے باوجود پاکستان معاشی بحالی کے لیے پُرعزم ہے۔

چشمہ 5 نیوکلیئر پاور پلانٹ تعمیر کی مفاہمتی یادداشت پر دستخط کی تقریب میں وفاقی وزرا اسحاق ڈار، احسن اقبال اور خرم دستگیر بھی موجود تھے، خطاب میں وزیر اعظم کا کہنا تھا کہ آئی ایم ایف کے ساتھ معاہدہ تاخیر کا شکار ہونے پر چین نے ہماری مدد کی، چین کے صدر شی جن پنگ کے بے حد مشکور ہیں، چینی حکومت کے ساتھ سمجھوتے کے لیے وزیرخزانہ اور ان کی ٹیم کا بھی مشکور ہوں۔

شہباز شریف کے مطابق اس منصوبے کو گزشتہ حکومت نے سرد خانے میں ڈال دیا تھا، اس معاہدے سے پاکستان چین معاشی تعلقات کو فروغ ملے گا، چین کی طرف سے 4.8 ارب ڈالرز کی سرمایہ کاری مثبت اقدام ہے، پاکستان کےعوام کو مبارکباد پیش کرتا ہوں۔

انھوں نے کہا کہ چشمہ فائیو منصوبے میں چینی کمپنی نے 30 ارب روپے کی رعایت دی ہے، پاکستان کی موجودہ فوجی قیادت کی جانب سے منصوبے میں گہری دلچسپی لینے پرشکر گزار ہوں، نواز شریف کا شکریہ ادا کرتا ہوں جن کے ترقی کے وژن کو لے کر ہم آگے بڑھ رہے ہیں، نوازشریف نے 1990 میں پہلی بار چین کے ساتھ جوہری توانائی کا معاہدہ کیا تھا۔

واضح رہے کہ چین کی نیشنل کارپوریشن اور پاکستان اٹامک انرجی کے درمیان اس معاہدے پر دستخط ہوئے ہیں جبکہ اس منصوبے کی کل لاگت 400 ارب ڈالرز ہے۔