واشنگٹن: امریکی صدر ڈونلڈ ٹرمپ نے اپنے روسی ہم نصب صدر ولادیمیر پیوٹن کو ’پاگل‘ قرار دے دیا ہے۔
غیر ملکی میڈیا رپورٹس کے مطابق ماسکو کی جانب سے یوکرین پر بڑے اور مہلک ڈرون حملے کے بعد امریکی صدر ڈونلڈ ٹرمپ نے اتوار کو اپنے روسی ہم منصب پیوٹن کو ’’کریزی‘‘ قرار دیا۔
روس کی جانب سے اتوار کو رات بھر یوکرین کے خلاف ریکارڈ تعداد میں ڈرون حملے کیے گئے، جس میں کم از کم 13 افراد ہلاک ہو گئے ہیں۔
ٹرمپ نے اپنے پلیٹ فارم ٹروتھ سوشل پر ایک پوسٹ میں کہا ’’روس کے ولادیمیر پیوٹن کے ساتھ میرے ہمیشہ سے بہت اچھے تعلقات رہے ہیں، لیکن ان کے ساتھ کچھ ہوا ہے، وہ بالکل پاگل ہو گئے ہیں!‘‘
ایران کے ساتھ جوہری مذاکرات، ٹرمپ نے دو دنوں میں اہم اعلان کا اشارہ دے دیا
امریکی صدر نے لکھا ’’میں نے ہمیشہ کہا ہے کہ وہ پورا یوکرین چاہتا ہے، صرف ایک ٹکڑا نہیں، اور شاید یہ درست ثابت ہو رہا ہے، لیکن اگر وہ ایسا کرتا ہے تو یہ روس کے زوال کا باعث بنے گا!‘‘
فرانسیسی خبر رساں ایجنسی کا کہنا ہے کہ امریکی صدر کی جانب سے پیوٹن کی اکثر تعریف ہی سامنے آئی ہے، پہلی بار انھوں نے اس طرح پیوٹن کی سرزنش کی ہے، کیوں کہ جنگ بندی مذاکرات مسلسل تعطل کے شکار ہونے کی وجہ سے ٹرمپ مایوسی کا شکار ہیں۔ ٹرمپ نے کہا پیوٹن لوگوں کو ہلاک کر رہا ہے جس سے وہ ناخوش ہیں۔
اتوار کو امریکی صدر نے صحافیوں کو بتایا کہ وہ یوکرین پر تازہ ترین حملوں پر ’’خوش نہیں‘‘ ہیں اور وہ ماسکو پر پابندیاں بڑھانے پر ’’بالکل‘‘ غور کر رہے ہیں۔ انھوں نے کہا ’’میں انھیں ایک طویل عرصے سے جانتا ہوں، ہمیشہ ان کے ساتھ رہتا ہوں، لیکن وہ شہروں پر راکٹ بھیج کر لوگوں کو مارتا ہے، اور مجھے یہ بالکل پسند نہیں ہے۔‘‘
