پاگل خانہ اپنی نوعیت کی ایک ایسی جگہ ہے جہاں جانے والوں کے سامنے ایک علیحدہ اور عجیب و غریب زندگی ہوتی ہے جس کا تصور یا موازنہ باہر کی دنیا سے کرنا بہت مشکل ہے۔
اے آر وائی نیوز کے پروگرام سرعام کی ٹیم نے لاہور کے مینٹل اسپتال جا کر وہاں فراہم کی جانے والی سہولیات اور علاج معالجے کے حوالے سے معلومات حاصل کیں۔
ایک پاگل خانے (مینٹل ہسپتال) کے مریض دن رات کیسے گزارتے ہیں؟ مینٹل اسپتال کو عام اسپتال سے الگ کیوں سمجھا جاتا ہے؟ کیا حقیقت واقعی وہی ہے جو ہم جانتے ہیں یا اس کے پیچھے کوئی اور کہانی ہے؟ گھر والے ایسے مریضوں کو بوجھ کیوں سمجھتے ہیں؟
ٹیم سرعام جب لاہور کے پاگل خانہ (مینٹل اسپتال) پہنچی تو وہاں ایسی کہانیاں سامنے آئیں جنہیں جاننا لوگوں کے لیے بے حد ضروری ہے۔
اگر لاہور کے مینٹل اسپتال کی بات کی جائے تو یہاں بہت بہترین اور تسلی بخش علاج کی سہولیات فراہم کی جاتی ہیں، مریضوں کیلیے ادویات اور ان کے کھانے کیلیے بہترین اور اعلیٰ معیار کے پکوان تیار کیے جاتے ہیں۔
دس سال سے کوئی ملنے نہیں آیا
پاگل خانے میں تین ایسی ضعیف خواتین بھی تھیں جو گزشتہ دس سال سے یہاں زیر علاج ہیں لیکن انہیں کوئی ملنے نہیں آتا، تاہم اسپتال کا عملہ ان خواتین کا ہر لحاظ سے خیال رکھتا ہے۔
ٹیم سرعام نے ایک اور مریض سے بات کی لیکن اس دوران کہیں سے بھی ایسا نہیں لگا کہ وہ کوئی نفسیاتی مریض ہے بلکہ بظاہر وہ بہت سمجھدار اور سلجھا ہوا لگ رہا تھا، اس کے بارے میں ڈاکٹر نے بتایا کہ ڈس آرڈر کا مریض ہے اور اس کی طبیعت میں بتدریج بہتری آرہی ہے۔
مجھے اکثر کوئی آوازیں دیتا ہے
ایک خاتون نے بتایا کہ میں 16 سال سے ایک بیماری کا شکار ہوں، میرے ہاں جب بیٹے کی پیدائش ہوئی تو اس کے بعد سے مجھے ایسا لگتا تھا کہ جیسے کوئی باہر سے کوئی مجھے آوازیں دے رہا ہے۔
ایک بار میں وہ آواز سن کر گھر سے ایسے ہی باہر بغیر دوپٹے کے نکل آئی جس کے بعد میرے شوہر علاج کیلیے یہاں لے آئے، مجھے اب بھی آوازیں آتی ہیں کہ ایسا کرلو ویسا کرلو لیکن میں وہی کرتی ہوں جو میرا دل چاہتا ہے۔
آپ اگر کسی پاگل سے ملیں تو آپ کو اس کا یقین حیران کر دے گا وہ اپنی بات کا یقین دلانے کیلیے بڑی سے بڑی قسم کھا جائے گا۔
دنیا کا ہر پاگل دن میں خواب دیکھتا ہے اور وہ اس خواب کو حقیقت سمجھتا رہتا ہے اور دنیا کا ہر پاگل بحث کا استاد ہوتا ہے اگر وہ اپنی پر آجائے تو آپ اسے بحث میں نہیں ہرا سکتے۔
گزشتہ سال کی ایک رپورٹ کے مطابق پاکستان کی آبادی کا 34 فیصد حصہ ذہنی دباؤ اور ڈپریشن کا شکار ہے۔ پاکستان میں 30ہزار ذہنی مریضوں کے لئے صرف ایک ڈاکٹر ہے۔ ذہنی امراض میں مینٹل ڈس آرڈر کی شرح 12۔7 فیصد سالانہ ہے۔
