اسلام آباد : پبلک اکاؤنٹس کمیٹی کے اجلاس میں توشہ خانہ کا 1997 سے پہلے کا ریکارڈ غائب ہونےکا انکشاف سامنے آیا ، جس پر کمیٹی نے 30 دن کے اندر ریکارڈ فراہم کرنے کی ہدایت کر دی۔

تفصیلات کے مطابق نوید قمر کی زیر صدارت پبلک اکاؤنٹس کمیٹی (پی اے سی) کا اجلاس ہوا، جس میں سیکریٹری کیبنٹ ڈویژن نے توشہ خانہ کے ریکارڈ سے متعلق بریفنگ دی۔

اجلاس کے دوران انکشاف ہوا کہ 1997 سے پہلے کا توشہ خانہ ریکارڈ کیبنٹ ڈویژن کے پاس موجود نہیں۔

سیکریٹری کیبنٹ کامران علی افضل نے بتایا کہ 1997 کے بعد کا تمام ریکارڈ دستیاب ہے تاہم اس سے پہلے کا ریکارڈ تلاش کرنے کی کوشش کی جا رہی ہے، آرکائیوز سے ریکارڈ نکالنے کی کوشش جاری ہے۔

سیکریٹری نے کہا کہ کسی بھی ملک سے ملنے والے تحائف ڈائریکٹ رکھنے کی اجازت نہیں ہونی چاہیے، اس حوالے سے قانون سازی کی تجاویز وزیراعظم آفس کو بھجوا دی گئی ہیں۔ نئے ایکٹ کے مطابق توشہ خانہ میں آنے والی ہر چیز کی نیلامی لازمی قرار دی جائے گی۔

اجلاس میں آڈٹ حکام نے انکشاف کیا کہ 1957 میں اُس وقت کے وزیراعظم نے اصل تحائف خود رکھے اور توشہ خانہ میں نقلی تحائف جمع کرائے گئے تاہم بیرونِ ملک سے ملنے والے تحائف کے بارے میں بھی اس وقت آگاہ نہیں کیا جاتا تھا۔

قائم مقام چیئرمین پی اے سی نے توشہ خانہ کا مکمل ریکارڈ فراہم نہ کرنے پر تشویش کا اظہار کیا اور کابینہ ڈویژن کو 30 دن کے اندر 1997 سے پہلے کا ریکارڈ فراہم کرنے کی ہدایت کر دی۔

اسلام آباد : پبلک اکاؤنٹس کمیٹی نے پرتگال میں بیوروکریٹس کی جائیدادوں کا نوٹس لیتے ہوئے متعلقہ افسران کی فہرست طلب کر لی۔

اسلام آباد: چیئرمین جنید اکبر کی زیر صدارت پارلیمنٹ کی پبلک اکاؤنٹس کمیٹی (پی اے سی) کا اجلاس ہوا، جس میں کمیٹی نے پرتگال میں بیوروکریٹس کی جانب سے جائیدادیں خریدنے کا نوٹس لے لیا۔

کمیٹی نے اسٹیبلشمنٹ ڈویژن اور وزارت داخلہ سے متعلقہ افسران کی فہرست طلب کر لی۔

اجلاس میں یوٹیلٹی اسٹورز کو بند کرنے کے معاملے پر بھی غور کیا گیا اور کمیٹی نے فیصلہ کیا کہ اس حوالے سے متعلقہ محکموں کو طلب کیا جائے گا۔

ممبر پی اے سی سید نوید قمر نے اجلاس میں کہا کہ حکومت نے یقین دہانی کرائی تھی کہ یوٹیلٹی اسٹورز بند نہیں ہوں گے، مگر اب انہیں بند کیا جا رہا ہے۔

انہوں نے مزید کہا کہ ملازمین کو نوکریوں سے نہ نکالنے کا وعدہ بھی پورا نہیں کیا گیا اور انہیں برخاست کیا جا رہا ہے۔

مزید پڑھیں : آدھی سے زیادہ بیور وکریسی پرتگال میں جائیدادیں لے چکی، خواجہ آصف

نوید قمر نے اس بات پر بھی زور دیا کہ پارلیمنٹ کو درست اور شفاف اطلاعات فراہم نہیں کی جاتیں، جو تشویشناک ہے۔

یاد رہے وزیر دفاع خواجہ آصف نے انکشاف کیا تھا کہ وطن عزیز کی آدھی سے زیادہ بیورو کریسی (افسر شاہی) پرتگال میں جائیدادیں لے چکی ہے۔

یہ بات انہوں نے سماجی رابطے کی ویب سائٹ ایکس سابقہ ٹوئٹر پر اپنے ایک پیغام میں کہی، ان کا کہنا تھا کہ نامی گرامی بیورو کریٹس اب وہاں شہریت لینے کی تیاری کر رہے ہیں، یہ مگرمچھ اربوں روپے کھا کر آرام سے ریٹائرمنٹ کی زندگی گزار رہے ہیں۔

اسلام آباد: جنید اکبر نے پبلک اکاؤنٹس کمیٹی کی چیئرمین شپ سےاستعفیٰ دے دیا اور کہا عہدہ پارٹی کی امانت تھا،پارٹی قیادت کی ہدایت پراستعفیٰ جمع کرایا۔

تفصیلات کے مطابق پاکستان تحریک انصاف کے رہنما جنید اکبر نے پبلک اکاؤنٹس کمیٹی کی چیئرمین شپ سے استعفیٰ دے دیا، انھوں نے استعفیٰ چیئرمین پی ٹی آئی بیرسٹر گوہر کے حوالے کردیا۔

رہنما نے کہا کہ عہدہ پارٹی کی امانت تھا، پارٹی قیادت کی ہدایت پر استعفیٰ جمع کرایا, بانی پی ٹی آئی کا فیصلہ دل سے قبول کرتا ہوں، بانی پی ٹی آئی چاہیں تو اسمبلی سے مستعفیٰ ہونے کو تیار ہوں۔

دوسری جانب پی ٹی آئی چیئرمین بیرسٹرگوہر نے کہا تھا کہ جنید اکبر سے متعلق مجھے گزشتہ رات ہدایات موصول ہوچکی ہیں، بانی پی ٹی آئی کی تمام ہدایات پر مکمل عملدرآمد کیا جاتا ہے، ان کا معاملہ ہماری پارٹی کا اندرونی معاملہ ہے۔

مزید پڑھیں : بانی پی ٹی آئی کی جنید اکبر کو چیئرمین پی اے سی کا عہدہ چھوڑنے کی ہدایت

یاد رہے بانی پی ٹی آئی کی جنید اکبر کو چیئرمین پی اے سی کا عہدہ چھوڑنے کی ہدایت کی تھی ، جس کے بعد رہنما پی ٹی آئی نے چیئرمین پی اے سی کا عہدہ چھوڑنے کی ہدایت کی تصدیق کرتے ہوئے کہا کہ وزیراعلیٰ خیبرپختونخوا کی جانب سے مجھے ہدایت مل چکی ہے، آفیشل چینل سے پیغام ملتے ہی عہدہ چھوڑ دوں گا۔

انھوں نے کہا تھا کہ مجھے ایسے پیغامات پہلے بھی مل رہے تھے، میں بانی پی ٹی آئی کی امانت انہیں لوٹانے کو تیار ہوں، مجھےحکم ہوا تو پارٹی عہدہ بھی چھوڑدوں گا۔