کراچی: وزیر اعلیٰ سندھ مراد علی شاہ کی ہدایت پر کراچی میں پرائس کنٹرول پروگرام شروع کر دیا گیا۔
کمشنر کراچی سلیم راجپوت نے اشیائے خورد و نوش کی قیمتوں کے نوٹیفکیشن جاری کر دیے ہیں، ترجمان وزیر اعلیٰ سندھ کا کہنا ہے کہ قیمتوں کو کنٹرول کرنے کے لیے انتظامیہ قیمتیں چیک کرے گی۔
ترجمان کے مطابق دودھ کی ڈیری فارمر قیمت 180، ہول سیل 188 اور ریٹیل 200 روپے فی لیٹر مقرر کی گئی ہے، جب کہ مرغی کے گوشت کی قیمت 598 روپے فی کلو مقرر کی گئی ہے۔
چینی کی ہول سیل قیمت 123 روپے فی کلو ریٹیل 130 روپے، ایکس فلورمل آٹے کی قیمت 120، ہول سیل 123 اور ریٹیل 128 روپے، اور فائن ایکس فلور مل آٹا 130، ہول سیل 133 اور ریٹیل 138 روپے قیمت مقرر کی گئی ہے، جب کہ چکی آٹے کی ریٹیل قیمت 140 روپے مقرر کی گئی ہے۔
شہر قائد میں گزشتہ کئی برسوں سے کمشنر کراچی اشیائے خورد و نوش کی قیمتیں کنٹرول کرنے میں بری طرح ناکام رہے ہیں، بالخصوص دودھ کی قیمت کے حوالے سے ڈیری فارمرز نے جس طرح من مانی کی اور سرکاری احکامات کو ہوا میں اڑایا، اس کی نظیر ماضی میں نہیں ملتی۔
