آج سے ڈیڑھ دو سال قبل سو روپے کے پانچ کلو آلو ملنا ایک عام سی بات تھی کچھ ملتا جلتا ایسا ہی معاملہ پیاز اور دیگر اشیاء کا بھی تھا جسے خریدنے کیلئے جیب پر اضافی بوجھ نہیں پڑتا تھا۔
لیکن آج صورتحال بہت زیادہ گھمبیر ہوچکی ہے اور اشیائے خوردونوش سمیت خصوصاً سستی سبزیوں کی قیمتیں بھی آسمان سے باتیں کررہی ہیں۔
دوسری جانب عام شہری اس مہنگائی کی چکی میں بری طرح پس چکا ہے لیکن متعلقہ اداروں کے افسران سب کچھ جاننے کے باوجود خاموش تماشائی بنے ہوئے ہیں۔
کراچی کے حوالے سے گفتگو کرتے ہوئے اے آر وائی نیوز کے نمائندے انور خان نے بتایا کہ شہر قائد میں سبزیوں کی قیمتیں بے قابو ہیں اور اس کی اصل وجہ یہ ہے کہ پرائس کنٹرول کمیٹیاں غیر فعال ہیں۔
انہوں نے کہا کہ پہلے سبزی کو غریب کے استعمال کی چیز سمجھا جاتا تھا لیکن اب یہ امیروں کے ہاں بھی کثرت سے پائی جاتی ہے جبکہ غریب اس کی پہنچ سے دور ہوتا جارہا ہے۔
دوسری جانب بازاروں میں خریداری کیلئے آنے والے شہری سبزیوں کا ریٹ سن کر ذہنی اذیت میں مبتلا ہوجاتے ہیں، ان کا کہنا ہے کہ ایسا لگتا ہے کہ مارکیٹ کو چیک کرنے والا کوئی نہیں ہے کیونکہ ٹماٹر اور پیاز کی قیمتیں ایک بار پھر عام آدمی کی دسترس سے باہر ہوگئی ہیں۔
