اسلام آباد: حکومت کی جانب سے پرائمری کی سطح پر آرٹیفیشل انٹیلی جنس کی تعلیم متعارف کرانے کا فیصلہ کرلیا گیا۔
تفصیلات کے مطابق سینیٹ کی قائمہ کمیٹی برائے انفارمیشن ٹیکنالوجی کا اجلاس ہوا، جس میں وزیر آئی ٹی شزہ فاطمہ نے قائمہ کمیٹی کو بریفنگ دیتے ہوئے کہا کہ اے آئی کو پرائمری سطح پرشروع کیا جارہا ہے، بچے بچیاں پرائمری سطح پر آرٹیفیشل انٹیلی جنس سیکھ کرآگے بڑھیں گے۔
وزیر آئی ٹی کا کہنا تھا کہ وفاقی حکومت نصاب پر نظرثانی کیلئے کام کررہی ہے، وزیر اعظم نے نصاب میں آئی ٹی تعلیم شامل کرنے کیلئے کمیٹی بنائی ہے، جن یونیورسٹیزکے آئی ٹی گریجویٹس کو نوکریاں نہیں ملیں ان کی سزا جزا ہونی چاہیے، ہائیر ایجوکیشن کمیشن کو ایسی یونیورسٹیز کی فنڈنگ روکنی چاہیے۔
ڈائریکٹر جنرل انٹرنیشنل کوآرڈینیشن کی تقرری کے معاملے پر قائمہ کمیٹی میں بحث ہوئی، چیئرپرسن کمیٹی نے کہا وزارت نے پہلے سے اس عہدے پر کام کرنیوالے شخص کودوبارہ رکھ لیا۔
وزیر انفارمیشن ٹیکنالوجی نے بتایا کہ ایم پی ٹواسکیل کیلئے حکومت نے معیار طے کیا ، ہماری کوشش ہے لوگوں کو توسیع نہ دی جائے، نئے لوگ لائے جائیں، ہم نے پہلے سے کام کرنیوالے کو موقع دینا ہوتا تو توسیع سے دے سکتے تھے۔
وزارت نے پوسٹ کی تشہیر کرکے تعیناتی کا نیاعمل شروع کیا، پوسٹ کو دوبارہ تشہیر دینے کا مقصد نئے لوگوں کو موقع دینا تھا۔
شزہ فاطمہ کا کہنا تھا کہ یہ پوزیشن نئے گریجویٹس کے لئے نہیں ہے، اس سال 5 لاکھ نوجوانوں کوآئی ٹی سرٹیفکیشن دینے جا رہے ہیں، گوگل، مائیکرو سافٹ ودیگر کمپنیز نے سرٹیفکیشن شروع کرنےکا اعلان کیا ہے۔
