اسلام آباد(26 جولائی 2025): وفاقی وزیر اورنگزیب کھچی کے پرائیویٹ سیکریٹری محمد بلال کو عہدے سے ہٹادیا گیا ہے۔
تفصیلات کے مطابق پاکستان نیشنل کونسل آف دی آرٹس نے وفاقی وزیر اورنگزیب کھچی کے پرائیویٹ سیکریٹری محمد بلال کو عہدے سےفارغ کردیا۔
محمدبلال نے کلاس فور کے ملازم محمد ابراہیم کو تھپڑ مارا تھا، محمد بلال کی معطلی ڈی جی پی این سی اے کی منظوری سے کی گئی، محمد بلال دوسال سے ریٹائرمنٹ کے بعد تنخواہ لے رہے تھے۔
واضح رہے کہ گزشتہ روز وفاقی وزیر برائے ثقافت و قومی ورثہ اورنگزیب کھچی کے دفتر کے باہر ایک افسوسناک واقعہ پیش آیا تھا جہاں ان کے پرائیویٹ سیکرٹری نے مبینہ طور پر ایک کلاس فور کے سرکاری ملازم پر تشدد کیا تھا۔
ذرائع کا اس حوالے سے کہنا تھا کہ پرائیویٹ سیکرٹری نے ملازم کو نہ صرف تھپڑ مارے بلکہ نازیبا زبان بھی استعمال کی، اس واقعے کے بعد ملازمین نے مطالبہ کیا ہے کہ واقعے میں ملوث شخص کے خلاف فوری کارروائی کی جائے۔
وفاقی وزیر برائے ثقافت و قومی ورثہ اورنگزیب کھچی کے دفتر کے باہر ملازم پر تشدد کے واقعے پر ایکشن لیتے ہوئے وفاقی وزیر ثقافت کے ڈائریکٹر محمد بلال کو معطل کردیا، وزارت ثقافت و قومی ورثہ نے ڈائریکٹر کو معطل کرنے کا نوٹی فکیشن بھی جاری کردیا۔
