لاہور: چیئرمین نیب جسٹس (ر ) جاوید اقبال نے کہا ہے کہ عدالتوں میں پراسیکیوٹرز کی عدم حاضری پر کیسز خارج نہیں ہونے چاہئیں۔
تفصیلات کے مطابق چیئرمین نیب کی زیر صدارت کرونا اقدامات پر اجلاس ہوا جس میں جسٹس (ر) جاوید اقبال نے کہا کہ عدالتوں میں نیب کیسز کی پیروی کے لیے پراسیکیوٹرز حاضری کو یقینی بنائیں۔
جسٹس (ر) جاوید اقبال کا کہنا تھا کہ عدالتوں میں پراسیکیوٹرز کی عدم حاضری پر کیسز خارج نہیں ہونے چاہئیں۔انہوں نے افسران کو نیب کے دفاتر میں صبح 9 سےدن 3 بجے تک حاضری یقینی بنانے کی بھی ہدایت کی۔
چیئرمین نیب نے کہا کہ تمام نیب دفاتر میں کرونا ایس او پیز پر عملدرآمد یقینی بنایا جائے،کرونا کی وجہ سے نیب کے تمام دفاتر میں مہمانوں کے داخلے پر پابندی پر بھی عملدرآمد کیا جائے۔
کرپشن کے خلاف آگاہی مہم کے عالمی ادارے بھی معترف ہوگئے: چیئرمین نیب
یاد رہے کہ گزشتہ روز چیئرمین نیب جسٹس(ر) جاوید اقبال کا کہنا تھا کہ کرپشن کے خلاف آگاہی مہم کی ٹرانسپرنسی انٹرنیشنل سمیت دیگر عالمی اداروں نے بھی تعریف کی ہے۔
چیئرمین نیب کا کہنا تھا کہ سرکاری و غیر سرکاری اداروں کے تعاون سے آگاہی مہم کو مزید مؤثر بنا رہے ہیں، تمام بینکوں کی اے ٹی ایم مشینوں پر کرپشن سے آگاہی کے پیغامات دیے جا رہے ہیں۔