Tag: پرسنل ڈیٹا پروٹیکشن بل

اسلام آباد : پرسنل ڈیٹا پروٹیکشن بل حتمی مراحل میں داخل ہوگیا ہے، بل کا مقصد پاکستانی صارفین کاتحفظ اورمعاشی سرگرمیوں کوفروغ دینا ہے، بل کی منظوری کے بعد ڈیٹا بین الاقوامی معیار کے مطابق محفوظ ہوسکے گا۔

تفصیلات کے مطابق وزارت انفارمیشن ٹیکنالوجی کے تحت پرسنل ڈیٹاپروٹیکشن بل حتمی مراحل میں داخل ہوگیا ہے ، بل میں پرائیویسی اور معاشی تسلسل کو برقرار رکھنے کے نکات شامل کئے گئے ہیں۔

بل کا مقصدپاکستانی صارفین کاتحفظ اورمعاشی سرگرمیوں کوفروغ دینا ہے، وفاقی وزیر برائے انفارمیشن ٹیکنالوجی امین الحق نے کہا کہ ڈیٹا پروٹیکشن بل کی تیاری میں تمام اسٹیک ہولڈرزکی مشاورت شامل ہے، پالیسی انفرادی صارف کیلئے ہے،بزنس کنزیومر اس میں شامل نہیں۔

امین الحق کا کہنا تھا کہ ڈیٹا بل میں سوشل میڈیا کمپنیوں کی پالیسیوں کو مدنظر رکھا گیا، بل انسانی حقوق،ڈیجیٹل رائٹس سمیت بنیادی حقوق کااحاطہ کرتاہے، بل کو قانونی شکل دینےکیلئے متعلقہ محکمے کو جلد ارسال کردیا جائے گا۔

وفاقی وزیر نے مزید کہا کہ پاکستان کےعام شہریوں کےڈیجیٹل ڈیٹا کا تحفظ یقینی بنانا ہے، بل کی منظوری کے بعد ڈیٹابین الاقوامی معیار کے مطابق محفوظ ہوسکے گا۔

یاد رہے وفاقی وزیر برائے انفارمیشن ٹیکنالوجی امین الحق نے ڈیجیٹل کوآپریشن آرگنائزیشن کی قائم مقام سیکریٹری کی وڈیو لنک سے ملاقات کی تھی ، جس میں امین الحق کا کہنا تھا کہ پاکستان کے ڈیجیٹل کوآپریشن آرگنائزیشن کے ممبر ممالک کے ساتھ اچھے تعلقات ہیں، پاکستان ڈیجیٹل کوآپریشن آرگنائزیشن کے مقاصد کے حصول کے لیے مکمل تعاون کرے گا۔