لندن: نیٹ فلیکس سیریز کی نئی اقساط میں پرنس ہیری نے اپنے بھائی پرنس ولیم کو میڈیا حملوں کا ذمہ دار قرار دے دیا، انھوں نے کہا پرنس ولیم کے معاونین میڈیا میں ہمارے خلاف منفی کہانیوں میں ملوث تھے۔
جمعرات کو نیٹ فلیکس پر جاری ہونے والی دستاویزی سیریز کی نئی اقساط میں شہزادہ ہیری نے برطانوی شاہی خاندان پر تازہ تنقید کی، انھوں نے پرنس ولیم کے معاونین پر ان کے خلاف میڈیا میں کہانیاں لیک کرنے کا الزام لگایا۔
پرنس ہیری نے کہا تین سال قبل جب میں نے سرکاری شاہی کردار کو چھوڑنے کے بارے میں بات کی تو ولیم (جو اب تخت کا وارث ہے) ان پر چیخ پڑا تھا، سیریز میں ہیری نے میگھن کے اسقاط حمل کے لیے پریس کو ذمہ دار قرار دیا۔
پچھلے ہفتے ریلیز ہونے والی اقساط کی پہلی قسط میں، پرنس ہیری نے شاہی خاندان پر کچھ زیادہ تنقید نہیں کی تھی لیکن آخری تین اقساط میں ہیری نے اپنے رشتہ داروں پر الزام لگایا کہ وہ نہ صرف پریس میں منفی کوریج کو روکنے میں ناکام رہے، بلکہ فعال طور پر اس کی حوصلہ افزائی کرتے رہے۔
انھوں نے کہا کہ یہ ایک گندا کھیل تھا، نہ صرف کہانیاں لیک کی جا رہی تھیں بلکہ بنائی بھی جا رہی تھیں۔
پرنس ہیری نے کہا کہ ہم دونوں بھائیوں نے اچھی طرح دیکھ لیا تھا کہ ہمارے والد اور والدہ شہزادی ڈیانا کی شادی کس طرح میڈیا کی چکاچوند کے درمیان ٹوٹی تھی، اس لیے ہم نے طے کیا تھا کہ ایسا دوبارہ کبھی نہیں ہونے دیں گے، لیکن میرے بھائی کے آفس نے وہی سب کچھ دہرایا جس سے میرا دل ٹوٹ گیا۔
انھوں نے سینڈرنگھم اسٹیٹ میں منعقدہ ایک سربراہی اجلاس کی یادیں سنائیں، جس میں انھوں نے مرحوم ملکہ الزبتھ، چارلز اور ولیم کے ساتھ شرکت کی تھی، ہیری نے کہا میرا بھائی مجھ پر چیخا چلایا، اور میرے والد نے ایسی باتیں کیں جو بالکل بھی سچ نہیں تھیں، اور میری دادی خاموشی سے وہاں بیٹھ کر یہ سب دیکھتی رہیں۔
واضح رہے کہ بکنگھم پیلس اور پرنس ولیم کے دفتر کنسنگٹن پیلس، دونوں نے کہا ہے کہ وہ ان دستاویزی فلموں پر کوئی تبصرہ نہیں کریں گے۔
