اسلام آباد : قومی اسمبلی میں اپوزیشن لیڈر شہبازشریف آج پبلک اکاؤنٹس کمیٹی(اے پی سی) کی صدارت کریں گے۔
تفصیلات کے مطابق قومی اسمبلی سیکرٹریٹ نے اپوزیشن لیڈر شہبازشریف کے پروڈکشن آرڈر جاری کردیے۔
پروڈکشن آرڈر کے مطابق مسلم لیگ ن کے صدر شہبازشریف 28،31 دسمبر اور یکم جنوری کو پبلک اکاؤنٹس کمیٹی کی صدارت کریں گے۔
اسپیکر قومی اسمبلی اسد قیصر کی جانب سے پروڈکشن آرڈر کی منظوری کے بعد ایڈیشنل سیکرٹری نے جاری کیے۔
پروڈکشن آرڈر کی کاپی چیئرمین قومی احتساب بیورو نیب ڈی جی (نیب) اور متعلقہ حکام کو بھی ارسال کردی گئی۔
اس سے قبل رواں سال 10 اکتوبر کو اسپیکر قومی اسمبلی اسد قیصر نے 17 اکتوبر کو قومی اسمبلی کے اجلاس میں شرکت کے لیے اپوزیشن لیڈر شہبازشریف کے پروڈکشن آرڈر جاری کیے تھے۔
شہبازشریف بلامقابلہ پبلک اکاؤنٹس کمیٹی کے چیئرمین منتخب
یاد رہے کہ گزشتہ ہفتے قومی اسمبلی میں قائد خزب اختلاف شہبازشریف بلامقابلہ پبلک اکاؤنٹس کمیٹی کے چیئرمین منتخب ہوئے تھے۔
بعدازاں پی اے سی کا چیئرمین منتخب ہونے پر شہبازشریف کا کہنا تھا کہ تمام اراکین کے اعتماد کا مشکور ہوں، سب کوساتھ لے کرچلوں گا، احتساب کا عمل شفاف ہوگا۔
کرپشن کیس: نیب نے شہبازشریف کو گرفتار کرلیا
واضح رہے کہ نیب لاہور نے رواں سال اکتوبرمیں شہباز شریف کو صاف پانی کیس میں طلب کیا تھا تاہم ان کی پیشی پرانہیں آشیانہ ہاؤسنگ اسکینڈل میں کرپشن کے الزام میں گرفتار کرلیا گیا تھا۔
