Tag: پرویز خٹک

کراچی: وزیر دفاع پرویز خٹک کا کہنا ہے کہ ایم کیوایم پاکستان ہمارے ساتھ تھی اور آئندہ بھی رہے گی، کوئی اتحادی ہمیں چھوڑ کر نہیں جا رہا، ہم ساتھ رہیں گے۔

تفصیلات کے مطابق کراچی میں پی ٹی آئی اور ایم کیو ایم پاکستان کے رہنماؤں کے درمیان ہونے والی ملاقات کے بعد میڈیا سے گفتگو کرتے ہوئے پرویز خٹک نے کہا کہ وزیراعظم نے وفد تشکیل دیا تھا، اتحادیوں سے بات کر رہے ہیں۔

انہوں نے کہا کہ ایم کیوایم پاکستان ہمارے ساتھ تھی اور آئندہ بھی رہے گی، کوئی اتحادی ہمیں چھوڑ کر نہیں جا رہا، ہم ساتھ رہیں گے، انشااللہ جلد خوشخبری دیں گے،عوام کومایوس نہیں کریں گے۔

وزیر دفاع نے کہا کہ ہماری خواہش ہے ایم کیوایم پاکستان دوبارہ کابینہ میں شامل ہو، چھوٹے چھوٹےمسائل ہیں جوجلد حل کر لیے جائیں گے، ایم کیو ایم پاکستان اب بھی حکومت کی اتحادی ہے۔

ایم کیو ایم کے رہنما خالد مقبول صدیقی نے کہا کہ پی ٹی آئی کی حکومت بنی تو ایم کیو ایم پاکستان نےغیرمشروط حمایت کی، حکومت میں شامل ہونے سے پہلے کچھ نکات پی ٹی آئی کو پیش کیے تھے۔

خالد مقبول صدیقی نے کہا کہ کوئی شخصی یا جماعتی مفاد نہیں، مسائل ہیں جنہیں حل ہونا چاہیے، 11 سال سے سندھ کے شہری علاقوں میں معاشی دہشت گردی کی گئی،18ویں ترمیم کے نام پر قوم کو دھوکا دیا گیا، وسائل پر توجہ نہیں دی گئی۔

ایم کیو ایم رہنما نے کہا کہ سندھ کے شہری علاقوں کے مسائل فوری حل طلب ہیں، ہم چاہتے ہیں سندھ کے شہری علاقوں کو جائز حصے سے فنڈزدیں، ناراضگی کی کوئی بات نہیں، چاہتے ہیں عوام کو فوری ریلیف دیا جائے۔

اسلام آباد: حکومت نے جہانگیر ترین اور پرویز خٹک کو اتحادی جماعتوں کو منانے کا ٹاسک دے دیا۔

تفصیلات کے مطابق پی ٹی آئی رہنما جہانگیر ترین اور وزیر دفاع پرویز خٹک سیاسی محاذ پر سرگرم ہوگئے، دونوں رہنما اتحادی جماعتوں کو منانے کے لیے ملاقاتیں کریں گے۔

وزیراعظم عمران خان کی ہدایت پر جی ڈی اے، بلوچستان عوامی پارٹی سے ملاقات کریں گے، دونوں رہنما کل (ق) لیگ، بی این پی قیادت سے بھی ملاقاتیں کریں گے۔

ذرائع کا کہنا ہے کہ ق لیگ سے ملاقات میں وزیراعلیٰ پنجاب عثمان بزدار بھی ہمراہ ہوں گے، جمعرات کے روز بی این پی مینگل کے سربراہ سے ملاقات طے ہوئی ہے۔

ذرائع کا کہنا ہے کہ جہانگیر ترین، پرویز خٹک اتحادیوں کو مطالبات پر ہونے والی پیش رفت سے آگاہ کریں گے۔

مزید پڑھیں: ہم اتحادی جماعتوں کو ساتھ لے کر چلیں گے ، وزیراعظم

واضح رہے کہ وزیراعظم عمران خان کا کہنا تھا کہ اتحادی جماعتوں نے حکومت کا ہر مشکل وقت میں ساتھ دیا، ہم اتحادی جماعتوں کو ساتھ لے کر چلیں گے اور تحفظات دور کریں گے۔

عمران خان کا کہنا تھا کہ اتحادی جماعتوں کےتحفظات ختم کرنے کیلئےحکومتی کمیٹی بنائی ہے، حکومتی کمیٹی کا تمام اتحادی جماعتوں کےساتھ رابطہ ہے، اتحادیوں کے تحفظات دور کیے جائیں گے۔

یاد رہے کہ پیر پگارا نے گورنر سندھ سے ملاقات میں کہا تھا کہ جہانگیر ترین کے ساتھ آپ آئے تھے، صرف ایم کیو ایم نہیں ہم بھی اتحادی ہیں، ہم نے وزارت کی شکایت نہیں کی حالانکہ ہمیں غیر اہم وزارت دی گئی۔

اسلام آباد: وزیر دفاع پرویز خٹک نے قومی اسمبلی میں خطاب کرتے ہوئے کہا ہے کہ مولانا کہتے ہیں یہ جرگہ ٹائم پاس ہے تو جاؤ ہم بھی ٹائم پاس کرتے ہیں۔

تفصیلات کے مطابق قومی اسمبلی کے اجلاس میں اپوزیشن کے ساتھ مذاکرات کے لیے بنائی گئی حکومتی کمیٹی کے سربراہ نے اپوزیشن کو مخاطب کرتے ہوئے کہا کہ ہماری بات پورا پاکستان سن رہا ہے تم بھی سن لو، آپ کی شکل پاکستان کو دکھانا چاہتا ہوں، کہ آپ پاکستان کے ساتھ کیا کر رہے ہیں۔

انھوں نے اپوزیشن سے کہا آپ میں جب برداشت کا مادہ نہیں تو کیسے اسمبلی میں بات ہوگی، ہم سارا دن ان کو سنتے ہیں، ایسا لگتا ہے ملک صرف ان کا ہے، آج جمہوریت اور قانون کی بات کی جا رہی ہے، یہ ہمیں سکھاتے ہیں جمہوریت اور قانون کیا ہے، میں اس سے قبل جہاں بھی تھا لیکن آپ کی شکل دیکھ کر پشیمان ہوں، شرمندہ ہوں، تبھی وزرات چھوڑ کر عمران خان کے ساتھ ہوں، میں انتظار میں تھا کہ پاکستان میں کوئی وفادار بندہ آ جائے۔

دریں اثنا، پرویز خٹک کے اظہار خیال کے دوران اپوزیشن نے شور شرابا کیا جس پر انھوں نے کہا یہ تماشا اب اور نہیں چلے گا، یہ جمہوریت کو نہیں مانتے، جمہوریت کی بات کرنے والے مولانا کو اسمبلی میں لائیں، کیا یہ ہے جمہوریت، ان لوگون نے ملک کا بیڑہ غرق کر دیا، ملک چلانا ہے اور جمہوریت چلانی ہے تو آکر ٹیبل پر بات کریں، دھرنے پر بیٹھے رہو مگر ملک کو نقصان مت پہنچائیں۔

اسلام آباد: اپوزیشن سے مذاکرات کے لیے قائم کی گئی کمیٹی کے سربراہ پرویز خٹک نے کہا ہے کہ رہبر کمیٹی کی شرط ہے کہ جلوس کو نہ روکا جائے، ہم نے ان کو جلوس کی اجازت دی ہے، لیکن وزیر اعظم کے استعفے پر بات نہیں کریں گے۔

تفصیلات کے مطابق آج اپوزیشن کے آزادی مارچ کے سلسلے میں مذاکرات کے لیے حکومتی کمیٹی کے سربراہ پرویز خٹک نے وزیر اعظم عمران خان سے فون پر رابطہ کیا، وزیر دفاع نے انھیں اپوزیشن کے ساتھ اب تک کیے گئے رابطوں سے آگاہ کیا اور کہا کہ رہبر کمیٹی سے کل باقاعدہ مذاکرات کی پہلی نشست ہوگی۔

بعد ازاں، پرویز خٹک نے وزیر اعظم کی ہدایت پر اتحادی جماعتوں کے رہنماؤں سے فون پر رابطے کیے اور ملاقاتیں طے کیں، انھوں نے گرینڈ ڈیموکریٹک الائنس کی رہنما فہمیدہ مرزا اور ایم کیو ایم کے وفد سے بھی ملاقات کی۔

قبل ازیں، پرویز خٹک نے کل ہونے والے مذاکرات پر بھی وزیر اعظم سے مشاورت کی، کے پی میں احتجاجی ڈاکٹروں سے مذاکرات پر بھی وزیر اعظم کو آگاہ کیا، وزیر اعظم نے ڈاکٹروں کے مسائل حل کرنے کے لیے کمیٹی تشکیل دینے کی منظوری دی۔

فہمیدہ مرزا اور ایم کیو ایم کے وفد سے ملاقات کے بعد میڈیا سے گفتگو کرتے ہوئے وزیر دفاع پرویز خٹک نے کہا کہ جب رہبر کمیٹی سے میٹنگ ہوگی تو کوئی لائحہ عمل طے ہوگا، ہم چاہتے ہیں کہ ملک میں جمہوریت چلے اور کوئی نقصان نہ ہو، رہبر کمیٹی کے مزید مطالبات پر بات کریں گے، کل میٹنگ میں امید ہے کہ فیصلہ ہو جائے گا۔

پرویز خٹک نے کہا ہم جلوس اور دھرنوں کے عادی ہیں، کسی کو آزادی اظہار سے نہیں روکا جائے گا، عدالت نے اجازت دے دی ہے تو ہم مظاہرین کو کیوں روکیں گے، ہم نے اپوزیشن کا مارچ میں رکاوٹ نہ بننے کا مطالبہ مان لیا ہے۔

ایم کیو ایم کے رہنما خالد مقبول نے کہا کہ ہم کسی کے بھی احتجاج اور مارچ کو اس کا جمہوری حق سمجھتے ہیں، اپوزیشن کو جلسے جلوس ریلیوں کا حق ہے وہ کریں، تاہم کسی سے استعفیٰ مانگنے کے لیے صرف دھرنا کافی نہیں ہوتا۔

جی ڈی اے کی فہمیدہ مرزا نے کہا کہ کل رہبر کمیٹی سے میٹنگ میں تمام فیصلے طے کیے جائیں گے، ہر چیز کو جمہوری طریقے سے ہینڈل کیا جانا چاہیے۔