Tag: پروین رحمان

کراچی : پروین رحمان کے اہلخانہ نے سندھ ہائی کورٹ فیصلے کے خلاف سپریم کورٹ میں اپیل دائر کرنے کا اعلان کردیا۔

تفصیلات کے مطابق پروین رحمان کے اہلخانہ کی جانب سے سندھ ہائی کورٹ کے فیصلے پر رد عمل آگیا ، اہلخانہ سندھ ہائی کورٹ فیصلے کے خلاف سپریم کورٹ میں اپیل دائر کریں گے۔

پروین رحمان اہلخانہ نے کہا کہ ملزم کی جانب سے ہمارے اہلخانہ کو خطرہ ہے ، جو افراد اورنگی پائلٹ پروجیکٹ میں کام کررہے ہیں ان کی بھی جان کو خطرہ ہے۔

اہلخانہ کا کہنا تھا کہ ملزمان کو فوری طور پر ایم پی او کے تحت بند کیا جائے اور سندھ حکومت فوری طور پر آج کے سندھ ہائیکورٹ کے فیصلے کیخلاف اپیل کرے۔

انھوں نے کہا کہ وفاقی حکومت اس طرح کے کیسزکو دیکھے ، اس طرح کے کیسز میں اہلخانہ کو انصاف نہیں ملتا ہے ، رحیم سواتی اوردیگر کے خلاف ٹھوس شواہد موجود ہیں۔

یاد رہے سندھ ہائی کورٹ نے پروین رحمان قتل کیس میں ملزمان کی سزاؤں کے خلاف اپیلوں پر فیصلہ سنایا تھا۔

عدالت نے ملزمان کی سزاؤں کے خلاف اپیلیں منظور کرتے ہوئے سزائیں کالعدم قرار دے دیں اور کہا تھا کہ ملزمان دوسرے کیسزمیں مطلوب نہیں تو رہا کر دیا جائے۔

کراچی: اورنگی پائلٹ پراجیکٹ پروین رحمان قتل کیس کے مرکزی ملزم رحیم سواتی کو گذشتہ روز خفیہ اطلاع پر منگھوپیر کے علاقے سے گرفتار کرلیا گیا۔

ایس ایس پی ویسٹ غلام اظفر مہیسر کا کہنا تھا دہشتگردوں نے اپنے مذموم مقاصد کی تکمیل کے لیے راستے میں رکاوٹ سمجھتے ہوئے پروین رحمان کو قتل کیا،گرفتار ہونے والے ملزم رحیم سواتی کی تصویر اے آر وائے نیوز نے حاصل کرلی۔

گرفتار ملزم رحیم سواتی عوامی نیشنل پارٹی کے ٹکٹ پر اورنگی کے علاقے سے کونسلر منتخب ہوا، ملزم نے زمینوں پر قبضے اور بھتہ خوری کے لیے گروہ تشکیل دیا، رحیم سواتی اپنے ساتھی ایاز سواتی کے ہمراہ پروین رحمان کی زمین پر قبضہ کر کے وہاں کراٹے سینٹر بنانا چاہتا تھا۔

ایس ایس پی ویسٹ کے مطابق ملزم لسانی و مذہبی دہشتگردی کی متعدد وارداتوں میں بھی ملوث رہا، جبکہ اس کے روابط کالعدم تحریک طالبان پاکستان سے بھی تھے۔

پروین رحمان قتل کیس میں ملزم کے دوساتھی پہلے ہی گرفتار ہیں جبکہ ایاز سواتی سمیت دو ساتھی بیرون ملک مفرور ہیں، گرفتار ملزم کے قبضے سے اسلحہ اور دستی بم برآمد کرلیا گیا۔

ذرائع کے مطابق سماجی کارکن کے قتل کی واردات کے یہ بعد مبینہ دہشت گرد کراچی سے فرار ہو گیا تھا، رحیم سواتی خیبرپختونخواہ میں بھی سیاست دانوں کے قتل میں ملوث رہا ہے، قانون نافذ کرنے والے ادارے کافی عرصے سے اس کی تلاش میں تھے۔