بھارت کی ریاست کرناٹک میں ایک دلخراش واقعہ پیش آیا، شادی شدہ شخص نے پرپوزل ٹھکرانے پر خاتون کو کار سمیت جھیل میں دھکیل دیا جس کے نتیجے میں خاتون جان کی بازی ہار گئی۔
بھارتی میڈیا کا اس حوالے سے کہنا ہے کہ واقعہ گزشتہ روز رونما ہوا، ڈوب کر ہلاک ہونے والی خاتون کی شناخت 32 سالہ شویتا کے نام سے ہوئی ہے جبکہ ملزم روی کو حراست میں لے لیا گیا ہے۔
بھارتی میڈیا رپورٹس کے مطابق تحقیقات سے معلوم ہوا ہے کہ شویتا اور روی کئی سال قبل ایک ہی دفتر میں ملازمت کے دوران ملے تھے، شویتا نے اپنے شوہر سے علیحدگی اختیار کر رکھی تھی اور اپنے والدین کے ساتھ زندگی بسر کررہی تھی۔
شادی شدہ شخص گزشتہ چند ماہ سے شویتا پر پرپوزل قبول کرنے کے لیے دباؤ ڈال رہا تھا اور اسے یقین دلا رہا تھا کہ وہ شویتا کے ہاں کہنے پر اپنی بیوی کو چھوڑ دے گا تاہم شویتا نے روی کے رشتے کی پیشکش مسترد کردی تھی۔
کرناٹک پولیس کا کہنا ہے کہ خاتون کے انکار پر مشتعل ہو کر روی نے شویتا کو اپنی کار میں بٹھایا اور گاڑی کو سیدھا چندانہلی جھیل میں لے جا کر ڈبو دیا۔
پانی سے بھرے گڑھے میں ڈوب کر 4 بچے جان سے گئے
رپورٹس کے مطابق ملزم تیر کر جھیل سے باہر نکل آیا جبکہ کار ڈوب گئی اور شویتا زندگی کی بازی ہار گئی۔
دوسری جانب ملزم نے پولیس کو اپنے بیان میں کہا ہے کہ کار حادثاتی طور پر جھیل میں جا گری اور وہ بمشکل ہی اپنی جان بچا سکا، اسے افسوس ہے کہ وہ شویتا کو ریسکیو نہ کرسکا۔پولیس نے مقدمہ درج کرکے مزید تحقیقات کا آغاز کردیا ہے۔