Tag: پریس کانفرنس

سعودی عرب میں آئل تنصیبات پر حملہ ، سعودی وزیر دفاع آج اہم پریس کانفرنس کریں گے

ریاض : سعودی وزیر دفاع آج آئل تنصیبات پر حملے سے متعلق اہم تفصیلات بتانے کیلئے پریس کانفرنس کریں گے، سعودی عرب کی آئل کمپنی آرمکو پر ہفتے کو ڈرون طیاروں سے حملہ کیا گیا تھا۔

تفصیلات کے مطابق سعودی عرب میں آئل تنصیبات پر حملہ سے متعلق سعودی وزیردفاع آج اہم پریس کانفرنس کریں گے، جس میں حملے میں استعمال ہتھیار کی تفصیلات بتائیں گے۔

گذشتہ روز سعودی فرمانروا شاہ سلمان نے کہا تھا کہ حملے صرف سعودی تنصیبات پر نہیں بلکہ عالمی معیشت پر کئے گئے، سعودی عرب بزدلانہ حملوں سے نمٹنے کی بھرپور صلاحیت رکھتا ہے، عالمی برادری ایسے حملوں کی روک تھام کے لیے سخت اقدامات کرے۔

مزید پڑھیں : تیل تنصیبات پر حملہ عالمی معیشت پر حملہ ہے: سعودی فرمانروا

دوسری جانب سعودی عرب کے ولی عہد محمد بن سلمان نے ایران کو ریاض، خطے اور عالمی سلامتی کے لیے خطرہ قرار دیا ہے۔

خیال رہے امریکا نے حملے کا ذمہ دار ایران کو ٹہراتے ہوئے سیٹلائٹ کی تصویر شئیرکی ہیں اور دعوی کیا تھا حملہ ایران کے جنوبی علاقے سے کیا گیا تاہم ایران نے حملے کے تمام الزامات کو مسترد کردیا تھا، ایرانی صدر کا کہنا تھا آئل تنصیبات پر حملہ یمن میں حملوں کی جوابی کارروائی پر ہوئے ۔

بعد ازاں سعودی عرب نے بھی اپنی تیل کی تنصیبات پر حملوں کا ذمے دار ایران کو قرار دیتے ہوئے کہا تھا کہ ابتدائی تحقیقات سے پتہ چلا ہے کہ تیل تنصیبات پر حملوں میں ایرانی ہتھیار استعمال کیے گئے۔

واضح رہے سعودی عرب کی آئیل کمپنی آرمکو پر ہفتے کو ڈرون طیاروں سے حملہ کیا گیا تھا اور یمن کے حوثی باغیوں نے ہفتے کوآئل کمپنی آرامکو پر حملوں کی ذمہ داری قبول کی تھی، ڈرون حملوں میں دنیا میں تیل صاف کرنے کا سب سے بڑا کارخانہ بھی متاثر ہوا ہے۔

ستمبر 18, 2019
پاکستان دنیا بھر میں کشمیریوں کا وکیل ہے: وزیر اعظم آزاد کشمیر

اسلام آباد: وزیر اعظم آزاد کشمیر راجہ فاروق حیدر کا کہنا ہے کہ پاکستان دنیا بھر میں کشمیریوں کا وکیل ہے، بھارت نے مقبوضہ کشمیر کو جیل میں تبدیل کردیا ہے۔

تفصیلات کے مطابق وزیر اعظم آزاد کشمیر راجہ فاروق حیدر نے پریس کانفرنس کرتے ہوئے کہا کہ آزاد کشمیر کےعوام مقبوضہ کشمیر کے عوام کی مدد کو بے تاب ہیں، پاکستان دنیا بھر میں کشمیریوں کا وکیل ہے۔

وزیر اعظم آزاد کشمیر نے کہا کہ بھارتی فوج ایل او سی پر بھی بے گناہ شہریوں کو شہید کر رہی ہے، ریاست مقبوضہ کشمیر کا دنیا بھر سے رابطہ منقطع کر دیا گیا۔

انہوں نے کہا کہ قربانیوں کی وجہ سے آج دنیا بھر میں مسئلہ کشمیر اجاگر ہو رہا ہے، بھارت نے مقبوضہ کشمیر کو جیل میں تبدیل کردیا ہے۔

گزشتہ روز وزیر خارجہ نے اقوام متحدہ کی انسانی حقوق کونسل کے اجلاس سے خطاب کرتے ہوئے کہا تھا کہ مقبوضہ کشمیر میں اشیائے خور و نوش اور دواؤں کی شدید قلت ہے، بھارت نے مقبوضہ کشمیر کو دنیا کی سب سے بڑی جیل بنا رکھا ہے۔

شاہ محمود قریشی کا کہنا تھا کہ بھارت نے 6 ہفتوں سے کشمیری حریت قیادت کو نظر بند کر رکھا ہے، بی بی سی رپورٹ میں کشمیری نے کہا کہ مجھ پر تشدد نہ کریں، گولی ماردیں۔ بھارت مقبوضہ کشمیر سے دنیا کی توجہ ہٹانے کی کوشش کر رہا ہے۔

انہوں نے کہا تھا کہ بھارت مقبوضہ کشمیر میں اکثریت کو اقلیت میں بدلنے کی کوشش کر رہا ہے، بھارت کی جانب سے ظلم و بربریت 21 ویں صدی میں کیا جا رہا ہے۔ بھارت مقبوضہ کشمیر میں آبادیاتی تناسب کو تبدیل کرنا چاہتا ہے۔

ستمبر 11, 2019
بھارتی اقدامات کے خلاف سلامتی کونسل میں جانے کا فیصلہ کیا ہے: وزیر خارجہ

اسلام آباد: وزیر خارجہ شاہ محمود قریشی کا کہنا ہے کہ بھارتی اقدامات کے خلاف سلامتی کونسل میں جانے کا فیصلہ کیا ہے۔ بھارتی وزیر خارجہ کا کہنا کہ ’کشمیر ہمارا اندرونی معاملہ ہے‘ کو مسترد کرتے ہیں۔

تفصیلات کے مطابق وزیر خارجہ شاہ محمود قریشی نے پریس کانفرنس کرتے ہوئے کہا کہ 28 ممالک سے مقبوضہ کشمیر سے متعلق اپنی تشویش سے اظہار کردیا، مقبوضہ کشمیر ایک متنازع مسئلہ ہے۔ بھارتی وزیر خارجہ نے یورپی یونین کی رہنما کو کہا یہ ہمارا اندرونی معاملہ ہے۔

وزیر خارجہ کا کہنا تھا کہ بھارتی اقدامات کے خلاف سلامتی کونسل میں جانے کا فیصلہ کیا ہے۔ بھارتی وزیر خارجہ کا کہنا کہ ’یہ ہمارا اندرونی معاملہ ہے‘ اس کو مسترد کرتے ہیں۔ بھارت کے 9 لاکھ فوجی مقبوضہ کشمیر میں تعینات ہیں۔

انہوں نے کہا کہ مقبوضہ کشمیر سے متعلق بھارتی مؤقف کہ کشمیر کی فلاح و بہبود کے لیے یہ اقدام کیا، کو مسترد کرتے ہیں۔ کیا 70 برس سے کشمیریوں کے لیے فلاح و بہبود پر کوئی قدغن تھی؟ مقبوضہ کشمیر کو جیل بنا دیا یہ فلاح و بہبود کا اقدام ہے؟ نہرو نے 14 بار وعدے کیے کشمیر کا فیصلہ عوام کی خواہش کے مطابق ہوگا۔

وزیر خارجہ کا کہنا تھا کہ ایک بڑی قوم ہونے کے ناطے ہم پیچھے نہیں رہ سکتے، کشمیر کی خصوصی حیثیت ختم کرنے کا فیصلہ سلامتی کونسل کی قراردادوں کے خلاف ہے۔ ہم نے کب مذاکرات سے انکار کیا یا اس سے کترائے ہیں؟ صدر ٹرمپ کی ثالثی کی پیشکش کس نے مسترد کی؟ یورپی یونین اگر معاملے میں کوئی کردار ادا کر سکتی ہے تو ادا کرے۔

انہوں نے کہا کہ کہا گیا کہ آرٹیکل 370 کا خاتمہ امریکا کی ملی بھگت سے کیا گیا، ہمارے وضاحت طلب کرنے پر ایلس ویلز کا واضح مؤقف سامنے آیا۔ ایلس ویلز نے بیان دیا کہ اس پر کوئی مشاورت نہیں کی گئی۔ ہم نے جو وعدہ کرتار پور راہداری پر کیا اس پر قائم ہیں۔ سکھ برادری کو بھارت سے معاملے پر وضاحت طلب کرنی چاہیئے۔

وزیر خارجہ کا کہنا تھا کہ پاکستان نے فضائی حدود محدود نہیں کیں، افغانستان کے ساتھ جو اچھے تعلقات ہیں وہ برقرار رہیں گے۔ افغان بھائیوں کو کسی قسم کی تکلیف میں نہیں ڈالیں گے۔ ممکن ہے مقبوضہ کشمیر سے توجہ ہٹانے کے لیے بھارت پلوامہ جیسا نیا ڈرامہ رچائے۔ آج بھی عالمی برادری کو کہتا ہوں کشمیریوں کو کچلیں گے تو ردعمل بھی آئے گا۔

انہوں نے کہا کہ فیصلہ کر لیا گیا ہے اب سمجھوتہ ایکسپریس بھی نہیں چلے گی۔ پاکستان مکمل طور پر تیار ہے، کسی بھی جارحیت کا بھرپور جواب دیا جائے گا۔ بھارت میں بھی ایک بڑا طبقہ ہے جو مودی کے فیصلے کے خلاف ہے۔ بھارتی ہائیکورٹ بھی کہہ چکی ہے اس اقدام کی کوئی قانونی حیثیت نہیں۔ مودی کی سوچ نہیں اقوام متحدہ کی قرارداد کا پابند ہوں اور وہ بھی ہیں۔

وزیر خارجہ کا مزید کہنا تھا کہ دنیا کو پیغام دینا چاہتے ہیں کہ ہم تمام اقلیتوں کا احترام کرتے ہیں، خواہش ہے دوسری جانب سے بھی کچھ لوگ مسلمانوں پر ظلم پر بات کریں۔ پاکستان سیاسی اور سفارتی آپشنز کی طرف دیکھ رہا ہے، ملٹری آپشن زیر غور نہیں۔ بھارت ہمیں کہہ رہا ہے پاکستان فیصلوں پر نظر ثانی کرے، ہم پوچھتے ہیں کیا بھارت اپنے فیصلوں پر نظر ثانی کے لیے تیار ہے؟ اگر ہاں تو آئیں مل کر نظر ثانی کرتے ہیں۔

اگست 8, 2019
عوام کی خواہش ہے جلد از جلد ریکوری ہو: شہزاد اکبر

اسلام آباد: وزیر اعظم کے معاون خصوصی برائے احتساب شہزاد اکبر کا کہنا ہے کہ ایک ہی رقم کو چھپانے کے لیے ملٹی پل طریقے اختیار کیے جاتے ہیں، عوام کی خواہش ہے کہ جلد از جلد ریکوری ہو۔ نیب بھی قانون کے تحت اثاثے منجمد کر رہا ہے۔

تفصیلات کے مطابق وزیر اعظم کے معاون خصوصی برائے احتساب شہزاد اکبر نے پریس کانفرنس کرتے ہوئے کہا کہ عوام غریب سے غریب تر ہوتی گئی حکمران امیر ہوتے گئے، شہباز شریف کہتے ہیں میں لندن عدالتوں میں جانے کو بے قرار ہوں۔ لندن کی عدالتوں کی جانب سے ابھی تک کوئی لیٹر نہیں ملا۔

شہزاد اکبر کا کہنا تھا کہ 90 کی دہائی میں ایک خاندان نے خوب مال بنایا، کچھ چیزیں ہمارے سامنے آچکی ہیں اور کچھ آنا باقی ہیں۔ مخصوص خاندان نے ہنڈی کے ذریعے پیسہ بنایا، یہ منی ٹریل دینے سے محروم رہے، پیسہ باہر بھیجا گیا۔

انہوں نے کہا کہ سلمان شہباز کی جائیداد 90 فیصد ٹی ٹی پر کھڑی ہے، حمزہ شہباز، بھائی اور بہنوں کی جائیدادیں بھی ٹی ٹی پر چل رہی ہیں۔ ٹی ٹی پر سارا معاملہ چل رہا تھا کہ پاناما لیکس سامنے آگئی۔ پاناما لیکس صرف پاکستان نہیں پوری دنیا کے لیے تھا۔ پاناما لیکس سے متعلق ایک جے آئی ٹی بنائی گئی۔ ہل میٹل کیس سے متعلق سامنے آیا 85 فیصد رقم نواز شریف کو جاتی ہے۔

شہزاد اکبر کا کہنا تھا کہ رقم ملنے کے بعد نواز شریف اپنی بیٹی مریم نواز کو گفٹ کرتے ہیں، جے آئی ٹی رپورٹس میں مریم نواز کی جانب سے کچھ رقم کی نشاندہی ہوئی۔ سنہ 2014 میں ہل میٹل سے رقم آئی اور مریم صفدر کے اکاؤنٹ میں گئی۔ 17 ملین کی ٹی ٹی جس پر مریم صفدر کے دستخط ہیں۔ اگلی ٹی ٹی 19 ملین کی آئی جو مریم صفدر کے اکاؤنٹ میں گئی، یہ وہ ٹی ٹی ہیں جو مریم صفدر سرمایہ کاری کی صورت بتاتی ہیں۔ 9.9 ملین کی ٹی ٹی بھی ہل میٹل سے آئی۔

انہوں نے کہا کہ میری ذمہ داری منی لانڈرنگ کیسز کو دیکھنا ہے، ہل میٹل کیس میں 2 ہفتے پہلے نیب کو ایک خط بھی لکھ دیا ہے، شریف فیملی کی جانب سے آج تک کوئی منی ٹریل نہیں آئی۔ ہل میٹل میں حسین نواز مالک ظاہر ہو رہا ہے۔ ریکارڈ سے ظاہر ہوتا ہے منافع سے بھی زیادہ رقم واپس آتی تھی۔ حسین نواز بڑے فرمانبردار تھے منافع سے زائد رقم ابو اور بہن کو بھجواتے۔

معاون خصوصی کا کہنا تھا کہ اگلا جو بھی قدم اٹھانا ہے وہ نیب نے اٹھانا ہے، اس پر جو بھی چارہ جوئی کرنی پڑی کریں گے۔ ایک ہی رقم کو چھپانے کے لیے ملٹی پل طریقے اختیار کیے جاتے ہیں۔ جہاں پبلک آفس ہولڈر نہیں وہاں پر چیزیں سامنے لانی پڑتی ہیں۔ عوام کی خواہش ہے کہ جلد از جلد ریکوری ہو۔

انہوں نے کہا کہ نیب بھی قانون کے تحت اثاثے منجمد کر رہا ہے، قانون 2017 سے بنا تھا لیکن رولز نہیں تھے، اس قانون کے تحت جائیدادیں فوری طور پر ضبط ہوسکیں گی۔ ہمیں آئین کے دائرے میں رہتے ہوئے کام کرنا ہے۔ اسحٰق ڈار کی پراپرٹی پر بھی قانون کے مطابق کام شروع ہوا ہے۔ 16 دن کا دورانیہ ہے اس کے بعد اختیار ہوتا ہے جائیداد ضبط کرلی جائے۔

اگست 2, 2019
کرکٹ ٹیم کے چیف سلیکٹر انضمام الحق آج اہم پریس کانفرنس کریں گے

لاہور : سابق کپتان اور کرکٹ ٹیم کے چیف سلیکٹر انضمام الحق آج بروز بدھ لاہور میں ایک اہم پریس کانفرنس میں اپنے مستقبل کے حوالے سے اعلان کرکے قیاس آرائیوں کا خاتمہ کردیں گے۔

تفصیلات کے مطابق ورلڈ کپ کرکٹ ٹورنامنٹ میں پاکستانی ٹیم کے ساتھ سلیکشن معاملات پر شریک رہنے اور پھر نجی دورے پر چیریٹی کیلئے فنڈز جمع کرنے والے چیف سلیکٹر انضمام الحق گزشتہ روز لاہور پہنچے۔

پی سی بی نے اعلان کیا کہ ہے بدھ کو دوپہر ڈھائی بجے انضمام الحق لاہور میں پریس کانفرنس کریں گے۔ ذرائع کے مطابق اگر وہ خود استعفیٰ دیتے ہیں تو ورلڈ کپ کے بعد وہ پاکستانی ٹیم انتظامیہ میں عہدہ چھوڑنے والے پہلے اہم اور طاقتور شخص ہوں گے۔

ذرائع کا کہنا ہے کہ انضمام الحق اپنے مستقبل کے بارے میں پریس کانفرنس میں اہم اعلان کریں گے۔ یاد رہے کہ ورلڈ کپ کے ساتھ ہی قومی سلیکشن کمیٹی کے عہدے کی معیاد ختم ہوگئی ہے، پی سی بی نئی سلیکشن کمیٹی کیلئے نئے لوگوں کا
تقرر کرنا چاہتا ہے۔

اس کے علاوہ29 جولائی کو پی سی بی کرکٹ کمیٹی کے اجلاس سے قبل انضمام الحق اپنی پریس کانفرنس میں شکست کے اسباب پر بات کریں گے اور اپنے مستقبل کے بارے میں اعلان کریں گے۔

یاد رہے کہ تین سال قبل انضمام الحق کو قومی سلیکشن کمیٹی کا سربراہ مقرر کیا گیا تھا، ان کے دور میں پاکستان کی ٹیسٹ اور ون ڈے میں کارکردگی اچھی نہیں رہی۔

تاہم ان کی سلیکشن اور جانب داری پر سابق ٹیسٹ کرکٹرز بار بار بات کرتے رہے ہیں۔ انضمام الحق کی بطور چیف سلیکٹر عہدے کی معیاد اپریل میں ختم ہوگئی تھی انہیں ورلڈ کپ تک توسیع دی گئی تھی۔

جولائی 17, 2019
مخالفین گھوٹکی الیکشن میں اثرانداز ہونے کی کوشش کررہے ہیں، بلاول بھٹو زرداری

سکھر : چیئرمین پیپلزپارٹی بلاول بھٹو زرداری نے کہا ہے کہ مخالفین گھوٹکی الیکشن میں اثرانداز ہونے کی کوشش کررہے ہیں، دباؤ بھی ہے اور سازشیں بھی جنہیں ہم ناکام بنائیں گے۔

ان خیالات کا اظہار انہوں نے سکھر میں پریس کانفرنس سے خطاب کرتے ہوئے کیا، انہوں نے کہا کہ مخالفین گھوٹکی الیکشن میں اثرانداز ہونے کی کوشش کررہے ہیں، وہ الیکشن نہیں سلیکشن چاہتے ہیں، سردار مہر پر دباؤ ڈالا جا رہا ہے کہ پی پی چھوڑ کر الیکشن لڑیں۔

سکھر میں پریس کانفرنس کے دوران بلاول نے چیف جسٹس کو لکھا گیا خط بھی پیش کیا، چئیرمین پیپلزپارٹی نے کہا کہ انصاف کے بغیر کوئی ریاست وجود میں نہیں رہ سکتی، بطور سیاسی جماعت حق ہے آزاد ماحول میں انتخابات میں حصہ لیں۔

ان کا مزید کہنا تھا کہ دباؤ بھی ہے اور سازشیں بھی ہیں جنہیں ہم ناکام بنائیں گے، مخالفین کی کوششوں کے باوجود سلیکشن نہیں الیکشن ہوگا، آج حکومت کے خلاف سکھر سے پنجاب کی سرحد تک ریلی نکالیں گے۔

سکھر میں پریس کانفرنس کرتے ہوئے بلاول بھٹو زرداری نے کہا کہ وفاقی حکومت نے معیشت کا برا حال کردیا ہے، وفاق صوبوں کا معاشی قتل عام کررہا ہے۔

پنجاب اور خیبرپختونخوا کی طرح سندھ کے حق پر بھی ڈاکہ ڈالا جا رہا ہے، ہم مہنگائی، عوام دشمن بجٹ اور حکومت کے خلاف احتجاج کریں گے جب کہ پیپلزپارٹی عوامی خدمت پریقین رکھتی ہے۔

ہم نے مفت علاج اورصحت کوترجیح دی، سندھ کے ہر ضلع میں دل کے مرض کاعلاج مفت فراہم کیا جارہا ہے، سندھ کا مقابلہ دوسرے صوبوں سے نہیں بیرون ممالک سے ہورہا ہے۔

جولائی 13, 2019
ورلڈ کپ میں کافی کچھ سیکھا کافی غلطیاں بھی کی ہیں: امام الحق، بابر اعظم

لاہور: قومی کرکٹ ٹیم کے کھلاڑیوں بابر اعظم اور امام الحق کا کہنا ہے کہ ورلڈ کپ میں کافی کچھ سیکھا کافی غلطیاں بھی کی ہیں، بدقسمتی سے سیمی فائنل تک نہ پہنچ سکے۔

تفصیلات کے مطابق قومی کرکٹ ٹیم کے کھلاڑیوں بابر اعظم اور امام الحق نے پریس کانفرنس کی۔ پریس کانفرنس میں بابر اعظم کا کہنا تھا کہ میرا پہلا ورلڈ کپ تھا پہلے ہاف میں 2 میچ ہارے، سب نے اچھا پرفارم کیا۔ کافی کچھ سیکھا کافی غلطیاں بھی کی ہیں۔

بابر اعظم نے کہا کہ ہم اپنا 100 فیصد دے رہے تھے، انگلینڈ کے ساتھ سیریز اچھی رہی تھی۔ وکٹ دیکھ کر پلان کرنا ہوتا ہے۔ کوچ کا فیصلہ ہوتا ہے کس کو کھلانا ہے کس کو نہیں۔ ’میرے خیال سے ورلڈ کپ انگلینڈ کو جیتنا چاہیئے، ہمیں نہیں پتہ بھارت جان کر ہارا ہے یا واقعی شکست ہوئی‘۔

انہوں نے کہا کہ ہماری ٹیم کے سینئرز نے کبھی شو نہیں کروایا کہ وہ سینئر ہیں، ہمیں کبھی سوچنے بھی نہیں دیا کسی نے کہ وہ سینئرز ہیں۔ 15 کھلاڑیوں میں سے کوئی ریلو کٹا نہیں تھا۔

امام الحق کا کہنا تھا کہ تجربہ اچھا تھا، بدقسمتی سے سیمی فائنل تک نہ پہنچ سکے۔ انسان کافی غلطیوں سے سیکھتا ہے میں بھی سیکھوں گا۔ ٹیم میں رکھنا ہے یا نہیں یہ کام پاکستان کرکٹ بورڈ کا ہے۔

انہوں نے کہا کہ ہم جس طرح کھیلنے گئے تھے باقی ٹیمیں بھی کھیلنے آئی تھیں، ہمارے بلے بازوں نے اچھی پرفارمنس کی کوشش کی۔ 9 میں سے 5 میچ جیتے، اپنی کارکردگی مزید بہتر کروں گا۔ سب کا احترام ہے کوشش کرتا ہوں فینز خوش رہیں۔

امام الحق کا کہنا تھا کہ کوشش ہوتی ہے دورے پر سوشل میڈیا استعمال نہ کروں، ہماری بھی فیملی اور ذاتی زندگی ہے، تنقید کی ایک حد ہوتی ہے۔ ہر شخص پر نظر رکھیں گے تو پرفارم کرنا مشکل ہوتا ہے، تمام کھلاڑی محنت کرتے ہیں ہار کسی کو اچھی نہیں لگتی۔ ’پرفارمنس پر تنقید کریں مگر کسی کی ذاتیات میں نہ جائیں‘۔

انہوں نے کہا کہ افغانستان کی ٹیم میں ورلڈ کلاس اسپنرز تھے، افغانستان نے میچ میں بھارت کو بھی ٹف ٹائم دیا۔ جس طرح عماد وسیم نے میچ جتوایا اس پر توجہ دینی چاہیئے، آسٹریلیا کے خلاف میچ میں میری وجہ سے شروع میں ناکامی ہوئی۔ بھارت سے ہار جائیں تو ہر چیز پر تنقید ہوتی ہے، ایسا کبھی نہیں ہو سکتا تنقید نہ ہو۔

جولائی 9, 2019
اب کرپشن پر کسی قسم کی خاموشی نہیں ہوگی: مراد سعید

اسلام آباد: وفاقی وزیر مواصلات مراد سعید کا کہنا ہے کہ مسلم لیگ ن اور پیپلز پارٹی نے ایک دوسرے پر کرپشن کے الزامات لگائے اور پھر خاموش ہوگئے۔ اب وہ دور نہیں، کرپشن پر کسی قسم کی خاموشی نہیں ہوگی۔

تفصیلات کے مطابق وزیر اعظم کے معاون خصوصی برائے احتساب شہزاد اکبر اور وفاقی وزیر مواصلات مراد سعید نے مشترکہ پریس کانفرنس کی۔ شہزاد اکبر کا کہنا تھا کہ گزشتہ چند دن سے اپوزیشن کا گروہ آپس میں مل گیا ہے، ان لوگوں کا کوئی نظریہ آپس میں نہیں ملتا۔

شہزاد اکبر کا کہنا تھا کہ صرف لوٹ کھسوٹ بچانے کے لیے الگ الگ نظریوں کے لوگ مل گئے، نوے کی دہائی میں یہی لوگ ایک دوسرے کو جیلوں میں ڈالتے تھے، پاکستان کے عوام نے 30 سالہ کرپٹ لوگوں سے جان چھڑانے کا فیصلہ کیا۔ گزشتہ 10 سالوں میں پاکستان کے قرضوں میں ہوشربا اضافہ کیا گیا۔

انہوں نے کہا کہ وزیر اعظم عمران خان نے پہلی تقریر میں ہی کہا احتساب سب کا ہوگا، ماضی کی غلطیوں کو ٹھیک کیے بغیر آگے نہیں جا سکتے۔ چھانگا مانگا کی سیاست پاکستان کی سیاست کو تباہ کرنا تھا۔ عوام نے فرسودہ نظام کے خلاف عمران خان کو ووٹ دیا۔

شہزاد اکبر کا کہنا تھا کہ جے آئی ٹی نے بتایا کس طرح انہوں نے اداروں کو مفلوج کیا۔ کس طرح اسٹیٹ بینک، ایف آئی اے اور ایس ای سی پی کو مفلوج کیا گیا۔ ایان علی اور بلاول بھٹو ایک ہی اکاؤنٹ سے ٹکٹ لیتے تھے۔ وزارت داخلہ کو معلوم تھا مگر کوئی کارروائی نہیں کی گئی۔ اومنی گروپ کی جے آئی ٹی نے انسٹی ٹیوشنل کیپچر کا بڑا انکشاف کیا۔

انہوں نے کہا کہ سپریم کورٹ نے ان لوگوں کو سسلین مافیا ڈیکلیئر کیا، مافیا اس لیے کہا جاتا ہے کہ پورے نظام کو جکڑا ہوا ہے۔ ان لوگوں نے ہر نظام کو اپنے تابع کیا ہوا ہے۔ دھیلے کی کرپشن نہیں کی کہنے والے نے اپنی سلطنت کھڑی کی ہوئی تھی۔ نیب افسران کو 2 دن پہلے شہباز شریف دھمکیاں دے کر گئے۔ دھمکیوں سے ہم ہرگز نہیں گھبرائیں گے۔

معاون خصوصی کا کہنا تھا کہ گزشتہ روز ویڈیو پیش کرنے والے کی اپنی کریڈیبلٹی تو دیکھیں، ویڈیو اس خاتون نے پیش کی جس پر خود جعلسازی کے الزامات ہیں۔

وفاقی وزیر مواصلات مراد سعید کا کہنا تھا کہ ن لیگ اور پیپلز پارٹی ایک دوسرے پر کرپشن کے الزامات لگاتے ہیں، دونوں پارٹیاں ایک دوسرے پر کرپشن کے الزامات کے بعد خاموش ہوجاتی ہیں اور کہتی ہیں ہم جمہوریت کے لیے خاموش ہوئے، جو بھی کرپشن میں ملوث ہوگا اس کا بلا امتیاز احتساب ہوگا۔

مراد سعید کا کہنا تھا کہ عمران خان نے قرضوں پر کہا یہ پیسہ کہاں لگایا ہے، سنہ 2015 میں جو پروجیکٹ دینا تھا اس کا ایم او یو 2 سال پہلے ہی ہوگیا تھا۔ شاہد خاقان عباسی کا کیس بھی چل رہا ہے اس کی حقیقت بھی سامنے لائیں گے۔ احسن اقبال کے بھائی کو پنجاب ہارٹی کلچر ٹاسک فورس کا چیئرمین لگایا گیا۔

انہوں نے کہا کہ اپنے حلقے لاڑکانہ کی سڑکوں کو بھی نہیں بخشا گیا، کنٹریکٹس کی تحقیقات کیں تو وہ بھی جعلی اکاؤنٹس والے نکلے۔ اب کسی سرکاری عمارت میں آگ نہیں لگے گی، ریکارڈ نہیں جلے گا۔ جاتی امرا کی فینسنگ پر 36 کروڑ روپے خرچ کیے گئے۔ عجیب حکمران تھے جنہوں نے اپنے علاج کا خرچہ بھی عوام سے وصول کیا۔

جولائی 8, 2019
ایک سزا یافتہ شخص کے الزامات کی کوئی حیثیت نہیں: صمصام بخاری

لاہور: پنجاب کے وزیر اطلاعات صمصام بخاری کا کہنا ہے کہ پہلی مرتبہ سزا یافتہ شخص عدلیہ، حکومت اور مخالفین پر الزامات لگا رہا ہے۔ ایک سزا یافتہ شخص کے الزامات کی کوئی حیثیت نہیں ہوتی۔

تفصیلات کے مطابق صوبہ پنجاب کے وزیر اطلاعات صمصام بخاری نے پریس کانفرنس کرتے ہوئے کہا کہ تاریخ میں پہلی مرتبہ کوئی سزا یافتہ جلسے کر رہا ہے، پہلی مرتبہ سزا یافتہ عدلیہ، حکومت اور مخالفین پر الزامات لگا رہا ہے۔

صمصام بخاری کا کہنا تھا کہ سیاست میں اس طرح گم ہوئے ہیں کہ ہیروز کو یاد نہیں کر پاتے، گزشتہ روز ایک فلاپ شو کی کوشش کی گئی۔ اگر حدیبیہ کیس کھل جاتا اس پر فیصلہ ہو جاتا تو وہ تو کرپشن کی ماں ہے، سزا یافتہ لوگ ملکی اداروں پر الزام تراشی کر رہے ہیں۔ رانا ثنا اللہ سے بہت کچھ نکلے گا، ان پر پہلی ایف آئی آر چنیوٹ میں ن لیگ والوں نے کروائی۔

انہوں نے کہا کہ ن لیگ کی ایک خصوصی بریگیڈ ہے جس کی سربراہی مریم نوازکرتی ہیں، ن لیگ کی اس بریگیڈ کا کام ہے کسی طرح اداروں کو ہٹ کریں۔ ہر پریس کانفرنس میں ایسا لگتا ہے ملک مخالف زبان بولی جارہی ہے، پرسوں کی پریس کانفرنس میں شہباز شریف کھوئے ہوئے گم نظر آئے۔ مریم صفدر شعلہ بیانی کرتی رہیں اور الزام لگاتی رہیں، جج صاحب نے تردید کردی۔ حکومت کا مطالبہ ہے کہ ٹیپ کا فرانزک ہونا چاہیئے۔

صوبائی وزیر کا کہنا تھا کہ منڈی بہا الدین میں جلسے کی اجازت نہیں دی گئی، جلسے کے مقام پر گراؤنڈ میں پانی بھرا ہوا تھا۔ عدلیہ پر مریم نواز کی جانب سے دباؤ ڈالنے کی کوشش کی گئی، براہ راست الزامات لگائے جا رہے ہیں۔ مستقبل میں ان کے مزید کیسز کھل رہے ہیں۔ ایسی گفتگو اور دباؤ ڈالا جا رہا ہے تاکہ ان کے کیسز پر اثر پڑے۔

انہوں نے کہا کہ دونوں جماعتوں پر کیس تحریک انصاف نے نہیں بنائے، دونوں پارٹیز کے ایک دوسرے کے خلاف بنائے ہوئے ہیں۔ ایک ہی آدمی کے اتنے اکاؤنٹس کیسے ہو سکتے ہیں، مریم نواز کے 2 بھائی مفرور ہیں عدالتوں میں پیش نہیں ہوتے۔ نواز شریف نے اسمبلی میں بیان دیا بعد میں کہا وہ سیاسی گفتگو تھی، مریم نواز نے کہا تھا بیرون ملک تو کیا پاکستان میں بھی جائیداد نہیں۔

صمصام بخاری کا مزید کہنا تھا کہ یہ تخت کی جنگ ہے، مریم بی بی تخت پر بیٹھنا چاہتی ہیں، شہباز شریف حمزہ شہباز کو تخت پر بٹھانا چاہتے ہیں۔ کل منڈی بہا الدین میں شہباز شریف نظر آئے ہوں تو بتا دیں۔ بانی ایم کیو ایم بھی پاکستان مخالف بیانیہ لے کر چل رہے تھے۔ یہ بھی ملک میں انتشار چاہتے ہیں۔ ایک سزا یافتہ شخص کے الزامات کی کوئی حیثیت نہیں ہوتی۔

جولائی 8, 2019
پنجاب میں ن لیگ کے 37 اراکین کا فارورڈ بلاک اسی ماہ بن جائے گا: شیخ رشید

اسلام آباد: وفاقی وزیر ریلوے شیخ رشید کا کہنا ہے کہ پنجاب میں ن لیگ کے 37 اراکین کا فارورڈ بلاک اسی ماہ بن جائے گا، جو لوگ چیخ رہے ہیں ان کی گرفتاری قریب ہے۔

تفصیلات کے مطابق وفاقی وزیر ریلوے شیخ رشید نے پریس کانفرنس کرتے ہوئے کہا کہ ہم نے رائل پام کا چارج سنبھال لیا ہے، بے نامی زمینوں میں ریلوے کو اربوں روپے کی جائیداد ملی، جو جائیداد ملی اس پر ہم نے کمیٹی بنا دی۔ ہم نے رواں سال 32 ارب پیسے کمائے، 4 ارب کا خسارہ ہے۔

شیخ رشید کا کہنا تھا کہ ہم تہذیب اور شالا مار باغ کا کیس بھی کرنے جا رہے ہیں، اخراجات میں تاریخی کمی کی ہے۔ ڈالر بڑھنے سے تیل میں 4 ارب کا نقصان ہوا، لاہور سے میانوالی کا ٹریک بھی بحال کرنے جا رہے ہیں، 10 ہزار ملازمین کے بیلٹ ہو رہے ہیں۔ ایم ایل ون پی سی این میں چلا گیا ہے۔ تمام ٹی ایل اے ملازمین کو بحال کرنے جا رہے ہیں۔

انہوں نے کہا کہ ہم نے 24 ٹرینیں چلائی ہیں، 60 لاکھ مسافر بڑھائے۔ آئندہ ماہ ایک فریٹ ٹرین کا ٹینڈر کرنے جا رہے ہیں۔ پرانے ٹریکس ہونے کی وجہ سے ہمیں مسئلہ ہے۔ 19 لوگوں کو نوٹس دے رہا ہوں فوری ریلوے کے پیسے واپس کریں۔ ریلوے میں بھرتیوں کو ڈبل کر رہے ہیں۔

وفاقی وزیر کا کہنا تھا کہ مسلم لیگ ن پنجاب میں 37 رکنی فارورڈ بلاک کے لیے تیار ہے، قومی اسمبلی میں بھی ن لیگ فارورڈ بلاک کا اعلان جلد ہوگا۔ رواں ماہ پنجاب میں ن لیگ کا فارورڈ بلاک بن جائے گا، قومی اسمبلی میں فارورڈ بلاک کے لیے ابھی نمبر کم ہیں۔

انہوں نے کہا کہ جتنے افراد چیخ رہے ہیں ان کی گرفتاری قریب ہے، جو سہولتیں سیاسی قیدیوں کو ہیں وہ سب کو ہونی چاہئیں۔ جیل میں انہیں سب سہولتیں مل چکی ہیں جھگڑا گھر کے کھانے پر ہے، ’انہیں گھر کا کھانا بھی کھانے دیں، یہ لوگ کھا کھا کر ہی مر جائیں گے‘۔ میری والدہ کا انتقال ہوا مجھے کسی نے پروڈکشن آرڈر پر نہیں بلایا، انہیں جیل میں 60 انچ کی اسکرین اور اے سی لگے ہوئے ہیں۔

شیخ رشید نے مزید کہا کہ شہباز شریف کو لیڈر آف اپوزیشن بنا کر سازش کی گئی، کوشش کی گئی شہباز شریف اپوزیشن لیڈر ہوگا تو بچ جائے گا۔ عمران خان دوبارہ جیتے گا اور یہ دوبارہ ہاریں گے۔ چیئرمین سینیٹ رہے یا نہیں سیاست پر کیا فرق پڑے گا۔ ہر پارٹی میں مافیا بیٹھی ہے کوئی چینی چور ہے تو کوئی آٹا چور ہے۔

انہوں نے کہا کہ جون تک جھاڑو پھر جائے گا، میری اگلی پریس کانفرنس سے پہلے اسحٰق ڈار کو لایا جا سکتا ہے، اللہ نے ان لوگوں کو سزا کے لیے دولت دی ہے۔

جولائی 6, 2019

Tag: پریس کانفرنس

مزید پڑھیں : تیل تنصیبات پر حملہ عالمی معیشت پر حملہ ہے: سعودی فرمانروا