Tag: پریس کانفرنس

رویت ہلال کا 5 سالہ کیلنڈر 15 ویں روزے سے پہلے تیار ہوجائے گا: فواد چوہدری

اسلام آباد: وفاقی وزیر برائے سائنس و ٹیکنالوجی فواد چوہدری کا کہنا ہے کہ رویت ہلال کا 5 سالہ کیلنڈر 15 ویں روزے سے پہلے تیار ہوجائے گا، کیلنڈر کو ماننے یا نہ ماننے کا فیصلہ کابینہ کرے گی۔

تفصیلات کے مطابق وفاقی وزیر برائے سائنس و ٹیکنالوجی فواد چوہدری نے پریس کانفرنس کرتے ہوئے کہا کہ وزارت اطلاعات میں بھی اصلاحات شروع کی تھیں، سرکاری ٹی وی پر اپوزیشن کو یکساں وقت دینے کے احکامات دیے۔

فواد چوہدری کا کہنا تھا کہ اشتہارات کے نظام میں شفافیت لانے کی کوشش کی، ایک ارب روپے کی اشتہارات کی بچت کر کے حکومت کو دی۔

انہوں نے کہا کہ قمری کیلنڈر 15 روز میں تیار کر لیا جائے گا، تمام علما قابل احترام ہیں، کوشش کریں گے سائنس پر انحصار کریں۔ سائنس و ٹیکنالوجی کے بغیر آگے نہیں بڑھ سکتے۔ رویت ہلال کا 15 ویں روزے سے پہلے 5 سال کا کیلنڈر تیار ہوجائے گا۔

فواد چوہدری نے کہا کہ وہ چاند دیکھنے کی کوشش کرتے ہیں جنہیں سامنے بیٹھا شخص دکھائی نہیں دیتا، کیلنڈر کو ماننے یا نہ ماننے کا فیصلہ کابینہ کرے گی۔ 100 سال سے پرانی دوربین سے چاند دیکھا جاتا ہے، ماڈرن دوربین سے دیکھنا حرام اور پرانی دوربین سے دیکھنا حلال ہے؟

انہوں نے کہا کہ وزارت سائنس و ٹیکنالوجی کے پاس 3 یونیورسٹیاں ہیں۔ 9 ویں سے بارہویں جماعت کے طلبہ کے لیے جدید لیب بنائی جائیں گی، یونیورسٹیاں سائنس کے طلبہ کے لیے نصاب تشکیل دیں گی۔ سائنس میں دلچسپی رکھنے والی لڑکیوں کے لیے الگ پروگرام چلایا جائے گا۔

وفاقی وزیر کا کہنا تھا کہ سنہ 2022 میں ہمارا پہلا خلا باز خلا میں جائے گا، خلا میں بھی بھارت کو مات دیں گے۔ اگست کے مہینے کو سائنس و ٹیکنالوجی کے مہینے کے طور پر منائیں گے۔ پاکستان بھر سے جس نے بھی جو چیز ایجاد کی انہیں شوکیس کیا جائے گا۔

فواد چوہدری نے مزید کہا کہ وزیر اعظم سیکریٹریٹ کو سولر انرجی پر منتقل کرنے جا رہے ہیں۔ 30 دیہاتوں کو صاف پانی کی سہولت فراہم کریں گے۔ ہلال اتھارٹی کو فنکشنل کیا جا رہا ہے، لیبارٹریز اپ گریڈ کریں گے۔

مئی 8, 2019
پولیو ویکسین سے بچوں کو دور رکھنا دہشت گردی ہے: صوبائی وزیر اطلاعات

پشاور: صوبہ خیبر پختونخواہ کے وزیر اطلاعات شوکت یوسفزئی کا کہنا ہے کہ پولیو ویکسین سے بچوں کو دور رکھنا دہشت گردی ہے، پاکستان سب کا ہے، اس کی ناکامی سب کی ناکامی ہوگی۔ ایک بچہ اگر معذور ہو جائے تو پوری فیملی متاثر ہوتی ہے۔

تفصیلات کے مطابق صوبہ خیبر پختونخواہ کے وزیر اطلاعات شوکت یوسفزئی نے پریس کانفرنس کرتے ہوئے کہا کہ پولیو کا ڈرامہ رچانے والے کو گرفتار کر لیا گیا ہے، ملزم نذر محمد نے کہا کہ اس نے کچھ کیا ہی نہیں۔ سازش کو میڈیا نے ناکام بنایا، گزارش ہے معاملے کو سیاسی ایشو نہ بنایا جائے۔

شوکت یوسفزئی کا کہنا تھا کہ جو اسپتال جلایا گیا اس کی تعمیر کا خرچہ اب کون دے گا؟ یہ ہمارا قومی ایشو ہے، ملک سے پولیو کا خاتمہ کرنا ہے۔ پاکستان سب کا ہے، اس کی ناکامی سب کی ناکامی ہوگی۔ ایک بچہ اگر معذور ہو جائے تو پوری فیملی متاثر ہوتی ہے۔

انہوں نے کہا کہ انسداد پولیو ویکسین سے بچوں کو دور رکھنا دہشت گردی ہے، کل کے واقعے میں ملوث افراد کے خلاف ایکشن لیا جائے گا۔ حکومت شہریوں کو پولیو ویکسین نہ پلانے کے مضر اثرات کا بتاتی ہے۔ کسی کے ساتھ زبردستی نہیں کرنا چاہتے۔

شوکت یوسفزئی کا کہنا تھا کہ ویکسین نہ پلانے سے بچوں کی زندگیاں خطرے میں پڑ جاتی ہیں، گھر کے بچوں کو پولیو ویکسین پلائی کچھ نہیں ہوا۔ پولیو ویکسین سے متعلق صرف خوف و ہراس پھیلایا جا رہا ہے۔

خیال رہے کہ گزشتہ روز پشاور میں انسداد پولیو مہم کے پہلے دن پولیو ویکسین کے ری ایکشن کی شکایت پر چند بچوں کو اسپتال لایا گیا تھا، خبر پھیلنے پر بے شمار خوفزدہ والدین اپنے تندرست بچوں کو بھی اسپتال لے آئے۔

اس دوران مشتعل مظاہرین نے ڈی ایچ او اسپتال کی دیواریں گرا دی تھیں اور عمارت کو آگ بھی لگا دی تھی۔

بعد ازاں خیبر پختونخواہ میں پولیو مہم کو ناکام بنانے کے لیے گھڑی گئی سازش اس وقت بے نقاب ہوگئی جب سوشل میڈیا پر وائرل ویڈیو نے ڈرامہ طشت از بام کر دیا۔

ویڈیو میں ایک شخص بچوں کو زبردستی اسٹریچر پر لٹا کر بے ہوشی کا ڈرامہ کرواتا دکھائی دیا جبکہ ویڈیو میں بچے تندرست دکھائی دے رہے تھے۔

بچوں سے بے ہوشی کا ڈرامہ کروانے والے ملزم نذر محمد کو بعد ازاں بڈھ بیر پولیس نے گرفتار کر لیا تھا جبکہ انسداد پولیو مہم کےخلاف احتجاج کرنے والے 12 افراد کے خلاف پرچہ بھی درج کرلیا گیا، علاوہ ازیں سرکاری املاک کا جلاؤ گھیراؤ کرنے والوں کے خلاف آپریشن بھی شروع کردیا گیا۔

وزیر صحت ہشام انعام کا کہنا تھا کہ سوچی سمجھی سازش کے تحت انسداد پولیو مہم کے خلاف آگ بھڑکائی گئی۔ ویکسین سے کسی بچے کی حالت نہیں بگڑی میری اپنی بیٹیوں نے بھی وہی قطرے پیے، مسجدوں سے اعلان کروا کر افراتفری مچائی گئی۔

اپریل 23, 2019
ایم کیو ایم پاکستان کا وزیر اعظم عمران خان سے سندھ میں مداخلت کا مطالبہ

کراچی: متحدہ قومی موومنٹ (ایم کیو ایم) پاکستان نے وزیر اعظم عمران خان سے سندھ میں مداخلت کا مطالبہ کردیا، ایم کیو ایم رہنما خالد مقبول صدیقی کا کہنا تھا کہ صوبائی خود مختاری کے نام پر عوام کے وسائل چھین لیے گئے۔

تفصیلات کے مطابق ایم کیو ایم رہنماؤں نے پریس کانفرنس سے خطاب کیا۔ خالد مقبول صدیقی کا کہنا تھا کہ سندھ میں چیف سیکریٹری بھی اندرون سندھ کے ہیں، جنہوں نے ملک دو لخت کیا اب وہ سندھ کو بھی تقسیم کر چکے ہیں۔

خالد مقبول صدیقی کا کہنا تھا کہ نیشنلائزیشن کے نام پر مہاجروں سے املاک چھینی گئیں، کوٹہ سسٹم نافذ کر کے سندھ کو پہلے ہی دو حصوں میں تقسیم کردیا گیا۔ پیپلز پارٹی کے رویوں نے سندھ کو تقسیم کیا، سندھ 2 ہیں صرف اعلان ہونا باقی ہے۔

انہوں نے کہا کہ اٹھارویں ترمیم میں ایم کیو ایم اور عوام سے دھوکہ کیا گیا، صوبوں کے وسائل کو فوری طور پر نچلی سطح پر منتقل کیا جائے۔ کراچی بہت تیزی سے پانی اور دیگر مشکلات کا شکار ہوتا جا رہا ہے۔ دیہی اور شہری کی تفریق اب لسانی تفریق میں تبدیل ہوچکی ہے۔

ایم کیو رہنما کا کہنا تھا کہ شہری علاقوں اور مہاجروں کو دیوار سے لگایا نہیں گیا چن دیا گیا ہے۔ شہری علاقوں کو جائز حق دینے کے لیے آئینی اقدامات کیے جائیں، دیہی علاقوں میں نوکری دے کر شہری علاقوں میں بھیجا جاتا ہے۔ کراچی میں کمشنر، ڈی سی اور دیگر کا تعلق اندرون سندھ سے ہے۔ کوٹہ سسٹم پر سندھ کے شہری علاقوں میں نفرت پیدا ہو رہی ہے۔

انہوں نے کہا کہ سندھ کے شہری علاقوں کی آبادی 4 کروڑ سے زیادہ ہے۔ وفاق کی ذمہ داری ہے نا انصافی کے خلاف اقدامات کرے، آرٹیکل 149 آئین کا حصہ ہے اور استعمال کرنے کے لیے ہے۔

ایم کیو ایم پاکستان نے عوامی طاقت دکھانے کا اعلان کرتے ہوئے خالد مقبول نے کہا کہ مسائل کے حل اور متعصبانہ پالیسیوں کے خلاف ہیں، ایم کیو ایم 27 اپریل کو باغ جناح میں عوامی طاقت کا مظاہرہ کرے گی۔ طاقت سے ایم کیو ایم پاکستان کو دبانے کی غلط فہمی جلد دور کردیں گے۔

انہوں نے کہا کہ پبلک سروس کمیشن کے افسر نوکریاں بچوں میں تقسیم کر رہے ہیں، کراچی اور حیدر آباد کے نوجوانوں کو نوکریاں دی جائیں۔ کراچی میں اندرون سندھ شناختی کارڈ والوں کے ڈومیسائل بنائے جا رہے ہیں۔ پاکستان ہماری پہلی اور آخری چوائس ہے۔

ایم کیو ایم رہنما نے مزید کہا کہ کراچی بحران کا شکار ہے پانی کے نام پر جھگڑے ہو سکتے ہیں، وزیر اعظم کراچی کے معاملات میں آئینی اختیارات استعمال کریں۔ سندھ کے شہری علاقوں کا مقدمہ لے کر عوام میں جا رہے ہیں۔

اپریل 13, 2019
کاروبار میں آسانی کے لیے اہم اصلاحات مکمل کرلی گئیں: مشیر تجارت

اسلام آباد: مشیر تجارت عبد الرزاق داؤد کا کہنا ہے کہ وزیر اعظم کی ترجیح کاروبار میں آسانی ہے۔ بہت اہم اصلاحات مکمل کرلی گئی ہیں، نئے طریقہ کار پر کمپنی رجسٹریشن 4 گھنٹے میں ہو رہی ہے۔

تفصیلات کے مطابق مشیر تجارت عبد الرزاق داؤد اور چیئرمین سرمایہ کاری بورڈ ہارون شریف نے مشترکہ پریس کانفرنس کی۔ ہارون شریف کا کہنا تھا کہ 15 اپریل کو عالمی بینک کی ٹیم پاکستان کا دورہ کرے گی، مختلف ملکوں کے سرمایہ کار دلچسپی کا اظہار کر رہے ہیں۔ غیر ملکی سرمایہ کاروں کے لیے کاروبار آسان بنا رہے ہیں۔

ہارون شریف نے کہا کہ گزشتہ 6 ماہ میں 8 ہزار کمپنیاں رجسٹرڈ ہو چکی ہیں، غیر ملکی کمپنیوں کی رجسٹریشن میں نمایاں اضافہ ہوا ہے۔ کمپنیوں کی جانب سے ادائیگیوں کو آن لائن کردیا ہے۔ ورلڈ بینک کے انڈیکس میں درجہ بندی بہتر کرنے کے اقدامات کر رہے ہیں۔ اراضی کی رجسٹریشن کا عمل بھی آسان بنا رہے ہیں۔

انہوں نے کہا کہ تعمیراتی کام کی اجازت کی منظوری کا عمل بھی آسان بنایا ہے، ہم ایشیا کی اکانومی کے برابر جگہ بنالیں گے۔ سرمایہ کار ہماری پالیسوں کا خیر مقدم کرتے ہیں۔ بورڈ آف انویسٹمنٹ فوکل یونٹ ہے۔

ہارون شریف کا کہنا تھا کہ اسٹینڈرڈ کے لیے پروڈکٹ کے ساتھ سرٹیفکیشن دینی چاہیئے، 8 ہزار کمپنیاں 8 ماہ میں رجسٹرڈ ہوئی ہیں۔ 6 ماہ پہلے بیس لائن دیکھی تو سنہ 47 طرح کی ادائیگیاں تھیں، ویب پورٹل سے اب ادائیگیاں ہونا شروع ہوگئی ہیں۔

مشیر تجارت رزاق داؤد کا کہنا تھا کہ وزیر اعظم کی ترجیح کاروبار میں آسانی ہے۔ بہت اہم اصلاحات مکمل کرلی گئی ہیں۔ عالمی بینک کی رپورٹ میں پاکستان کی درجہ بندی بہتر ہوگی۔ چین کے سرمایہ کاروں نے کاروبار میں آسانی پر زور دیا۔ پاکستان میں سوائے چند کمپنیوں کے کسی میں معیار نہیں۔

رزاق داؤد کا کہنا تھا کہ نئے طریقہ کار پر کمپنی رجسٹریشن 4 گھنٹے میں ہو رہی ہے۔ کاروبار کے لیے ٹیکس ادائیگی 47 سے کم کر کے 10 فیصد کردی۔ کراچی میں پراپرٹی رجسٹریشن عمل 208 دنوں سے 14 پر آگیا۔ لاہور میں پراپرٹی رجسٹریشن عمل 26 سے 15 دن کر دیا گیا۔

انہوں نے کہا کہ ہماری مصنوعات کا عالمی معیار نہ ہونا کم برآمدات کی وجہ ہے، 47 قسم کے وفاقی اور صوبائی ٹیکسوں کو کم کر کے 10 کیا۔ چین کے ساتھ آزاد تجارتی معاہدے پر پیشرفت ہوئی ہے۔ وزیر اعظم عمران خان 28 اپریل کو چین جا رہے ہیں۔ دورہ چین میں آزاد تجارتی معاہدے پر دستخط ہوں گے۔

مشیر تجارت کا مزید کہنا تھا کہ چین کو ایک ارب ڈالر کی مزید برآمدات شروع ہوچکی ہیں، درآمدات میں نمایاں کمی ہوئی ہے۔ امید ہے رواں سال 25 ارب ڈالر کی برآمدات حاصل کریں گے۔

اپریل 10, 2019
ورلڈ کپ میں کپتان کون ہوگا، مکی آرتھر نے بتادیا

لاہور:قومی کرکٹ ٹیم کے ہیڈ کوچ مکی آرتھر نے کہا ہے کہ ٹیم کے سینئر کھلاڑی فٹ اور ورلڈ کپ کے لیے تیار ہیں،ون ڈے سیریز سے کئی مثبت چیزیں سامنے آئیں، عابد علی کی کارکردگی نے بہت متاثر کیا، ورلڈ کپ اسکواڈ سے متعلق ہم بہت کلیئر ہیں۔

تفصیلات کےمطابق قذافی اسٹیڈیم میں پریس کانفرنس کرتے ہوئے مکی آرتھر کا کہنا تھا کہ ورلڈ کپ کے لیے ہمارے پاس ہرکھلاڑی کا انفرادی منصوبہ تیار ہے،انگلینڈ میں بھرپور تیاری کریں گے، تمام اہم کھلاڑیوں کو فٹنس کے معیار پر پورا اترنا ہوگا، فٹنس پر کبھی سمجھوتہ نہیں کیا جائےگا ۔

انہوں نے کہا کہ آسٹریلیاسے سیریزمیں5-0 سے شکست مایوس کن ہےلیکن دورے میں پانچ سنچریاں بنیں، آسٹریلیا کے خلاف ون ڈے سیریز میں نوجوان کھلاڑیوں کو موقع دیا تاکہ ٹیلنٹ کو دیکھ سکیں۔انہوں نے کہا کہ ون ڈے سیریز سے کئی مثبت چیزیں سامنے آئیں، عابد علی کی کارکردگی نے بہت متاثر کیا،

قومی ٹیم کے ہیڈ کوچ نے کہا کہ ورلڈ کپ سے قبل 11 میچز ملیں گے، انگلینڈ میں بھرپور تیاری کریں گے، تمام اہم کھلاڑیوں کو فٹنس کے معیار پر پورا اترنا ہوگا، فٹنس پر کبھی سمجھوتہ نہیں کیا، وہ ہمیشہ پہلی ترجیح ہے۔مکی آرتھر نے کہا کہ کھلاڑی اچھی کارکردگی پیش کریں، ہمیں اس پر کام کرنا ہے، آئندہ 2 روز میں سلیکشن کمیٹی کے ساتھ بیٹھیں گے اور کھلاڑیوں کا فٹنس ٹیسٹ 14 اپریل کو ہوگا۔

مکی آرتھر نے کہا کہ سرفراز احمد فرسٹ چوائس وکٹ کیپر ہیں اور وہ پاکستان ٹیم کے کپتان ہیں ،جب کہ محمد عامر بڑے میچ کا بولر ہے، اس کی فارم اچھی نہیں تھی،محمد عامر کی قومی اسکواڈ میں شمولیت کا فیصلہ انضمام الحق کے ساتھ نشست میں ہوگا۔مڈل آرڈر بلے باز عمر اکمل سے متعلق ہیڈ کوچ کا کہنا تھا کہ عمر اکمل کا رویہ دورے میں اچھا رہا اس نے متاثر کرنے کے لیے بہت محنت کی تاہم ان کا واقعہ بھی مجھے میڈیا منیجر نے بتایا۔ انہوں نے کہا کہ جو کھلاڑی ہمارے ساتھ کافی عرصے سے ہیں ان کے رویے میں فرق واضح ہے، بدقسمتی سے عمر اکمل دورے میں بڑی اننگز نہیں کھیل سکا۔

آسٹریلیا کے خلاف سیریز کےلئے شامل کیے جانے والے نئے کرکٹرز کو ماضی میں اس طرح کی ٹریننگ کے مواقعے نہیں ملے اس لیے معیار کا فرق بھی نظر آیا، ورلڈ کپ کے امیدواروں کی فٹنس کو لاہور میں جانچا جائے گا،جلد ہی معاون کو چز کے ساتھ ملاقات میں کھلاڑیوں کے مسائل اور ان میں بہتری لانے کے امکانات پر بات کروں گا۔

اپریل 2, 2019
وزیر اعظم 20 مارچ کو وی آئی پی جناح ایکسپریس کا افتتاح کریں گے: شیخ رشید

لاہور: وزیر ریلوے شیخ رشید کا کہنا ہے کہ وزیر اعظم 20 مارچ کو وی آئی پی جناح ایکسپریس کا افتتاح کریں گے۔ ساری دنیا بھارت کو انتہا پسند مانتی ہے، بھارت کے سارے اینکر میدان جنگ میں تھے۔

تفصیلات کے مطابق وفاقی وزیر ریلوے شیخ رشید نے پریس کانفرنس کرتے ہوئے کہا کہ ایم ایل ون، ٹو اور تھری کا ٹینڈر دینے جا رہے ہیں، سمجھوتہ ایکسپریس پیر سے بھارت روانہ ہوگی۔ ترکی سے معاہدے ترک کرنسی میں ہوں گے، 20 مارچ کو وی آئی پی جناح ایکسپریس کا وزیر اعظم افتتاح کریں گے۔

وزیر ریلوے کا کہنا تھا کہ ہم لوگ عالمی معیار کے مطابق پٹری کو اسٹینڈرڈ گیج پر کریں گے، بغیر ٹکٹ سفر کرنے سے نقصان کم کرنے کی کوشش کر رہے ہیں۔ رحمٰن بابا اور سکھر ایکسپریس بہت کامیابی سے چل رہی ہیں، 8 ٹرینیں 14 ٹرینوں تک پہنچ گئی ہیں۔

انہوں نے کہا کہ ریلوے نے 4 ماہ میں ایک ارب روپے کمائے، پاکستان کے اندر ریلوے کا جال بچھا دیں گے، ایئر پورٹ بند ہونے کے بعد ریلوے نے کمی پوری کی۔

شیخ رشید کا کہنا تھا کہ پاک فوج اور عمران خان متحد ہیں، میں وہ سیاستدان ہوں جو کشمیر کو اندر سے جانتا ہوں۔ بچہ بھی ان کا تھا، بارود بھی ان کا تھا جگہ بھی ان کی تھی۔ بھارت کے سارے اینکر میدان جنگ میں تھے، بھارت میں 400 چینل پاکستان کے چینلز کا مقابلہ نہیں کر سکے۔

انہوں نے کہا کہ بھارت کو کہتا ہوں تم امن سے رہو ہم امن سے رہیں گے، ڈی جی آئی ایس پی آر نے بڑا متحمل اور ذمے دارانہ بیان دیا۔ ہماری میزائل قوت بھارت سے زیادہ مضبوط ہے۔ ساری دنیا بھارت کو انتہا پسند مانتی ہے، بھارتی میڈیا اپنے مقام سے گر گیا، پاکستان کے الیکٹرانک اور پرنٹ میڈیا نے ذمے داری کا ثبوت دیا۔

شیخ رشید کا کہنا تھا کہ تھر ایکسپریس 600 مسافر لے کر کھوکھرا پار سے مونا باؤ روانہ ہوگئی، پیر کو سمجھوتہ ایکسپریس واہگہ سے بھارت جائے گی۔ پروازیں بند ہونے پر اضافی ویگنیں لگا کر مسافروں کی ضرورت پوری کی، ایمرجنسی کی صورت میں ملتان سمیت تمام اسٹشینوں پر ٹرینیں دی گئیں۔

انہوں نے کہا کہ ریلوے کے پاس 7 دن کا تیل تھا، وفاق نے 1.2 ارب کا ادھار تیل دیا، ایم ایل ون روک دیا ہے 27 اپریل کو چین جانے سے پہلے فیصلہ ہوجائے۔ رسالپور اور مغلپورہ ورکشاپ میں پرانی مشینوں پر روس سے معاہدہ کریں گے، مغربی محاذ ریلوے تبدیل کرنا ہے، کوئٹہ سے جیکب آباد تافتان کا ٹینڈر دیں گے۔

مارچ 2, 2019
ہم نے پہلے بھی اس قسم کے رویوں کا سامنا کیا ہے، آئندہ بھی کریں گے: آصف زرداری

اسلام آباد: سابق صدر اور پیپلز پارٹی کے شریک چیئرمین آصف زرداری کا کہنا ہے کہ آج ہمارے اسپیکر سندھ اسمبلی کو گرفتار کیا گیا ہے، ہم نے پہلے بھی اس قسم کے رویوں کا سامنا کیا ہے آئندہ بھی کریں گے۔

تفصیلات کے مطابق سندھ اسمبلی کے اسپیکر آغا سراج درانی کی گرفتاری کے بعد سابق صدر آصف زرداری نے پریس کانفرنس کی۔ اپنی پریس کانفرنس میں ان کا کہنا تھا کہ قوم کو یقین دلانا چاہتا ہوں بھارت نے جارحیت کی تو سب متحد ہوں گے۔

[bs-quote quote=”بھارتی جارحیت پر پاک فوج کے ساتھ کھڑے ہوں گے: آصف زرداری” style=”style-8″ align=”left”][/bs-quote]

انہوں نے کہا کہ جب میں صدر تھا اس وقت بھی اسی قسم کی صورتحال پیدا ہوئی تھی۔ اس وقت نابالغ حکومت کو سمجھ نہیں آرہی، بیک سیٹ ڈرائیور سیاست نہیں سمجھتا۔ ایران ہمارا پڑوسی ملک ہے انہیں شک ہے تو مشترکہ تحقیقات ہونی چاہیئے۔

سابق صدر نے کہا کہ بھارت جارحیت کی جرات کرے گا تو منہ توڑ جواب دیں گے، ’ہم سب پاک فوج کے ساتھ کھڑے ہوں گے‘۔

انہوں نے کہا کہ اپنے دور میں پارلیمنٹ کا مشترکہ اجلاس بلایا تھا، آج بھی کشمیر کے حوالے سے قرارداد آئی تو ساتھ دیں گے۔ ’ہم صوبوں کے حقوق کے ضرور جنگ لڑیں گے‘۔

آصف زرداری کا کہنا تھا کہ سعودی بھائیوں کے دورہ پاکستان کا خیر مقدم کرتے ہیں، سعودی بھائیوں کے دورے میں اپوزیشن کو دعوت نہیں دی گئی۔

انہوں نے کہا کہ آج ہمارے اسپیکر سندھ اسمبلی کو گرفتار کیا گیا ہے، ہم نے پہلے بھی اس قسم کے رویوں کا سامنا کیا ہے آئندہ بھی کریں گے، نیب کا سامنا کریں گے۔ ’جیل میرا دوسرا گھر ہے‘۔

سابق صدر کا کہنا تھا کہ ہمیں طاقت کی پیاس نہیں صرف مسائل حل کرنا چاہتے ہیں، شہباز شریف کو ضمانت ہونے پر مبارکباد دیتا ہوں۔ آغا سراج درانی کوئی چھپ کر تو نہیں بیٹھے تھے، کراچی سے ہی گرفتار کرلیتے۔

ایک سوال کے جواب میں انہوں نے کہا کہ چیئرمین نیب سپریم کورٹ کے جج تھے، میں انہیں نوابشاہ سے نہیں لایا تھا۔ ’ان کی تعیناتی پر پشیمانی ہے‘۔

خیال رہے کہ آج نیب کراچی نے آمدن سے زائد اثاثہ جات کیس میں اسپیکر سندھ اسمبلی آغا سراج درانی کو گرفتار کیا ہے، آغاسراج درانی پر سندھ سیکریٹریٹ کے فنڈز میں خرد برد کا بھی الزام ہے۔

گرفتاری کے بعد آغا سراج کو احتساب عدالت میں پیش کیا گیا جہاں ان کا 3روزہ راہداری ریمانڈ منظور کر کے نیب کے حوالے کردیا گیا۔

فروری 20, 2019
مستقبل میں پاکستان میں مزید سرمایہ کاری کریں گے: سعودی وزیر خارجہ

اسلام آباد: سعودی وزیر خارجہ عادل الجبیر کا کہنا ہے کہ پاکستان میں 20 ارب ڈالر کی سرمایہ کاری پہلا مرحلہ ہے، مستقبل میں پاکستان میں مزید سرمایہ کاری کریں گے۔ سعودی عرب میں پاکستانی شہریوں کے مسائل حل کریں گے۔

تفصیلات کے مطابق وزیر خارجہ شاہ محمود قریشی نے سعودی ہم منصب عادل الجبیر کے ساتھ مشترکہ پریس کانفرنس کی۔ شاہ محمود قریشی کا کہنا تھا کہ سعودی عرب کے ساتھ 20 ارب ڈالر کے ایم او یوز پر دستخط ہوئے ہیں۔

انہوں نے کہا کہ آئیں بائیں شائیں نہیں ہوگی عملی اقدامات ہوں گے، جو بھی معاہدے ہوئے ہیں ان پر عمل بھی ہوگا۔ ماضی کی نسبت اب اقدامات عوام کو نظر آئیں گے۔ پاکستان نے دوست ملک سے ویزا فیس سے متعلق درخواست کی تھی۔

وزیر خارجہ کا کہنا تھا کہ سعودی عرب نے باقاعدہ ویزا فیس میں کمی کی ہے، وزیر اعظم عمران خان نے سعودی ولی عہد سے قیدیوں سے متعلق بات کی۔ سعودی ولی عہد نے قیدیوں سے متعلق بھی یقین دہانی کروائی۔

انہوں نے کہا کہ سعودی عرب کے ساتھ 7 ایم او یوز پر دستخط کیے گئے، ایم او یوز کو عملی جامہ بھی پہنایا جائے گا۔ وزیر اعظم نے حاجیوں کے لیے امیگریشن کی درخواست بھی کی۔ سعودی عرب کے ساتھ 10 مشترکہ ورکنگ گروپ بھی بنائے گئے ہیں۔

شاہ محمود قریشی نے مزید کہا کہ جوائنٹ ورکنگ گروپ کو ہر 3 ماہ بعد ملنے کا شیڈول دیا گیا ہے، پاکستان اور سعودی قیادت کے درمیان سال میں ایک بار ملاقات طے پائی ہے۔

سعودی ہم منصب عادل الجبیر کا کہنا تھا کہ بہترین استقبال پر پاکستانی قوم اور حکومت کے شکر گزار ہیں۔ سعودی عرب پاکستان کے ساتھ تعلقات کو بہت اہمیت دیتا ہے۔

انہوں نے کہا کہ پاکستان کے ساتھ مختلف شعبوں میں تعاون اور سرمایہ کاری کر رہے ہیں، دہشت گردی ایک مشترکہ عالمی چیلنج بن چکا ہے۔ پاکستان سعودی عرب دہشت گردی کے خلاف کارروائیاں کر رہے ہیں۔

سعودی وزیر خارجہ نے کہا کہ ہم دنیا سے دہشت گردی کا خاتمہ چاہتے ہیں، پاکستان میں 20 ارب ڈالر کی سرمایہ کاری پہلا مرحلہ ہے۔ مستقبل میں پاکستان میں مزید سرمایہ کاری کریں گے۔

انہوں نے کہا کہ سعودی عرب میں پاکستانی شہریوں کے مسائل حل کریں گے۔ سعودی عرب کی ترقی میں پاکستانی ہنر مند اہم کردار ادا کر رہے ہیں۔ دونوں ملکوں کے روابط میں عوامی تعلقات کا اہم کردار ہے۔

عادل الجبیر کا کہنا تھا کہ سعودی عرب اور پاکستان کے تعلقات میں مزید پختگی آئے گی، دونوں ملکوں کی قیادت منصوبوں اور معاہدوں پر عملدر آمد کے لیے پرعزم ہے۔

انہوں نے کہا کہ 10 ارب ڈالر کی لاگت سے گوادر میں آئل ریفائنری قائم کر رہے ہیں، پاکستان میں مختلف شعبوں میں وسیع سرمایہ کاری کر رہے ہیں۔ پاکستان کو معاشی طور پر ایک مستحکم ملک کے طور پر دیکھنا چاہتے ہیں۔

سعودی وزیر خارجہ نے کہا کہ پاکستان کی ہر ممکن مدد، تعاون اور بھرپور سرمایہ کاری کر رہے ہیں، اسلامی تعاون تنظیم سمیت عالمی سطح پر دونوں ممالک کا مؤقف یکساں ہے۔ پاکستان اور بھارت پڑوسی ممالک ہیں، مذاکرات سے مسائل حل کر سکتے ہیں، امریکا اور طالبان کے درمیان مذاکرات انتہائی اہم ہیں۔

یاد رہے کہ گزشتہ روز سعودی ولی عہد شہزادہ محمد بن سلمان 2 روزہ دورے پر پاکستان پہنچے تھے، ان سے قبل سعودی حکام اور وزرا بھی پاکستان آئے تھے۔

سعودی ولی عہد اور وزیر اعظم عمران خان کے درمیان بالمشافہ ملاقات ہوئی تھی جبکہ متعدد اہم منصوبوں پر دستخط بھی کیے گئے تھے۔

فروری 18, 2019
سی ٹی ڈی پنجاب سےجان کوخطرہ ہے، جان سےمارنےکی دھمکیاں دی جارہی ہیں، خلیل کے ورثا کے وکیل

لاہور : سانحہ ساہیوال کےمتاثرہ خاندان کے وکیل شہبازبخاری کا کہنا ہے کہ سی ٹی ڈی پنجاب سےجان کوخطرہ ہے!جان سےمارنے کی دھمکیاں دی جارہی ہیں،کیس سے پیچھے ہٹنے کوکہا جارہا ہے، وزیراعظم ایک اور سانحے سے پہلے ایکشن لے لیں۔

تفصیلات کے مطابق سانحہ ساہیوال میں مقتولین کےورثاکےوکیل سیدشہبازبخاری نے پریس کانفرنس کرتے ہوئے کہا سی ٹی ڈی پنجاب سےجان کوخطرہ ہے مقتول خلیل کے بھائی جلیل اور مجھے جان سےمارنےکی دھمکیاں دی جارہی ہیں، ہمیں اپنی جان کی پرواہ نہیں صر ف انصاف چاہیے۔

[bs-quote quote=”ہمیں اپنی جان کی پرواہ نہیں صر ف انصاف چاہیے” style=”style-7″ align=”left” author_name=”وکیل شہباز بخاری”][/bs-quote]

وکیل شہبازبخاری کا کہنا تھا کہ گریڈ20کےسی ٹی ڈی افسر نے دھمکیاں دیں جس کی ریکارڈنگ ہے، ریکارڈنگ جےآئی ٹی کو دے کر ملنے والی دھمکیوں سےآگاہ کر دیا ، جےآئی ٹی کیاکارروائی کررہی ہے اس سےہمیں آگاہ نہیں کیا جارہا۔

سانحہ ساہیوال میں مقتولین کےورثاکےوکیل نے کہا ملزموں کوجوڈیشل کر دیا گیا، گواہوں کے بیانات قلمبندہورہےہیں، وزیراعظم عمران خان ورثاکے تحفظات سنیں، ایک اور سانحے سے پہلےایکشن لے لیں۔

ان کا مزید کہنا تھا کہ اپنے پیٹی بندبھائیوں کو بچانے کے لئے دھمکیاں دی جارہی ہیں، سی ٹی ڈی اس پورے معاملے کو سبوتاژ کرناچاہتی ہے۔

یاد رہے گذشتہ روزسانحہ ساہیوال کے نامزد 6 ملزمان کو ڈیوٹی مجسٹریٹ کی عدالت میں پیش کر کے جیل بھیج دیا گیا تھا۔

واضح رہے 19 جنوری کو ہونے والے سی ٹی ڈی کے مبینہ مقابلے میں 13 سالہ بچی کو ماں سمیت 4 معصوم شہریوں کو انتہائی بیدردی اور سفاکانہ طریقے سے گولیوں سے چھلنی کرکے موت کے گھاٹ اتار دیا تھا۔

سانحہ ساہیوال کی ایف آر درج کرلی گئی تھی، ایف آئی آر میں سی ٹی ڈی کے نامعلوم سولہ اہلکاروں کونامزد کیا گیا تھا، تھانہ یوسف والا میں درج مقدمہ نمبر 33/2019 کا مدعی مقتول خلیل کا بھائی جلیل ہے۔

بعد ازاں ساہیوال واقعے پروزیراعظم نے نوٹس لیتے ہوئے وزیراعلیٰ پنجاب کو تحقیقات کرکے واقعے کے ذمے داروں کے خلاف سخت کارروائی کا حکم دیا جبکہ وزیراعظم کی ہدایت پر فائرنگ کرنے والے اہلکاروں کو حراست میں لے لیا گیا اور محکمہ داخلہ پنجاب نے تحقیقات کے لیے جے آئی ٹی بنا دی تھی۔

جی آئی ٹی نے خلیل اور اس کے خاندان کے قتل کا ذمہ دار سی ٹی ڈی افسران کو ٹھہرایا تھا جبکہ پنجاب حکومت کی جانب سے ذیشان کو دہشت گرد قرار دیا گیا تھا۔

جنوری 28, 2019
ساہیوال واقعہ: سندھ حکومت کا نئے پولیس قوانین بنانے کا فیصلہ

کراچی: سندھ حکومت کے مشیر اطلاعات مرتضیٰ وہاب کا کہنا ہے کہ انہوں نے کہا کہ ہمارا نیا پولیس ایکٹ چیک اینڈ بیلنس کے ساتھ ہوگا۔ سندھ حکومت چیک اینڈ بیلنس پر قانون سازی کرے گی، پولیس کا احتساب ہونا چاہیئے۔

تفصیلات کے مطابق سندھ حکومت کے مشیر اطلاعات مرتضیٰ وہاب نے پریس کانفرنس کرتے ہوئے کہا کہ سندھ اپنا قانون بنائے گا۔ کچھ ایم پی ایز معاملات کو 3 دن کے اندر سندھ اسمبلی میں پیش کریں گے، یہ قانون قیدیوں کی بہتری کے لیے کارآمد ہوگا۔

مرتضیٰ وہاب کا کہنا تھا کہ یہ پہلا صوبہ ہے جو اہم معاملے پر قانون سازی کرنے جا رہا ہے، جعلی مبر پلیٹس کی روک تھام کے لیے وزیر اعلیٰ سندھ نے بات کی۔ ساہیوال واقعے پر میرے پاس الفاظ نہیں، واقعے کی شدید الفاظ میں مذمت کرتا ہوں۔

انہوں نے کہا کہ ہمارا نیا پولیس ایکٹ چیک اینڈ بیلنس کے ساتھ ہوگا۔ سندھ حکومت چیک اینڈ بیلنس پر قانون سازی کرے گی، پولیس کا احتساب ہونا چاہیئے۔ قانون سازی کے بعد ہم سپریم کورٹ سے رجوع کریں گے۔ کسی ادارے کو احتساب سے بالاتر نہیں ہونا چاہیئے۔

مشیر اطلاعات کا کہنا تھا کہ تحریک انصاف ذمہ داروں کے خلاف سخت سے سخت کارروائی کرے، ہمارے ملک کی عدلیہ آزاد ہے۔ جیلوں کی بہتری کے لیے اقدامات کر رہے ہیں۔ پیپلز پارٹی نے اپنے منشور میں پولیس اور جیل کے لیے قانون سازی کا وعدہ کیا تھا۔

انہوں نے کہا کہ کے الیکٹرک بجلی کی کمی پر جواب دے گی، نوری آباد پلانٹ سے 100 میگا واٹ اضافی بجلی کراچی کو دی گئی۔ کراچی میں بجلی کے بحران میں کمی آئی ہے۔

مرتضیٰ وہاب کا کہنا تھا کہ سندھ حکومت کی پرانی گاڑیوں کو نیلام کرنے کا فیصلہ کیا گیا ہے، جیلوں میں اصلاحات کے لیے قانون پر کابینہ کو بریفنگ دی گئی، جیل اور پولیس کے حوالے سے نئے قوانین بنائے جا رہے ہیں۔ ’عمارتوں کی ملکیت سے متعلق سپریم کورٹ جا رہے ہیں‘۔

جنوری 21, 2019