لاہور: وفاقی وزیر ریلوے شیخ رشید کا کہنا ہے کہ دنیا بھر کے سرمایہ کاروں کو ریلوے میں خوش آمدید کہتے ہیں۔ ریلوے کے اسپتال اور اسکولوں کی نجکاری کے لیے تیار ہیں۔
تفصیلات کے مطابق وفاقی وزیر ریلوے شیخ رشید نے پریس کانفرنس کرتے ہوئے کہا کہ آج پہلا دن ہے اہم فیصلے کیے ہیں، ریلوے کو رواں سال ہی خسارے سے نکالیں گے۔
انہوں نے کہا کہ ریلوے کے اخراجات میں 15 فیصد کمی کا فیصلہ کیا ہے، کرایوں سے مطمئن نہیں تھا 20 فیصد اضافے کا کہا ہے، کرپٹ عناصر کو معطل کروں گا، 3 افراد کو معطل کردیا ہے۔ تمام ٹرینوں میں 25 ستمبر سے وائی فائی کی سہولت بھی ہوگی۔
شیخ رشید کا کہنا تھا کہ آن لائن ٹکٹنگ کو بہتر بنایا جائے گا، 2 نئی ٹرینیں چلانے کا اعلان کر رہے ہیں۔ کوچز کی کمی ہے بدقسمتی ہے 606 کوچز خراب ہیں۔ ریل کوچز کے لیے پرائیویٹ لوگوں کو دعوت دے سکتے ہیں۔
انہوں نے کہا کہ 60 سال سے کھڑی گاڑیوں کو نیلام کردیں گے، ریلوے کے اسپتال اور اسکولوں کی نجکاری کے لیے تیار ہیں۔
شیخ رشید کا کہنا تھا کہ ریلوے ملازمین کے لیے 10 ہزار اپارٹمنٹ بنانے کا اعلان کرتے ہیں، ریلوے کا کوئی ملازم بے گھر نہیں ہوگا۔ ریلوے کی زمین پر جتنے قبضے ہیں انہیں خالی کروایا جائے گا۔
وزیر ریلوے نے مزید کہا کہ سٹی ایریا کے قر یب ریل پلازے بنائے جائیں گے، کراچی سے اس سال 10 بلین روپے چاہئیں۔ اوور سیز پاکستانی رابطے کر رہے ہیں آئیں ٹرینیں حاضر ہیں، ’اوور سیز پاکستانی آئیں ٹرینیں چلائیں اور سرمایہ لگائیں‘۔
انہوں نے کہا کہ کوئی چیز نہیں چھپاؤں گا، ناکامی ہوئی تو اس کا اعتراف کروں گا، ریلوے کا خسارہ ختم کرنے کے لیے کچھ بھی کروں گا۔ میڈیا مالکان آئیں ریلوے اسٹیشنز پر بڑی اسکرینیں نصب کریں۔ اسٹیشنز کی تزئین و آرائش کی جائے گی، اشتہارات سے مطمئن نہیں۔ 5 اسٹار ہوٹلز کے لیے ہمارے پاس زمین موجود ہے۔ تمام ریلوے کی زمینوں کے گرد درخت لگائیں گے۔
شیخ رشید نے کہا کہ کسی افسر کو تبدیل نہیں کیا، حلف لیا ہے کوئی جھوٹ نہیں بولے گا۔ نیب کے کیسز کو بھرپور تعاون فراہم کریں گے۔ 14 ہزار پل مارکیٹنگ کے لیے پیش کر رہے ہیں۔ ریلوے اسٹیشنز پر معذور افراد کے لیے خصوصی پیکج دیے جائیں گے۔
انہوں نے کہا کہ بہت سے سرمایہ کاروں نے سرمایہ کاری کے لیے رابطہ کیا ہے، دنیا بھر کے سرمایہ کاروں کو خوش آمدید کہتے ہیں۔ ریلوے اسپورٹس میں 5 سال کی فنانس دینے کا اعلان کیا ہے۔
شیخ رشید کا مزید کہنا تھا کہ زیارت کے لیے جانے والوں کے لیے پٹری کو بہتر کریں گے۔ کرپشن سے متعلق زیرو ٹالرنس ہے، برداشت نہیں کروں گا۔ کسی کو ریلوے سے شکایت ہے تو وہ ہمیں شکایت کر سکتا ہے، لاہور اسٹیشن پر 15 دن میں سیٹیں لگائی جائیں گی۔
