Tag: پری مون سون

  • پری مون سون کا سلسلہ شروع، کراچی میں رات گئے ہلکی بارش سے موسم خوشگوار ہوگیا

    پری مون سون کا سلسلہ شروع، کراچی میں رات گئے ہلکی بارش سے موسم خوشگوار ہوگیا

    پری مون سون بارشوں کا سلسلہ سندھ تک پھیل گیا، کراچی کے مختلف علاقوں میں رات گئے کہیں ہلکی کہیں درمیانے درجے کی بارش ہوئی۔

    تفصیلات کے مطابق کراچی کے  مختلف علاقوں میں کہیں ہلکی کہیں درمیانے درجے کی بارش سے موسم خوشگوار ہوگیا، رات گئے  ناظم آباد، نارتھ ناظم آباد، سائٹ ایریا، کے ڈی اے چورنگی میں بارش ہوئی۔

    گلستان جوہر، بلدیہ، اورنگی ٹاؤن، صدر، گلشن اقبال اور ملیر سمیت کراچی کے بعض علاقوں میں بھی ہلکی بارش کے بعد موسم خوشگوار ہوگیا۔

    اس کے علاوہ سندھ کے مختلف شہر حیدرآباد، سکھر، جیکب آباد، میرپورخاص، بدین، گولاڑچی اور ٹنڈوباگو میں تیز ہوا کے ساتھ بارش ہوئی۔

  • سندھ کے مختلف شہروں میں بھی پری مون سون کی بارشیں شروع

    سندھ کے مختلف شہروں میں بھی پری مون سون کی بارشیں شروع

    کراچی: پنجاب کے بعد سندھ کے مختلف شہروں میں بھی بارش کا سلسلہ شروع ہو گیا ہے۔

    تفصیلات کے مطابق سندھ کے مختلف شہروں میں بھی پری مون سون کی بارشیں شروع ہو گئی ہیں، رات گئے سکھر، گھوٹکی، شکارپور، جیکب آباد میں گرج چمک کے ساتھ بارش سے گرمی کا زور ٹوٹ گیا۔

    راولپنڈی، اسلام آباد، ٹیکسلا، گوجر خان اور مری میں وقفے وقفے سے بارش جاری ہے، محکمہ موسمیات کے مطابق کراچی میں 21 سے 22 جون کو بارش کا امکان ہے۔

    دادو، جامشورو اور حیدر آباد میں بھی منگل سے بدھ تک بارش کی توقع ہے، موسم کا حال بتانے والوں کا مزید کہنا ہے کہ موسلا دھار بارش کے باعث خیبر پختون خوا، گلیات، کشمیر اور گلگت بلتستان میں لینڈ سلائیڈنگ اور شمالی بلوچستان کے ندی نالوں میں طغیانی کا بھی خدشہ ہے۔

    اندرون سندھ بارش شروع ہوتے ہی مختلف شہروں کی بجلی مکمل طور پر بند ہو گئی، سکھر میں آندھی اور طوفانی بارش کے باعث ہائی ٹرانسمیشن لائن خراب ہو گئی، سکھر میں روہڑی ناکے پر آندھی سے درخت رکشے پر گر گیا، جس سے ایک شخص زخمی ہو گیا۔

    بجلی کی مین ٹرانسمیشن لائن خراب ہونے سے سندھ کے بیش تر اضلاع میں بجلی بند ہو گئی، صوبے کے 21 اضلاع تاریکی میں ڈوب گئے، متاثرہ علاقوں میں پنو عاقل، صالح پٹ، روہڑی، پرانا سکھر و دیگر شامل ہیں، آندھی اور طوفانی بارش کے باعث مواصلاتی نظام درہم برہم ہو گیا، سیپکو کے 80 سے زائد فیڈر ٹرپ کر گئے۔

    لاڑکانہ شہر اور گرد و نواح میں تیز ہواؤں، گرج چمک کے ساتھ بارش ہوئی، جس سے شدید گرمی کا زور ٹوٹ گیا، اور موسم خوش گوار ہو گیا، تاہم بارش کے باعث مختلف علاقوں میں بجلی بند ہونے سے شہریوں کو مشکلات کا بھی سامنا کرنا پڑا۔