Tag: پسٹل

کراچی: شہر قائد میں ایک چھوٹے ہوٹل پر لوٹ مار کی واردات کے دوران خراب پستول کا استعمال کیا گیا، یہ انکشاف سی سی ٹی وی فوٹیج میں ہوا، لیکن شہری خوف میں مبتلا ہونے کی وجہ سے اس کی طرف متوجہ نہ ہو سکے۔

تفصیلات کے مطابق کراچی شہر میں اسٹریٹ کرمنلز ایک بار پھر بے قابو ہو چکے ہیں، ان کی دیدہ دلیری اور شہریوں کے خوف کا یہ عالم ہے کہ خراب پستول سے بھی کام یاب وارداتیں ہو جاتی ہیں۔

بدھ 7 تاریخ کو کراچی کے علاقے اورنگی ٹاؤن میں پاکستان بازار میں ایک ہوٹل پر اکیلے ڈاکو نے ایسی ہی ایک کام یاب واردات کی جس میں اس نے خراب پستول کا استعمال کیا، ڈاکو اسلحے کے زور پر لوٹ مار کر کے بہ آسانی موقع واردات سے فرار ہو گیا۔

سی سی ٹی وی فوٹیج میں دیکھا جا سکتا ہے کہ ملزم کے پستول کا چیمبر اٹکا ہوا ہے، ملزم نے دوران واردات پستول کمر کے پیچھے رکھا تاکہ لٹنے والا اسے نوٹس نہ کر سکے، ماسک اور کیپ لگائے ملزم نے اس خراب اسلحے کے زور پر کچھ ہی دیر میں واردات کر ڈالی۔

ملزم نے لوٹ مار کے دوران ہوٹل ملازم کو تھپڑ بھی مارے، مسلح ملزم باقاعدہ ہوٹل ملازم کی تلاشی بھی لیتا رہا، جب کہ اس دوران ہوٹل کے باہر شہریوں کی آمد و رفت بھی جاری رہی۔

واضح رہے کہ ممکنہ طور پر ملزم کا پستول یا تو خالی تھا یا اس میں کوئی خرابی تھی کیوں کہ اگر پستول میں گولی نہ ہو اور چیمبر کھینچا جائے تب بھی اسی طرح پھنس جاتا ہے، جیسا کہ فوٹیج میں دیکھا گیا ہے لیکن اگر گولی پھنس جائے تب بھی چیمبر اٹک سکتا ہے۔