پاکستان سپر لیگ میں پشاور زلمی کے علی رضا اور ملتان سلطانز کے عبید شاہ میں سے کون بہتر بولر ہے کرکٹ ایکسپرٹس نے بتادیا۔
اے آر وائی نیوز کے اسپورٹس پروگرام میں سابق پاکستانی کرکٹر اور موجودہ تجزیہ کار باسط علی سے میزبان نے پی ایس ایل میں دو ابھرتے ہوئے بولرز کے حوالے سے سوال کیا کہ عبید شاہ کے بارے میں آپ کا کیا خیال ہے جس پر باسط علی کا کہنا تھا کہ مجھے علی رضا زیادہ بہتر لگا۔
باسط علی نے کہا کہ میں نے عبید شاہ کو بھی دیکھا ہے مگر مجھے سب سے زیادہ متاثر کن علی رضا لگا، ابھی میں عبید کو اس لائن میں نہیں دیکھ رہا۔
سینئر اسپورٹس صحافی شاہد ہاشمی نے کہا کہ اس کی باڈی اچھی ہے اور پیس بھی زیادہ ہے، کل اس نے جارحانہ سلیبریشن کی مکہ ایسا گھمایا جو عثمان خان کو لگ گیا۔
تاہم باسط علی ان کی بات سے متفق نظر نہیں آئے اور شاہد ہاشمی سے اختلاف کرتے ہوئے کہا کہ علی رضا کی پیس زیادہ ہے۔
اس موقع پر سابق وکٹ کیپر بیٹر کامران اکمل نے کہا کہ علی رضا کی پیس تھوڑی سی اوپر ہے، دونوں اچھے بولر ہیں کام کررہے ہیں اور محنتی بھی ہیں جبکہ دونوں ڈومیسٹک بھی کھیل رہے ہیں۔
