Tag: پشتو ادب

پشتو ادب کو اپنی فکر اور تخلیقات سے مالا مال کرنے والے خوش حال خان خٹک کی تلوار زنی اور سامانِ حرب میں مہارت بھی مشہور ہے۔ انھیں ایک جنگجو اور آزادی کے متوالے کی حیثیت سے یاد کیا جاتا ہے۔ وہ پانچ صدی قبل 25 فروری 1689ء کو اس دنیا سے رخصت ہوئے تھے، لیکن اپنی شاعری اور جذبہ حریّت کے سبب آج بھی انھیں یاد کیا جاتا ہے۔

خوش حال خان خٹک نے پشتو ادب میں اپنے کمالِ فن کا مظاہرہ کیا۔ خطاطی ان کا ایک حوالہ ہے، سُر اور ساز سے انھیں لگاؤ تھا اور تلوار کے دستے پر ان کی گرفت مضبوط تھی۔ اسی سبب وہ صاحبُ السّیف والقلم بھی کہلائے۔

خوش حال خان خٹک 1613ء میں پشاور کے نزدیک ایک گائوں اکوڑہ میں پیدا ہوئے۔ اوائلِ عمری میں یوسف زئی قبیلے کے سردار بنے۔ مغل دور میں شاہ جہاں نے ان کا حقِ سرداری قبول کیا، مگر اورنگزیب نے ایسا کرنے سے انکار کیا تو خوش حال خان خٹک نے اس کے خلاف علمِ حرّیت بلند کیا جس کے بعد وہ گرفتار کیے گئے اور قید کاٹی۔

رہائی کے بعد انھوں نے جھڑپوں اور لڑائیوں کے دوران مغل فوج کو متعدد بار شکست سے دوچار کیا۔ اس پر اورنگزیب خود ان کی سرکوبی کے لیے آیا اور اس موقع پر انھیں شکست ہوئی۔

خوش حال خان خٹک نے تقریباً چالیس ہزار اشعار یادگار چھوڑے جن میں تغزل سے بڑھ کر واقعاتی رنگ غالب ہے۔ بیش تَر کلام رجزیہ ہیں۔ ان کے اشعار میں جوش و ولولہ، آزادی کا موضوع اور مغلوں کی مخالفت پڑھنے کو ملتی ہے۔ خوش حال خان خٹک پر علم و ادب سے وابستہ شخصیات نے بہت کچھ لکھا اور ان کی شاعری اور فکر و نظریہ پر تحقیق کے بعد کئی کتب منظرِ عام پر آچکی ہیں۔ پشتو کے اس مشہور شاعر کا مدفن اکوڑہ خٹک میں ہے۔

قومی زبان کے علاوہ پاکستان میں مقامی زبانوں میں بھی تخلیق کاروں اور اہلِ‌ قلم نے نثر و نظم دونوں اصنافِ ادب میں طبع آزمائی کی ہے اس حوالے سے پشتو زبان و ادب کی بات کی جائے تو ایک اہم نام امیر حمزہ خاں شنواری کا ہے جن کا آج یومِ‌ وفات ہے۔ وہ پشتو کے ممتاز شاعر اور ادیب تھے۔ انھوں نے 18 فروری 1994ء کو وفات پائی۔

امیر حمزہ خاں شنواری ستمبر 1907ء میں خوگا خیل، لنڈی کوتل میں پیدا ہوئے تھے۔ انھوں نے پشتو زبان میں ادب کی مختلف اصناف پر کام کیا اور ان کی کئی نثری اور شعری کتب شایع ہوئیں‌۔ ان میں تجلیاتِ محمدیہ، وجود و شہود، جبر و اختیار، انسان اور زندگی اور نوی چپی اور شعری مجموعوں میں غزونے، پیروونے، یون، سلگی، بھیر، سپرلے پہ آئینہ کے، صدائے دل اور کلیاتِ حمزہ شامل ہیں۔ انھوں نے اردو میں‌ بھی شاعری کی ہے، لیکن جلد پشتو غزل گوئی اور دیگر اصنافِ سخن کی طرف مائل ہو گئے تھے۔

امیر حمزہ خاں شنواری نے سفر نامے بھی تحریر کیے جو کتابی شکل میں شایع ہوئے۔ انھوں نے شاعرِ مشرق علاّمہ اقبال، نام ور شاعر صبا اکبر آبادی کے کلام کو پشتو میں‌ منتقل کیا اور مشہور صوفی شاعر رحمٰن بابا پر بھی مضامین اور ان کے کام کو اکٹھا کرکے پشتو میں کتابی شکل میں پیش کیا۔

حکومتِ پاکستان نے امیر حمزہ خاں شنواری کی علمی اور ادبی خدمات کا اعتراف کرتے ہوئے انھیں صدارتی تمغہ برائے حسنِ کارکردگی اور ستارۂ امتیاز عطا کیا تھا۔