Tag: پلیٹ فارم

جاپان اپنی جدید عمارتوں اور منفرد طرزِ تعمیر کے علاوہ تیز رفتار ٹرینوں اور ریلوے کے جدید نظام کے لیے بھی مشہور ہے جن میں ایک انوکھا پلیٹ فارم بھی شامل ہے۔

2019ء میں جاپان میں سریو مہارشی اسٹیشن (Seiryu Miharashi Station) تعمیر کیا گیا تھا جو کسی مقام اور منزل تک پہنچنے کا راستہ نہیں بلکہ ایک ایسا پلیٹ فارم ہے جہاں پہنچ کر مسافر قدرت کے حسین نظّاروں سے لطف اٹھا سکتے ہیں۔

اس ریلوے اسٹیشن کا نہ تو کوئی داخلی دروازہ ہے اور نہ ہی کوئی خارجی پھاٹک۔ اس اسٹیشن پر کوئی ٹکٹ گھر نہیں ہے۔ یہاں تک صرف ٹرین کے ذریعے ہی پہنچا جا سکتا ہے اور اسی میں سوار ہو کر واپسی ممکن ہے۔

جاپان کا سریو مہارشی ریلوے اسٹیشن لگ بھگ دس کروڑ روپے کی لاگت سے تعمیر کیا گیا ہے۔ یہ جاپان کے علاقہ یماگوچی پریفکچر میں ناگوا اور نیکاسا اسٹیشنوں کے درمیان بنایا گیا ہے۔ اس اسٹیشن تک رسائی کے لیے سڑک یا کوئی دوسرا زمینی راستہ موجود نہیں ہے۔ اس لیے ٹرین ہی یہاں پہنچنے کا واحد ذریعہ ہے۔

دراصل یہ ایک تفریحی پلیٹ فارم ہے اور عین دریائے نشکی کے کنارے پر تعمیر کیا گیا ہے۔ یہاں سیّاح دریا اور آس پاس کے حسین نظّاروں سے لطف اندوز ہونے کے لیے آتے ہیں۔

یہ علاقہ موسمِ بہار میں‌ الگ ہی منظر پیش کرتا ہے اور سبزہ و گُل اور قسم قسم کی ہریالی لوگوں کو اپنی جانب کھینچتی ہے۔ یہاں لوگ موسمِ بہار میں آبشاروں، پہاڑوں اور سبزے کی خوب صورتی کا نظّارہ کرنے کے لیے آتے ہیں۔