Tag: پناہ گاہ کا افتتاح

لاہور : وزیراعلیٰ پنجاب عثمان بزدار نے لاہور میں ریلوے اسٹیشن کے قریب پناہ گاہ عمارت کاافتتاح کردیا، عثمان بزدار نے کہا ہماری حکومت نے کھلے آسمان تلے سونے والے افراد کو چھت دی ، یہ ان لوگوں پر کوئی احسان نہیں بلکہ ان کا حق ہے۔

تفصیلات کے مطابق وزیراعلیٰ پنجاب عثمان بزدار کی خصوصی ہدایت پر لاہور میں پناہ گاہوں کی تعمیر کا منصوبہ مکمل ہوگیا، وزیراعلیٰ نے ریلوے اسٹیشن کےقریب پناہ گاہ عمارت کاافتتاح کردیا، جس کے بعد عثمان بزدار نے عمارت کا دورہ کیا اور سہولتوں کا جائزہ لیا۔

وزیراعلیٰ نے ابتدائی طبی امداد کی فراہمی کی سہولیات کا بھی جائزہ لیا اور پناہ گاہ میں قیام کرنے والے افراد میں گھل مل گئے اور پناہ گاہ میں موجود تمام افراد سے مصافحہ کیا۔

اس موقع پر عثمان بزدار نے کہا ہماری حکومت نے کھلے آسمان تلے سونے والے افراد کو چھت دی ، یہ ان لوگوں پر کوئی احسان نہیں بلکہ ان کا حق ہے، اللہ تعالیٰ نے بھی صلہ رحمی کا حکم دیا ہے۔

وزیراعلیٰ پنجاب کا کہنا تھا 5ماہ میں پناہ گاہوں میں ایک لاکھ مسافرنےناشتہ کیا، پناہ گاہوں کیلئےبورڈبھی قائم ہے، آئندہ سال پناہ گاہوں کادائرہ کاربڑھائیں گے اور آئندہ سالوں میں لاہور میں 6 اسپتالوں میں پناہ گاہیں قائم ہوں گی۔

یاد رہے 10 نومبر 2018 میں وزیراعظم عمران خان نے لاہور ریلوے اسٹیشن کے باہر شیلٹر ہوم پروجیکٹ کا سنگ بنیاد رکھا تھا ،شیلٹر ہومز بے سہارا اور غریب عوام کے لیے بنائے جائیں گے اور اس میں 93 مرد اور 27 خواتین قیام کرسکیں گی۔

مزید پڑھیں : وزیراعظم عمران خان نے لاہور میں شیلٹر ہوم پروجیکٹ کا سنگ بنیاد رکھ دیا

میڈیا نمائندوں سے گفتگو کرتے ہوئے وزیر اعظم کا کہنا تھا کہ شیلٹر ہوم آسمان تلے رات بسر کرنے والے افراد کے لیے بنایا جا رہا ہے، یہ اقدام فلاحی ریاست کی جانب سے پہلا قدم ہے جو اٹھایا گیا۔

بعد ازاں رواں سال کے شروع میں وزیرِ اعلیٰ پنجاب عثمان بزدار نے کہا تھا کہ ہر ضلع میں سڑکوں پر سونے والوں کے لیے پناہ گاہیں بنانے کا فیصلہ کیا گیا ہے، وزیراعظم عمران خان ہمہ وقت معاشرے کے عام طبقے کی فلاح اور بھلائی کے لیے اقدامات کر رہے ہیں۔

خیال رہے لاہور کے مختلف مقامات پر بڑی تعداد میں لوگ کھلے آسمان تلے رات گزارتےہیں اور اکثریت کو بنیادی سہولتوں اور ابتدائی طبی امداد کے لیے موزوں جگہ درکارہوتی ہے، منصوبے کا مقصد بے گھر کی عزت نفس بحالی اور ضروریات پوری کرنا، محفوظ جگہوں کی تعمیراور بے گھرافراد کو لاحق خطرات کم کرنا ہے