لاہور: ذرائع نے امکان ظاہر کیا ہے کہ سابق وزیر داخلہ چوہدری نثار پنجاب اسمبلی کی رکنیت کا حلف اٹھائیں گے۔
تفصیلات کے مطابق ذرائع کا کہنا ہے کہ چوہدری نثار 18 مئی کے پنجاب اسمبلی کے اجلاس میں حلف اٹھا سکتے ہیں، چوہدری نثار راولپنڈی سے آزاد حیثیت سے رکن پنجاب اسمبلی منتخب ہوئے تھے۔
چوہدری نثار نے عام انتخابات میں منتخب ہونے کے بعد سے تاحال حلف نہیں اٹھایا، ذرائع کا کہنا ہے کہ چوہدری نثار کے ن لیگ اور ق لیگ سمیت آزاد ارکان سے رابطے ہیں۔
ذرائع کے مطابق سابق وزیر داخلہ نے مختلف جماعتوں کے اراکین سے رابطوں کے بعد صوبائی اسمبلی کے رکن کی حیثیت سے حلف اٹھانے کا فیصلہ کیا ہے۔
لندن میں شریف برادران سے ملاقات ہوئی یا نہیں؟ چوہدری نثار نے بتا دیا
یاد رہے کہ رواں برس فروری میں چوہدری نثار علی خان نے 2 ہفتے برطانیہ میں قیام کیا تھا، انھوں نے پاکستان کے لیے روانہ ہوتے وقت کہا تھا کہ ان کی شریف برادران سے ملاقات نہیں ہوئی، نیز وہ معمول کا چیک اپ کرانے گئے تھے۔
واضح رہے کہ سپریم کورٹ کی جانب سے نواز شریف کے خلاف پاناما کیس کا فیصلہ آنے کے بعد چوہدری نثار نے مسلم لیگ ن سے کنارہ کشی اختیار کر لی تھی، انھوں نے 2018 کے عام انتخابات میں قومی اسمبلی کے حلقہ این اے 59، این اے 63 سے بطور آزاد امیدوار الیکشن لڑا مگر انھیں تحریک انصاف کے امیدوار نے شکست دے دی تھی۔
